開箱
三星在港推出的 Galaxy Book Pro 其實係兩個版本，一個是 13.3 吋屏幕，另一款自然是 15.6 吋屏幕，而本 YK 手上的是 13.3 吋屏幕。不論兩個型號的機身設計、重量、輕薄程度，都明顯係針對有便攜需求的用戶。
▲ 外盒水印寫住「Galaxy Book」，實際上底部寫的「Galaxy Book Pro」才正確。
▲ 機身纖薄隨之而來的自然是包裝盒都好薄，大大個字寫住「Intel Inside」。無錯，又係第 11 代 Intel 處理器。
▲ 三星爲 Galaxy Book Pro 提供 1 + 1 年保養，頭一年係國際保，之後就係本地保。
▲ 今代 Galaxy Book 系列都採用的迷你 USB-C 充電火牛，完全就係手機火牛的大小，隨身攜帶相當方便。
▲ 雖然牛仔細細，但最高支持 65W 輸出功率！
真機外觀
▲ 金屬外殼加持，面蓋只有雕刻「SAMSUNG」字樣不花巧；而 Book Pro 符合美國軍規 MIL-STD-810G 標準，機身纖薄都唔容易好似 Apple 咁變 「iBend」啊 ~
▲ 機身底部亦相當乾淨，比較明顯的是一列散熱孔；機身重量不到 870 克，而重量分佈相當平均，幾個攞過上手的網友都大讚，話揸住黎佢行走江湖重量相當就手。
▲ 隱約可以見到機身內部的散熱導管和風扇。
▲ 左右底部均有一個外放喇叭，獲得 AKG 技術認證，同時獲得 Dolby Atoms 聲效加持。
▲ 四角均有方形防滑膠，但記得買翻黎之後要將保護貼拆除才會有防滑作用。
▲ 值得留意係 Book Pro 是韓國三星設計、越南組裝生產，絕對係大大加分的優點！
▲ 到底 11.2mm 係乜概念？ 從前面望落去如上圖般纖薄；題外話，其實 15.6 吋版本的 Book Pro 更加黐線，厚度得 13.3mm、重量得 1.15kg，又係一款羽量級筆電！
▲ 機身設計亦無取巧地用視覺效果「偷薄」，你見到從側面望落去都係超級薄，但薄得黎記住佢係通過軍規級標準，呢個工藝技術真心令本 YK 感到驚訝。
▲ 還記得 Macbook Air 賣自己輕薄機身然後取消 USB-A 接口，當時有果粉死撐話薄機身只能有足夠空間提供 USB-C 接口； 唔好意思，三星 Book Pro 完全係啪啪聲咁打面，機身右側提供 microSD 卡嘈、USB-A 接口、3.5mm combo jack 接口。
▲ 黎到機身右邊打多 Apple 幾巴，提供標準 HDMI 輸出，以及兩個 USB-C 接口；而最抵死係 Book Pro 機身只有 11.2 毫米，而 Macbook Air 厚度是 16.1 毫米；明顯地，三星設計的筆電係更人性化，而技術亦明顯技高一籌！
內部佈局
▲ 三星 Book Pro 同樣提供單手揭芒設計，轉軸相當順滑就打開屏幕，可惜無法如其他商務機般做到 180 度攤平屏幕； 但如果你選購 Book Pro 360 的話，唔好話 180 度攤平，360 度變成平板都得（當然會貴千七蚊） ~
▲ 而機身做到咁薄係得益於採用 13.3 吋 AMOLED 全高清屏幕，而邊框設計亦做到接近三邊等窄；屏幕支持類似三星手機的可調整屏幕色溫功能，針對遊戲、電影等個別調整鮮豔度、藍光量等； 當然，AMOLED 天生的燒印和 PWM 頻閃亦無可避免。
▲ 內置 720p 高清鏡頭，配合雙咪收音下開啓 AI 智能降噪功能，是三星近年主打視像會議的功能，Book Pro 作爲高階型號筆電當然都有齊。
