YotaPhone 替代機 手機、電子書兩用！TCL 50 PRO NXTPAPER 5G 手機香港賣價二千中

左定坤 (Cho Ting Kwan) 2024-08-26 12:25 | TCL

版主記得當日試玩華為磨砂屏幕平板電腦，真係覺得相當正，唔單止護眼，而且陽光底下仲可以睇得清清楚楚，我真心好鍾意，其後有唔少品牌都參考呢種設計，連 Apple iPad Pro 都有跟埋。如果連手機都玩呢種磨砂平板設計，而且可以秒變電子書模式，好似 E-Ink 嗰種，你又會唔會有興趣呢？今次講嘅係 TCL 50 PRO NXTPAPER 5G 手機，最近已經喺香港開賣，賣價只係二千中就有交易！想知詳情，睇下文啦！

TCL 50 PRO NXTPAPER 5G 豐澤上架

TCL 50 PRO NXTPAPER 5G 手機，已經無聲無息的在香港上架，睇返豐澤網店上寫嘅建議零售價，佢嘅賣價為 $2698，不過暫時仲係寫住「即將開售」，即係未賣，但就快有。但呢個價錢，又有無料到呢？我哋即刻睇埋呢部手機嘅介紹。

TCL 50 Pro NXTPAPER 5G 硬件規格

TCL 50 PRO NXTPAPER 5G 係一部相當特別嘅手機，具有 6.8 吋 NXTPAPER FHD+ 屏幕，解像度為 2460 x 1080，通過咗無反光 TUV 認證以及紙質感顯示 SGS 認證，佢係一種類似磨砂屏嘅屏幕，平時可以當普通手機用，支持 120Hz 刷新率，而手機側面會有個掣，可以快速將手機變成電子書模式，做到好似 E-Ink 嗰種墨水效果，好處係相當慳電同護眼。版主諗返起曾經出現過一部手機、電子書二用嘅手機，嗰部叫 YotaPhone，而家呢部 TCL 50 PRO，就係類似嘅產物，但唔需要好似 YotaPhone 咁要用兩個芒，一個芒就做到！

另外，TCL 50 PRO NXTPAPER 5G 配備咗天璣 6300 八核心處理器，內置 8GB RAM 以及 512GB ROM，電池容量為 5010mAh，在墨水模式下可以支持長達 7 天閱讀時間，並支持 33W 有線快充。相機部分，手機採用咗 108MP 主鏡頭 + 8MP 超廣角鏡頭 + 2MP 微距鏡頭，前置鏡頭則為 32MP。