真正「三防」手機：1.8 米防撞、IP67 防塵防水
CAT 有推出智能手機，好多人都知，香港推出有 S60 同 S41，但價錢就相對係貴嘅。不過咁，唔知有無網友留意到，其實 CAT 上年 5 月左右，都曾經有推出一部同樣以三防為賣點的 Feature Phone - B30 呢? 或者大家比較少留意 Feature Phone，所以出左都未必會覺，如果係地盤佬 / 老人家用，單純打出打入，呢部 Feature Phone 其實都可以考慮。CAT B30 用上了 2 吋 TFT 屏幕，內置 32MB RAM 以及 128MB ROM，支持最大 16GB microSD 擴充，並具有 IP67 防水防塵規格，建議零售價為 $899，以功能手機來說可能貴左少少。不過咁，版主問過而家並唔係間間大舖都有貨，但深水埗有細舖仲有貨，行貨賣價約 $630。
▲ 大舖唔係間間都有呢部 CAT B30，不過版主去果間剛巧有。
▲ 至於深水埗細舖賣價，版主問過最新價錢為 $630 (以上價錢牌未換)。
查詢及鳴謝：人氣電訊
同樣出名硬淨，Nokia 6 細舖 $1900 唔使入手
2018 年仲用 Feature Phone，版主你係咪玩嘢呀？只能說無論係一部功能有幾少的手機，始終都係有佢嘅市場價值，如果唔係一間公司係絕對唔會再出呢類型的手機。不過如果你想搵返智能手機，二千有找又有無硬淨嘅選擇呢？有！就好似 Nokia，同樣係出名夠硬，特別是 Nokia 6，曾經有傳媒試過用 Nokia 6 開合桃，成功開到合桃之餘，手機都沒有出現任何問題。當然，講笑就咁講，你估版主真係會叫你用手機開合桃咩，只不過係強調 Nokia 6 的堅硬程度。大舖現時只有古銅色，賣價一蚊無減，售 $2088，但如果去深水埗 / 旺角的細舖買，大約 $1860 就可以買到。
唔介意水貨 + 燒板，LG 都可以係一個選擇
當然，想要又平又性價比高，其實仲有一個選擇，但網友會否選擇，就悉隨尊便。說的是舊舊代旗艦 LG V10，係 LG 2 年前推出，標榜通過軍事級防撞的手機 (其後的 V20、V30 已經失去了這個賣點)，有 5.7 吋 2K 芒、Qualcomm S808 處理器、4GB RAM 以及 64GB ROM，specs 就無問題嘅，但比較多網友介懷的，是其容易燒的底板。V10 大舖已經不會再有賣，如果仲想入手只能入手水貨，先達賣價約 $1580。
以上皆為綜觀所有手機，相對比較硬淨、二千樓下的智能手機，網友又會點揀呢？
Nokia 6 在文章發表時，大舖賣價為 $2088，按這裡有詳細規格及最新賣價。
LG V10 在文章發表時，水貨賣價約 $1580，按這裡有詳細規格及最新賣價。
