開箱了！
呢部 ASUS Chromebook 型號 C523，本 YK 係森林入手的版本係進階版，規格 Pentium N4200 四核心處理器，配合 4GB LPDDR4 2400MHz 記憶體，以及 64GB eMMC 儲存空間，最吸引係 15.6 吋 LED 背光全高清 1920 X 1080 觸控屏幕。對於 Chromebook 黎講算係靚 SPEC 架啦，聖誕前購買連運費大約 340 美金，大約 2720 港幣就送到屋企。
▲ 紙箱熟口熟面，原來同上一次我買部軍規 ASUS Chromebook 一樣。。。
▲ 森林買野記得睇清楚封條是否原裝。
▲ ASUS C523N 其實有好幾個版本，記得望清楚係 Celeron 雙春處理器定係 Pentium 四春機。
▲ 開箱喇，盒內乜都無，簡潔又環保。
▲ 有兩本說明書 + 保養卡，但留意只限美國本土保養，無國際保養的。
▲ 跟機有雙腳 Type C 充電器，支持 5V/3A、9V3A、15V/3A、20V/2.25A 四種充電模式。
▲ 比較有驚喜係原廠隨機附送一個滑鼠，等你達成「左青龍右滑鼠」的任務。
▲ 哇，真機登場！ 面蓋磨砂金屬冰冷十足，很舒服。
▲ 底部有左右雙喇叭，以及大大個四角防滑膠；但為何底蓋不是金屬呢？
▲ 機身側面有 USB Type A 和 C 接口，後者支持輸入充電。
▲ 另一側有另一個 Type C 接口，同樣支持輸入充電； 其餘的是 3.5mm 耳機孔、micro-sd 卡擴充，以及 USB Type A 一個。
▲ 揭開部機心感不妙，有種說不出的不安感。
▲ 功能鍵齊全，屬於標準 Chromebook 的鍵盤排列，輸入的手感良好；但 C 蓋竟然係噴漆 + 塑膠物料，而且係比較軟身的塑膠。
▲ 觸控面積大，有利於 ChromeOS 的手勢操作；光滑塑膠面觸控板操作尚算良好，但以我經驗，往後會容易掉漆和打滑。
▲ 號稱 15.6 吋 1920 X 1080 觸控屏幕，官方都無呃我，但估唔到係早期有 AIR GAP 的觸控芒工藝！ 天呀，本身反光芒已經難以接受，仲要係有 GAP 的 「MOON」！？
天人交戰： 退貨？ 不退貨？
因為個 MOON 以及唔係全金屬的緣故，本 YK 心感中伏，平平地兩千七買翻黎都打算退貨了。 當天唔少 Telegram 網友都知道本人成為了 ASUS C523 苦主，我再上網搜尋下其他人有無覺得中伏。
▲ 呢個鬼佬內心很強大，竟然話係 「nice screen」，而且比足 5 星；最終評價係「great buy」。如果唔係佢寫住認證購買，我仲以為係打手寫評語。點都好，最後我決定退貨比森林。
▲ 退電子產品比森林，複雜程度、難度、以及花費程度，簡直同我地偉大的沙中線一樣！
▲ 打印機、封箱膠紙、剪刀缺一不可。首先，要按照指示打印一連串標籤，逐一貼在紙箱上面、放在紙箱裡面、並用透明封箱膠紙全部封好，確保不會因為滲水的緣故模糊標籤。
▲ 搞好之後，你要搵一個物流公司退貨，我選擇了應該係最平的香港郵政，但需要網上申請帳號、驗證賬號、填寫所有報關資料和表格、運費大約 400 元，需要等 45 天平郵送達。
▲ 以上工序搞左我成個早上，食完個午餐就抬箱野去郵局準備送走佢；你睇下貼到成個紙箱都係野，因為香港郵政都要另外再貼標籤，今鋪真心「玩 9 me」，送得走算係咁。
▲ 去到郵局排隊等 15 分鐘後，出事了！ 本 YK 被告知，唔會運送有鋰電池的產品，所以我要抬翻部機返去。。。
後記
到最後我都無法成功退貨，因為聞說 DHL 和 FEDEX 可以接受鋰電池產品寄送，但需要 N 咁多證明文件，以及運費竟然痴線地達到 1200 元港幣。後來有位網友表示有興趣，我平賣比佢當玩具玩，我講嗮呢部 C523 難以接受的缺點比佢聽，但睇佢又玩得好開心，仲話覺得部機啱用，咁本 YK 都老懷安慰，虧損得都開心翻少少。
補充：但如果係因為壞機而退貨，可以跟森林職員線上討價還價，全款一換一比新機你都試過。
下次再去森林買電腦，退貨費用高昂和複雜過程，應該會令我打退堂鼓，唔知道有無其它網友都有類似經歷？ 或者你有特殊平價方案可以送走垃圾？ 不妨同大家分享下。