​HKTV 有難！TVB 都玩 OTT 免費互聯網電視

Keith Yim 2015-03-25 12:06 | 數碼影音

因為政府死都唔俾免費電視牌照俾維基壇 HKTV，攪到佢地要以 over-the-top 或 OTT 以互聯網方式開台。大台 TVB 點會睇住人地發圍，今日宣佈會係 2016 年 1 月推出全新 OTT 平台，即係好似 HKTV 咁，用機頂盒或手機，駁電視機睇電視。有別於現時 TVB 收費電視，平台係免費嘅，有免費內容。收費內容部份講明月費唔駛一百蚊。用了 OTT 平台，大台包括收費電節目就好似 HKTV 咁，你用機頂盒、手機、電腦、平板都睇到。



今日大台 TVB 無線電視廣播有限公司，宣佈係 2016 年初推出 OTT 廣播平台，並宣佈與和記環球電訊及３香港達成共識，由其支援發行及銷售。TVB 執行董事總經理鄭善強表示，係 2016 年 1 月推出嘅 OTT   廣播平台，用家只需要利用一個全新機頂盒，透過寬頻傳送或手機網絡傳送模式，便可以做到現在旗下收費電視做不到的服務，包括 Video On Demand 點播、Catch Up 回看。初步 TVB 全新 OTT 廣播平台，會包括免費及收費內容，直播與點播都有。免費內容包括現時數碼廣播嘅免費頻道，鄭表示未來大部份節目都會播供 Video On Demand 點播重溫，收費內容會係現時無線收費電視 TVB 自製頻道，如六個劇集台、新聞台、體育台及粵語片頻道等等。鄭善強強調，呢個新 OTT 平台是開放平台，任何內容供應商都可以跟他們商談，加入免費或收費平台內容。至於收費內容方面，TVB 強調會係月費 $100 以下。


▲ TVB 今日宣佈係 2016 年推出互聯網電視 OTT 平台，包括以寬頻及手機網絡傳送電視節目。


▲ 講明會提供 4K 畫質內容。


▲ 呢個新 OTT 平台，TVB 講明會歡迎任何內容供應商加入提供節目。


▲ 寬頻部份，會跟和記電訊合作。


▲ 2016 年 1 月推出。

更多報導：TVB OTT 平台 vs HKTV 盒子電視大比拼