開箱
係開箱之前，本 YK 強烈建議大家先點擊閱讀上一代 Samsung Galaxy Book Ion 的評測，因爲外殼模具新一代的 Book Ion 2 同舊代係一模一樣，只係配色和用料上有不同。另外，值得留意當時所採用的 Intel 10 代處理器。 今次黎到 Galaxy Ion 2，本 YK 將會以同樣方式進行評測，等大家對 Book Ion 兩代之間的差異有清晰的了解。到底新一代內涵上的升級有幾大呢？ 今次本 YK 手上的 Book Ion 2 同樣係 13.3 吋屏幕版本。
▲ 純白的外盒依然刻上淡淡的 SAMSUNG 字樣。
▲ 上一次的珍珠白配色叫做「Aura Silver」，今次係另一種「Mystic White」霧光白，但我個人會覺得「仙氣白」會更貼切。
▲ 配件簡單，火牛 + 卡針 + 說明書 + 保養證； 值得留意係三星爲 Book Ion 2 繼續提供 1 國際 + 1 本地合共兩年的保養。
▲ 原裝火牛只支持 19V/3.42A 輸出模式，亦與上代一樣並非 USB-C 火牛。
機身佈局
▲ 仙氣白黎了，磨砂面的金屬外殼質感相當爽，特殊物料塗層可以杜絕指紋印； 而且同上一次測試的舊代不同，踢走幻彩流光變化的塗色，睇落去變得更加清純 ~
▲ 連機身底部都跟上代一樣，保持簡潔和對稱的佈局，保留單一條碼式抽風口設計。
▲ 機身底部四角各設有一粒防滑膠。
▲ 值得本 YK 大力、高度、真心讚賞的係 Book Ion 2 堅持 MIV 越南製造，呢個選擇絕對正確。
▲ 機身右側是外放喇叭、兩個 USB 3.0 接口，以及支持 UFS 卡 / microSD 卡的擴充卡槽。
▲ 插針式卡槽可以減低入塵、異物的機率，對記憶卡的保護性亦可以大幅提高。
▲ 機身左側跟上代一模一樣：另一個喇叭、3.5mm 插孔、升級成 Thunderbolt 4 的接口、HDMI 輸出以及電源孔。
▲ 上圖是屏幕最大開啓角度，而過往機身背後的轉軸係藍色，而二代就直接變成白色，成部機外殼都係白色，最適合我呢種又 PURE 又 TRUE 的用戶。
▲ 下沉式轉軸的好處當然係能夠提供一定傾斜度，讓鍵盤打字時候更自然；但 Book Ion 2 的轉軸邊沿係無額外的防滑膠，如果放係玻璃檯面會比較滑。
內部佈局
▲ 一樣採用 13.3 吋超級亮麗的全高清 QLED 屏幕，好 Sharp 好好睇。
▲ 睇翻官方的描述，本 YK 高度懷疑同舊代係同一塊屏幕，依然獲得 VDE 認證 100% 色域空間，亦都有獨立開關額外增加亮度的「戶外顯示模式」；好的設計其實只需要保留就好了，包括 Book Ion 2 呢個超窄邊框的方案。
▲ 遺憾地，一模一樣的模具代表缺點都會帶埋落黎：散熱出風口同樣位於屏幕下方，如果要長時間進行高負載工作，例如剪片工作的話，長噴熱風會影響屏幕的壽命。
▲ 鍵盤佈局係一模一樣無變動，但指紋識別器就「去藍化」，踢走藍色變白色，統一整體「仙氣白」風格。
▲ 指紋識別器解鎖爽快好用，但更重要係 11th 處理器？ NO，隔離 iRis Xe 核顯單元先係令我期待又開心。
▲ 機身左右兩側的 5W X 2 喇叭依舊獲得 AKG 調音認證。
▲ 順滑的大面積觸控板一樣支持 Qi 無線充電，手機放落去就自動充電； 而背光鍵盤手感依然輕巧，打字毫不費力，非常適合女士 / 長時間輸入的操作。
各項性能測試
規格一覽
▲ 手上的 Book Ion 2 採用最新 i7-1165G7 第 11 代 Intel 處理器，雖然同上代一樣只係 4 核心 8 線程設計，但就改用 10nm SuperFin 光刻技術，而且增加到 12MB Smart Cache 快取記憶體。
▲ 內置 16GB LPDDR4x 記憶體；我從不同渠道複檢過好多次，不論是 CPU-Z 和 AIDA64 都顯示記憶體係採用更快的「Quad Channel 四通道」模式，並非一般的「雙通道」。
▲ 最值得關注的當然係踢走祖傳 UHD 核顯，改用全新 Intel iRis Xe 核顯單元，後面有性能測試。
開機速度
▲ 開機只需要 7 秒就完成系統啟動，再過 17 秒時間就完成載入，啓動速度是很快。
綜合性能
▲ 在 Novabench 綜合性能測試中，Book Ion 2 獲得 2111 分，對比上一代只有 1652 分，高下立見；對比分數後發現，不論是 CPU、GPU、RAM 及 SSD 表現，Book Ion 2 都一律大幅升級。
SSD 測試
▲ 照樣配備 512GB 的 NVMe SSD 固態硬碟，但就更換成自家 NVMe SSD，而且今代所採用的是 PCIe 4.0 制式，所以大家見到不論是頻寬和速度都比之前大和快。
