簡單而隆重的開箱儀式
首先講下呢部手機嘅包裝方面啦! 其實在包裝上無咩特別，只係簡簡單單一個白色嘅盒，上方寫住 「1+」以及大大個 「X」字，而左右兩邊同樣就咁寫住 OnePlus X。不過本着「簡單就是美」的準則，版主覺得呢種白色都帶俾人一種高貴的感覺。而在包裝盒的底部是以紅色為主的，你可以見到有關這部 OnePlus X 的基本資料，而今次版主上手試的就是 16GB 皓月白色的 OnePlus X (16GB 真係唔夠用，好彩不是自用機!)。
打開包裝後，將裏面嘅所有野拿出來，你會見到有一部 OnePlus X、一條 USB 線、一個雙腳式的充電器以及一枝用來打開 Sim 卡槽的卡針。驚喜的是，這套 OnePlus X 居然還附送一個透明的保護套，雖然只係膠製的，但有點都好過無。另外，你會見到入面有一張卡，只要持卡片到一加零售店，就可以免費貼膜一次。不過看來這項服務只適用於內地用家。
▲ 你可以見到只係一個好普通的白色盒，上面有個「1+」以及大大隻「X」字。
▲ 左右兩側只有簡單寫住 OnePlus X。
▲ 底部會有基本資料，而這部 OnePlus X 是皓月白色的，儲存空間有 16GB。
▲ 打開個盒，你會見到頂部會有部 OnePlus X。
▲ 個盒嘅邊同部機配合得好好，好穩陣唔會容易鬆落，第一次上手仲以為係用左磁石吸住。
▲ 將所有野拎哂俾大家睇，你會見到隨機附送的配件，包括保護套、卡針、充電器、USB 線以及一張俾人免費貼保護貼嘅卡片，不過香港似乎就用不着，但送咁多野都可以感受到 OnePlus 的誠意吧?
外型 + 上手感
咁開箱儀式就完結了! 咁係時候拎部機出黎睇下佢個外型係點。外型方面，呢部 OnePlus X 的機身尺吋為 140 x 69 x 6.9 mm，而重量只有 138g，拎起上手真係覺得好輕身 (可能版主用慣大機嘅緣故)。另外，呢部 OnePlus X 採用了 5 吋 AMOLED 全高清的 2.5D 屏幕，適合中意單手使用的用家，而且因為採用左 2.5 D 屏幕嘅關係，感覺上增添左一份潮流感，加上佢塊屏幕比起其他手機還要厚，OnePlus 強調睇落去更有質感。OnePlus X 採用了金屬邊框設計，拎上手嘅時候能夠增添手感。不過值得一提嘅係，佢嘅金屬邊框用上左「阿爾勒紋理」，所以感覺上比其他金屬邊框手機更為特別，而版主跟朋友開玩笑，說這部手機的邊框能夠當「指甲鋤」用，唔知如果你用上手，會唔會都有同樣的感覺呢?
▲ OnePlus X 的正面，顏色是皓月白色，配備 5 吋 AMOLED 全高清 2.5D 屏幕，下方有「多任務鍵」、「主頁鍵」以及「返回鍵」。
▲ 而上方你會見到有個 800 萬像素的前置鏡頭以及 Sensor。(以前置鏡頭來說，800 萬像素算是很不錯的了!)
▲ 而機背同樣都是皓白色，大約中間位置會看到金色「1+」的 Logo。
▲ 機背的左上方會看到 1300 萬像素的主鏡頭以及閃光燈。
▲ 從機的側面看去，你會清楚看到 OnePlus X 的金屬邊框，而機的左側會有「三段式」的按鍵，有少許像 iPhone 的靜音鍵的，不過 OnePlus X 就有三種模式俾你自行調校，包括「靜音模式」、「勿擾模式」以及「響鈴模式」。
▲ 而機的右側你會看到音量鍵以及電源鍵。另外，音量鍵的上方會有一個卡槽，需要用卡針弄出來，可放置 Nano Sim 卡以及 microSD 卡。
▲ 金屬邊框是用了「阿爾勒紋理」，盡量 Zoom 近啲俾大家睇下呢種紋理係點嘅樣，睇下點解版主會覺得好似「指甲鋤」。
▲ 機的頂部會有一個 3.5mm 耳機孔。
▲ 而機的底部會有 USB 槽 以及雙喇叭。
OnePlus X 跑分測試：安兔兔 + BaseMark ES 2.0 Taiji + Vellamo
OnePlus X 採用了 Qualcomm Snapdragon 801 2.27 GHz 處理器，而除左 OnePlus 嘅手機之外，HTC One M8、Samsung Galaxy S5、Sony Xperia Z2 同樣都是採用 Qualcomm Snapdragon 801，唔知呢部 OnePlus X 跑分得出黎會係咩成績呢? 版主而家就用一系列嘅跑分測試軟件為呢部 OnePlus X 進行跑分測試，得出結果為 41201 分，雖然比 Samsung Galaxy S5 (46386 分) 低少少，但以 S801 黎講，呢個成績尚算合理。
