樂 Max 開箱！6.3 吋芒最高階版本樂視手機
今次試玩的樂 Max 同之前華為的 P8 Max 以及 Honor 7 有一點主要的分別，就係呢部機版主都幾肯定係會有行貨到港的，不過係未知幾時咁解。樂 Max 係大陸分為了 32GB 、 64GB 以及 128GB 版本，而版主今次試玩的就係 32GB 金色版本。係規格上就有 6.3 吋 2K 解像度屏幕， Qualcomm S810 處理器配 4GB RAM ，相機就係 2100 萬主素配上 400 萬像素前鏡，電量方面就有 3400mAh 。同之前到港的樂 1 Pro 一樣，包裝盒都幾豪華，跟機的配件都係基本上一致的，充電器、 Type C USB 線以及一個 USB Type-C 的轉接頭同埋有一個水晶膠殼。版主發現近來不少大牌子都有送埋手機款呢個習慣，個人就覺得都值得一讚，此終大陸牌子手機除左小米之外要搵配件都唔容易啊。
▲ 版主試玩的是樂 Max 通用版，香港 4G FDD LTE B1 (2100)、B3 (1800)、B7 (2600) 都接收到。
▲ 同樂 1 以及樂 1 Pro 一樣，樂 Max 跟機都有膠殼送。
手感跟 P8 Max 不分伯仲，屏幕或成耗電隱憂
係外型方面，樂 Max 同之一的樂 1 Pro 一樣係用左金屬背蓋。近來係大陸有不少新機都係用上左金屬機背的設計，大抵上其實金屬機背都會有不同的手感，好像以前 HTC One M8 以及華為的 P8 Max 的金屬都帶有類似磨沙的質感，而今年推出的 HTC One M9 改用了不同的技術，感覺就更為平滑，但用耐左會有少少油的感覺。個人而言帶有磨沙質感的金屬機身係更為舒服的，而樂 Max 都係用上左呢種金屬機身，所以跟同樣係巨芒 P8 Max 相比的話版主都分唔到邊個手感更好。當然有樣野係肯定的，就係相對來講 6.7 吋的 P8 Max 無 6.3 吋的樂 Max 咁易單手握實。係屏幕方面，用上左 2K 芒的樂 Max 係屏幕細緻度同清晰度方面都無甚麼好挑剔，而係可視角度方面，即使係低角度睇都未見到反白的清況，不過係顏色上就會淡左少少。另外相信大家都記得版主提過係現時來講其實 FHD 解像度會較好，版主到而家都係有同樣睇法的。不過今次係出於電量上的考量，因為樂 Max 只有 3400mAh 電量同時不可換電，但屏幕就有 2K 解像度再加上用左容易溫度急升的 S810 處理器，係耗電量方面可能會有隱憂。
▲ 樂 Max 其中一個賣點係支援指紋掃描。
▲ 3.5mm 耳機插孔係機頂，而 USB Type C 插口就係機底。
▲ 機身左側有音量鍵同埋跟 iPhone 一樣的靜音按鈕，而機身右邊就有雙 Sim 卡槽，要留意樂 Max 的雙卡配搭係 1 張 Micro Sim 以及 1 張 Nano Sim 啊。
▲跟住再請來 Oppo 的 Find 7 做一個機身大小比較，可以見到有 6.3 吋芒的樂 Max 明顯大一個碼！
▲係屏幕細緻度上，有 2K 解像度 464ppi 的樂 Max 相信可以滿足到大家的要求。
▲ 係低角度之下樂 Max 雖然無反白的情況，不過係光度上會有所減弱。
Qualcomm S810 搭 4GB RAM ，安兔兔跑分衝破六萬
係效能方面都係樂 Max 有優勢的地方之一，係硬件有 Qualcomm S810 同埋 4GB RAM 的支持下，係安兔兔的成績係相當亮眼的。不過有趣的地方在於係 Vellamo 上面樂 Max 的表現反而略為失色，相信係在軟件方面未完全 Tune 好的關係吧。另外好多網友都關注的發熱問題，坦白講，用得 S810 係溫度上都會偏高，係睇有無超過用家的接受能力，個人覺得跑完分後機背的發燙情況未致於燙手，都係可以接受嘅。
▲ 安兔兔跑分上樂 Max 有成六萬分！比起一樣係 S810 + 4GB RAM 的小米 Note 頂配版更高。
▲ 不過係 Vellamo 上面， 樂 Max 的表現就相對遜色，理論上 S810 加 4GB RAM 係多核同單核分數上不會咁差才對。
▲ 係 Basemark 2.0 上面，樂 Max 都有 59.69 都係相當不錯的成績。
Sony 2100 萬像素 IMX 230 F2.0 光圈鏡頭試拍
另外就係相機方面，樂 Max 所採用的都係 2100 萬像素 Sony IMX230 ，即係同之前華為 Honor 7 一樣，有 F2.0 大光圈以及 OIS 光學防手震。要留意的地方係樂 Max 一樣設定上係預設左相機用 16:9 比例的 1600 萬像素拍攝的，大家如果要用盡 2100 萬像素影相的話就要係設定內先搞好。同 Honor 7 相比，樂 Max 優勢在於儲存相片同埋對焦速度上反應都相當快，以下睇睇試拍先。
▲ 預設 16:9 千六萬像素，大家要係設定到調較。
小結：規格頂級有一定吸引力，行貨版大家會唔會等？
係 P8 Max 登場後，同樣有 6 吋以上大芒的樂 Max 與前者相比真係毫不遜色，而且係硬件規格上可以話更勝一籌。因為目前仍然算係「頭啖湯」的關係樂 Max 32GB 版本而家水貨價都仍然要 $4280 （ 32GB 樂 Max 大陸定價 2999 人仔）。雖然以價錢來講樂 Max 不算好平，但以手機表現來講，基本上而家都好難揾到一部巨芒機有樂 Max 的質素了。對於有意入手的朋友來講，唔知你哋又會唔會等行貨推出先入手呢？一齊講講啦！更新：目前樂視樂 Max 32GB 版本水貨價為 $4280 ， 64GB 版本水貨價為 $4480 。
鳴謝：Lucky Digital Store 好運數碼 ( 5465-5886 )
在文章發佈時，樂視 Le Max 仍未有香港定價，按這裡有更詳細規格。