▲ 在連續讀寫結果中，Book Ion 2 獲得 6346mB/s 和 4420mB/s 的成績；而多工隨機讀寫 （4K Q32T1）達 398mB/s 和 364mB/s 速度；呢個升級可以話係「大躍進」，嚴重拋離上一代的讀寫表現，特別是連續讀寫速度快幾倍！
CPU 處理器性能
好多人都問 Intel 第 11 代 Mobile 處理器到底係咪真係有進步？ 進步有幾大？ 之前 Intel 10 代所謂的升級嚇死好多用戶，「擠牙膏」都唔知有無擠多 1% 的性能升級。 黎到第 11 代的 i7-1165G7 又如何？
而根據之前 Intel 所提供的資料，其實 i7-1165G7 有兩個版，一個係閹割 15W 省電版，一個係 28W 滿載版，但 OEM 廠商可以自行調整當中的功耗性能。我都會專登跑翻 Cinebench R20 比大家做對比參考，但注意當中 Cinebench R23 的分數結果無法和 R20 舊版進行對比。
▲ 先講 Cinebench R23 版測試中，Book Ion 2 的 i7-1165G7 單核心獲得 1025 分，留意其他跑分結果，不論是 15W 或 28W，單核心分數均好過我手上呢部 Book Ion 2，而且分差達 3 至 5 成咁多。
▲ 而多核心表現獲得 3823 分，分數稍好於 15W 的結果，但對比 28W 測試結果，分數輸接近 3 成咁多；我猜測是因爲考慮到 Book Ion 2 超輕薄的機體，並沒有太大的空間配置更大或額外的散熱風扇，因此出廠時官方可能就決定幫佢調整成預設開唔足火力。
▲ 我地再睇埋 Cinebench R20 的測試結果，i7-1165G7 單核心 418 分、多核心 1351 分；對比翻上一代分別係 300 分和 997 分，哪怕三星出廠壓制功耗都好，可以見到 Book Ion 2 性能提升得相當明顯。
GPU 圖像處理性能
▲ 本 YK 係上面一路讚話 11 代核顯 GPU 單元令人有驚喜，有幾大驚喜呢？在 Basemark GPU 標準測試的 4K Vulkan 1.0 測試中得到 1132 分；對比上一代垃圾 UHD 620 核顯不到 400 分的表現，圖像處理性能係倍級提升！
▲ 而在 4K DirectX 12 測試中獲得 1186 分，睇黎 Intel 今次終於可以一掃過往 GPU 頹風；亦意味住三星 Book Ion 2 會有超級大的 GPU 性能提升，簡單執相剪片絕對無難度。
電力續航測試
▲同上代一樣 Book Ion 2 聲稱內建 69.7Whr 超大電量，亦係三星自家出品的電池；而效能強大左咁多的情況下，一般續航力會弱過上一代的。
▲ 但係 Full Load 測試竟然可以跑出超過 9 小時成績，比舊代多出半小時！ 意味住Book Ion 2 續航力會比上一代更加好，但舊代續航力本身已經夠黐線......
▲ 而利用 Chrome 做播放指定的 720p 解析度 Youtube 影片恆常測試中（亮度最暗、WiFi 附近）； 過了一小時後 Book Ion 2 還有 95% 電量，也就是睇 Youtube 可以睇到接近 20 小時先無電，真係你訓著部機都未訓著呀！
總結
我對 Book Ion 第一代的描述「樣子美麗又持久」，黎到第二代 Book Ion 2 就變成「樣子美麗又持久，效能更強速更快」。
三星最近幾年相當積極佈局筆電市場，次次出超薄機都係樣子型又靚，上代 Book Ion 唔少女網友都「心心眼」佢纖薄但不失堅固的外殼，而 Book Ion 2 延續之前靚爆的外觀設計外，係配色上改爲更統一的純白色調，我攞住出街都覺得自己後生左靚仔左。上一代的優點繼續 KEEP 翻係度，例如 13.3 吋屏幕得 970 克輕巧機身重量，擴充 I/O 接口依舊全數獲得保留。最關鍵係換入性能大幅度升級的 Intel 第 11 代處理器，仲手換埋讀寫速度更快的 NVMe SSD 固態硬碟比你。
如果你本身手機是用三星的話，Book Ion 2 亦保留全套 Samsung 無縫體驗，例如 Samsung Note 一次過同步晒手機、平板、電腦的資料，亦完美支持筆電操作手機。而學生妹最需要的錄音筆記功能，Book Ion 2 都保留晒係度。 仲有一個值得大家關注的獨家預先載軟件 Studio Plus，好簡單就將大量相片、加入音樂、特效玩簡單剪片，隨時製作小影片分享比朋友就簡單得多。
價錢方面 Book Ion 2 代 13.3 吋 i5 版和 i7 版分別係 10800 元和 12980 元，UPGRADE 晒內涵比你但香港 Samsung 竟然無加過價。 而且截稿時，我仲係官網見到做緊限時送 1 年的 Office 365 個人版訂閱同埋一個電腦保護套的優惠 ~