紅米 Note 11 Pro+ 5G 開箱，實機外觀即睇
外觀部分，紅米 Note 11 Pro+ 5G 採用咗 6.67 吋 AMOLED 平面屏幕，用上「穿窿芒」設計，支持 120Hz 屏幕刷新率，機背用上雙面玻璃材質，屏幕玻璃用上第五代 Corning Gorilla Glass，堅固耐用，前後玻璃同中框之間會有一層塑料層，可以降低跌爛手機嘅風險。另外，手機就好似平時磨砂機背咁，唔會咁容易痴手指紋 —— 不過當然，如果你隻手指有油，一樣會印到啲油漬落去啦。機背左上角會見到有鏡頭模組，外觀睇落你以為係四鏡頭，實際只係三鏡頭，純粹係為咗要「對稱」而加落去
。外觀介紹去到呢度，下面就同大家做個開箱：
▲ 包裝盒外觀。
▲ 我手上的顏色是石墨灰色 8GB + 128GB 版本，不過香港推出應該會是 8GB + 256GB 版本才對。
▲ 隨機附有充電火牛以及 Type C 插槽。
▲ 另外仲有卡針、透明膠套以及一堆說明書保養卡。
▲ 用上 6.67 吋 FHD+ AMOLED 平面屏幕。
▲ 用咗穿窿芒設計。
▲ 機背係平滑嘅玻璃材質，雖然係玻璃但不易沾指紋。
▲ 見到最頂有 108MP 高解像度鏡頭，而下面有四個圓形，其中有兩個係鏡頭，一個係閃光燈，而閃光燈隔離果個，係裝飾嚟，係為咗「對稱式美學」所以先至加落去喎。
▲ 鏡頭會有一定厚度。
▲ 右側會音量鍵，以及支持指紋辨識的電源按鍵。
▲ 機頂有 3.5mm 音量鍵以及 JBL 調音喇叭。
▲ 機底則有 Type C 插棤以及三選二 SIM 卡槽。
配 MTK 天璣 920 處理器！紅米 Note 11 Pro+ 5G 效能 + 跑分
效能部分，紅米 Note 11 Pro+ 5G 配備咗 MTK 天璣 920 處理器，內置 8GB RAM 以及 256GB ROM。以下版主會進行一連串嘅跑分測試，包括安兔兔評測、AndroBench 5、GeekBench 5、3DMark 以及 PCMark，畀大家睇下性能等方面嘅表現，以作參考。
▲安兔兔評測總分為 436765 分，當中嘅 CPU 成績為 128581 分，而 GPU 成績則為 126761 分。而進行跑分過程中，手機溫度提高咗 6.6 度，而電量則下跌咗 4%。
▲ 用來測試 ROM 讀寫速度嘅 AndroBench 5，當中連續讀取以及連續寫入速度分別為 972.21 MB/s 以及 782.49 MB/s，呢個速度代表紅米 Note 11 Pro+ 5G 用上 UFS 2.2 規格。
▲ GeekBench 5 測試結果。
▲ 3DMark 測試結果。
▲ PCMark 工作 3.0 效能測試結果。
紅米 Note 11 Pro+ 5G 續航 + 120W 充電測試
紅米 Note 11 Pro+ 5G 內置 4500mAh 電，同之前測試過嘅 POCO X4 Pro 雖然用唔同處理器，但一樣都係用上 6nm 處理器，理論上同樣都會省電，不過 Note 11 Pro+ 所用嘅 MTK 天璣 920 最高主頻為 2.5GHz，效能比起 POCO X4 Pro 所用 2.2GHz 嘅 S695 高，所以都會對實際續航有點影響，畢竟效能愈高，耗電也會愈大。版主我就播放了 YouTube 1080p 影片，連接 WiFi 並把亮度以及音量設至 50%，看看電量下降多少，再推算預計充滿電的話，可以播放多久 1080p 的 YouTube 影片。播放半小時之後，電量由原本 84% 降至 81%，即大約用咗 135mAh，換算下來即如果充滿電，預計可以連續播放 1080p YouTube 影片約 33 小時 20 分鐘，續航表現相當不錯。
▲ 開始播片時間為 20:23，電量有 84%。
▲ 播放半小時 1080p YouTube 影片之後，電量剩餘 81%。
▲ 畀埋 PCMark 嘅電池使用壽命測試大家參考，測試條件為音量、亮度 50%，開啟飛航模式。由 100% 開始到 20% 結束，大約用了 15 小時 32 分。
另外，手機亦支持 120W 快速充電，版主又嘗試用 3C Battery Manager 監測住手機充電情況，看看手機要用幾耐時間，可以充電至 100%。開始充電時間為早上 12:21 分左右，電量為 2%，根據數據顯示，去到 12:42 分就已經充到 100%，計起上來即係只是用了 21 分鐘，已經由 2% 到 100%，實在是相當誇張。
紅米 Note 11 Pro+ 5G 相機實拍！全靠小米呢個功能，晴天陰天雨天都有靚相
講起試相機，以往版主通常會逐個鏡頭，去畀啲試相大家睇下，但基於版主試機嗰段時間，日日落雨令我就算去到靚嘅地方，都未必咁易影到靚相，所以今次會將焦點，放喺其他地方度。當然，我都會畀少少各個鏡頭影出嚟嘅相大家睇，但我覺得紅米手機相機雖然進步咗好多，但喺落雨天陰天環境下，其實好難發揮到相機作用，反而喺呢啲天氣之下，我就覺得手機有內置「魔法換天」功能，係相當有用，雖然唔係啲乜新功能，但卻可以令你落雨天都可以有靚相 post 上 Facebook 或者 IG。標準拍攝
 |
 |
108MP 高解像度拍攝
 |
 |
超廣角拍攝
 |
 |
微距拍攝
 |
 |
魔法換天
前置鏡頭
▲ 背光環境下自拍，人像會變得比較黑。
▲ 一般自然光底下，人像模式的自拍質素。
小結
無錯，以紅米系列手機嚟講，呢部紅米 Note 11 Pro+ 5G 叫價 $3299，其實係偏高，不過若果唔計價錢，純粹以手機嘅硬件配套、整體質素嚟睇，我又覺得紅米 Note 11 Pro+ 又算係咁，除咗個樣都算靚仔，而且又有主流嘅 120Hz 芒，又有領先嘅 120W 快速充電，25 分鐘內充滿電，影相仲要唔差過得去，天氣唔好仲可以用 AI 「魔法換天」，我覺得作為一個普通用家，呢部手機應該都能夠令你接受。唔知大家又對佢有無興趣呢？按這裡有紅米 Note 11 Pro+ 5G 詳細規格及最新賣價
