五吋芒 + 四核！4G 中港神機 CMHK M811 二千有找 八月上

Keith Yim 2014-08-01 19:12 | Acer

有睇過版主 Eddie 介紹大電器店的買機即減優惠，都可以想像到，最近無乜人願意花錢買新手機，所以店主先出減價絕招!  大家都等九月的 iPhone 6? 版主收到風，呢個八月，繼續係平價手機天下!  有一部比 ZTE Blade Vec 更誇張的平價 4G LTE 手機會上市，主打「五模十頻」打通中港 4G，五吋芒， 四核，再加八百萬像素相機，呢部就係 CMHK M811。CMHK 即係中國移動香港喎! 係呀，是 CMHK 自家品牌 4G 手機，預計賣價二千蚊樓下，相信最後會以貼 ZTE Blade Vec 賣價千五蚊左右發售。中港 4G 手機來說，比起昨天公佈的 HTC One E8 平更多喎。

CMHK M811 : 五模十頻，中港 4G LTE

4G LTE 手機可以幾平?  其實不少型號已做到二千蚊樓下。版主收到風，中國移動香港會係八月份，引入母公司中國移動在中國大陸以「千元 4G」手機自居的「中國移動 M811」香港版本，如無意外，會叫作 CMHK M811。呢部機擁有中規 4G 手機規格，與一大批三千樓下 4G LTE 手機一樣，使用 Snapdragon S400 處理器與 1GB RAM，採用五吋 IPS 屏幕。擁有八百萬像素 F2.2 大光圈背照式鏡頭，可以換電及插卡也是賣點之一。如無意外，CMHK M811 會由中國移動香港獨家發售。配合其中港 4G 數據漫遊服務，CMHK M811 會打通香港 FDD-LTE、中國移動的 TD-LTE 及中國移動大陸專用 3G TD-SCDMA 及香港的 3G WCDMA。至於售價，中國大陸賣 999 人民幣，但版主知道，香港不會賣到咁平，好大機會跟中興的「星星一號」香港版 ZTE Blade Vec 4G 同價，約千五蚊左右，最差情況，也不會賣貴過二千元港幣。


▲ 圖中是中國大陸 CMCC 的 M811，據知香港版本外型相約，有點似 Sony Ericsson 時代的 Arc S 味道。雖然是二千樓下 4G LTE 手機，但屏幕也有 5 吋，HD 720p 解像度。


▲ 機背鏡頭是八百萬像素是 BSI  背景式類型，並擁有 F2.2 大光圈規格。


▲ 網上流傳 M811 的香港 ROM，在截圖中，已見到有繁體中文目錄及已導入 Google Mobile Services。

CMHK M811 在文章刊登時，售價未定。按這裡知道詳細規格及最新賣價。