▲ Antutu 跑分為 41201，係用上 S801 CPU 嘅手機裡面，叫做唔錯。排行方面僅次於採用 Exynos 5433 處理器的 Samsung Galaxy Note 4。而內存方面，OnePlus X 配備了 3GB RAM 以及 16GB ROM，對於版主黎講唔多夠用，用黎 share Wi-Fi 都得。
▲ Basemark ES 2.0 用來測試手機運作 3D 遊戲嘅效能，有 60fps 叫十分好。得出 56.03 分代表打 3D 遊戲，應該都會不錯嘅效果。這亦係用 Qualcomm 高效 CPU 好處之一。
▲ Vellamo 跑分分為Chrome 瀏覽器、多核與金屬。Chorme 瀏覽器代表用 Chorme 上網嘅流暢度。OnePlus X 分數有 2630 分，算係一般至中上嘅成績，代表用來上網 browsing 感覺會挺順暢。而多核、金屬用來測試手機整體效能。多核是多核心 CPU 運作情況，OnePlus X 分數都係不錯，成為績比 HTC One M8 好。
屏幕大比拼：OnePlus X (AMOLED) VS HTC M9+ (SLCD)
介紹完 OnePlus X 嘅外型以及同大家做完一連串嘅跑分測試，咁而家版主就同大家講下 OnePlus X 嘅屏幕。咁屏幕呢樣野，唔同機所用的材質都可能有唔同，呢部機嘅屏幕可能係用 IPS 材質，果部機嘅屏幕又可能用左 AMOLED，當中個分別係點唔係個個都知。所以今次版主就揀左採用左 SLCD 屏幕嘅 HTC M9+ 比拼採用 AMOLED 屏幕的 OnePlus X。首先版主各自在兩部機上挑選左一張一樣的 model 相，再將兩部手機亮度調到最高，方便做個比較。
▲ 今次我揀左呢位 model，唔知岩唔岩你口味! 咁首先左邊果部機係 OnePlus X，而右邊就是 HTC M9+，咁你會發現，採用 AMOLED 的 OnePlus X 屏幕會相對地光啲，而採用 SLCD 的 M9+ 就相對地偏藍較冷。從顏色上來看，OnePlus X 睇落去對比更鮮明。
▲ 而我地側少少睇落去，會發現 M9+ 會變暗偏紅，而 OnePlus X 的屏幕雖然都暗左少少，但佢嘅顏色變得較冷偏藍。
▲ 再側少少又點呀? 我地會發現 OnePlus X 開始會有少許「偏色」的現象。而顏色結果都係同上面一樣，OnePlus X 的屏幕呈現藍色，而 M9+ 的屏幕就相對有點偏紅。
▲ 咁我而家將兩張相放到一樣嘅大小，比較一下兩張相的細緻度。由於 OnePlus X 的屏幕較光，能夠突顯 model 面部的層次感。但如果留意髮絲部份，會發覺 M9+ 的髮絲顯現得更加清晰，影像更為細緻。
▲ 最後一步，我地而家就再用 Google 嘅畫面，比較一下呢兩部機的屏幕。One Plus X 屏幕顏色比較偏黃，而 M9+ 所顯示嘅白就相對白啲。
▲ 側啲睇，M9+ 開始有少許變暗，顏色上亦淡左，而 G7 Plus 相對 M9+ 屏幕更亮，而且顏色變得比較偏藍。
▲ 再側啲睇，你會發現 OnePlus X 屏幕出現偏色現象，並變得更藍。反而 M9+ 就相對較白，而且影像更清楚。
相機測試
咁呢部 OnePlus X 配備左 1300 萬像素的主鏡頭搭配 f/2.2 光圈，並支援 PDAF 相位對焦功能，對焦速度只需 0.2 秒，咁唔知影出黎嘅效果會係點呢? 版主就用呢部 OnePlus X 影左唔同嘅相，俾大家睇下啲相個效果如何。
▲ 去完拎部 OnePlus X，大約下午 4 時左右，天還是亮的。
▲ 沿途經過地鐵站。
▲ 西洋菜南街。
▲ 經過女人街，見到路飛!
▲ 終於回到主場。
▲ 夜晚收工去食野，當然都係相機食先!
▲ 晚上的女人街。
▲ 可以見到就算夜晚影出黎，效果都唔錯。
▲ 歸家經過的小公園。
▲ 充滿着童年回憶。
小結
總括黎講，呢部 OnePlus X 無論在外型、跑分、相機上都挺令人滿意，略有不足是屏幕方面，但整體上這部千元價位的手機都算合格。而且因為呢部 OnePlus X 嘅金屬邊框，拎上手嘅手感都好唔錯。不過大陸機始終都係大陸機，當呢部機用起上黎有點麻煩，原因就係佢沒有支援 Google Service，意思即係話連 Google Play 商店都無，只有一加獨有的「一加商店」，而且啲 App 並不齊全，好似 Vellamo 呢隻跑分軟件，在一加商店內是找不到的。如果呢部 OnePlus X 能夠內建埋 Google Play，相信在香港推出的話會大大加分! 唔知大家對於呢部 OnePlus X 有啲咩野評價呢? 覺得呢部機合格嗎?
在文章刊登時，OnePlus X 的建議零售價為 HK $1859，按這裡有詳細規格及最新賣價。
