昨日版主收到 OnePlus 官方發出的電郵，表示推出名為「It’s raining invites」的邀請名額贈送計劃，滿以為好似最近黃色暴雨般，邀請名額好多，點知登記後先發現邀請名額只有 150 個。而且要取得邀請，除了登記還要完成 5 項任務，包括 Follow 官方 Twitter、Google+，將消息分享給其他朋友等，方可增加抽獎次數，提高「中獎」機會。至文章截稿之時，就有超過 60 萬次登記爭 150 個邀請名額。而就算成功獲得邀請，消費者只有黑色機身 64GB 版本可以選擇。你話係咪慘過輪米？
OnePlus 國際版要先登記、做任務、再抽獎，然後先可以用邀請名額買機；大陸版 OnePlus One 就簡單直接得多。OnePlus 網站已經宣佈在 28 日中午 12 時正式開售大陸版，大陸版一次過推出 16GB 和 64GB 兩個版本。日前已經接受預約，銷售方式以開賣當日排隊次序，按照順序在 10 至 15 日內出貨。OnePlus 作為大陸品牌，少不免要照顧同胞利益，其他國家地區的消費者唯有等等。為咗幫襯 OnePlus 買機，要過五關斬六將，仲要有運，網友們仲等唔等？
資料來源：OnePlus