▲ 背光鍵盤佈局正常合理，鍵帽面積亦無因爲緊湊的機身設計而縮小，依舊放入大面積孤島式鍵帽。
▲ 鍵帽的塗層提供一層額外的摩擦感，能夠更精準和高效地輸入文字。
▲ 三星稱呼呢個鍵盤做 Pro Keyboard 確實無吹水，按壓反饋相當清晰，而且鍵帽觸感舒服，更重要係如果呢部機帶上床黎打字，訓係你隔離果個都唔覺得鍵盤嘈，明顯係有加入機械緩衝設計以減少打字時候的噪音；呢個鍵盤的質素係筆電黎講完全係超班無得頂！
▲ 玻璃觸控板面積夠大，相當就手順滑，滑到好似摸緊絲綢咁；配合 Windows 10 手勢操作切換效率自然更高。
▲ 專登無撕走個貼紙比大家知道，電源鍵同時提供指紋識別功能。
▲ 驗明正身，三星 Book Pro 係獲得 Intel evo 平台認可的機型，意味住速度、續航力等都會達到 Intel 要求的高標準保證。
各項性能測試
規格一覽
香港行貨推出的 Book Pro 有兩個版本，分別是 13.3 吋和 15.6 吋，而每個版本又提供兩個處理器等級，分別是 Intel 11 代 i5 和 i7 處理器，而本 YK 手上到手的是 13.3 吋 i5 處理器。 而睇過上次 Galaxy Book 的評測，大家都知道唔加 MX450 呢類入門顯卡係更佳方案，所以羽量級 Book Pro 自然以核顯上陣。
▲ 採用 Intel i5-1135G7 四核心八線程處理器，自然係採用 Intel 手上最先進的 10nm 製程。
▲ 而呢款處理器擁有 8MB SmartCache 快取記憶體。
▲ 今次 Book Pro 亦是三星自家定製出品的主機板。
▲ 機身提供 16GB LPDDR4x 記憶體，支持四通道模式。
▲ 既然是 11 代處理器，當然採用熟口熟面的 Iris Xe 顯示單元，自從有左呢個核顯後，Nvidia MX450 就無用武之地了。
開機速度
▲ 開機只需要 6 秒就完成系統啟動，絕對係超快速；再過 17 秒就完成載入程序，果然係旗艦機的體驗，開機速度相當快速。
綜合性能
▲ 在 Novabench 綜合性能測試中，呢部 Galaxy Book Pro 獲得 2046 分，留意同代 i5 的跑分可以打贏 i7 處理器，三星到底點樣調教部機咁黐線？
SSD 測試
▲ 待機狀態下 NVMe SSD 溫度只有攝氏 31 度，採用的是三星自家出品 512GB 固態硬碟。
▲ 在連續讀寫結果中，Galaxy Book Pro 獲得 2189mB/s 和 1257mB/s 的成績；而多工隨機讀寫 （4K Q32T1）達 455mB/s 和 410mB/s 速度，連續讀寫速度對比其他採用 PCIe 4.0 的筆電屬於慢，但日常使用中最影響使用體驗的隨機讀寫，破四百速真心嚇死人。
CPU 處理器性能
Intel 第 11 代處理器的 i7 和 i3 我都實測過好多次，黎到 i5 呢個中階型號的性能又如何呢？ 呢粒處理器支持廠商主動調教 TDP，意味住性能會根據筆電定位進行降頻省電，最好當然係唔好有性能封頂。 而三星呢部 Book Pro 係有一個特殊設計，支持一鍵解鎖性能，意思姐係話，平時省電佢好省電，需要性能一按就爆到比你。
▲ 預設自動模式下，在 Cinebench R23 的跑分結果：單核心 1112 分、多核心 3428 分；三星自家另一款採用 i7-1165G7 處理器的輕薄筆電 Book Ion 2 得分是 1025 分和 3823 分，明顯旗艦機調教得確實係好少少。
▲ 上面測試跑完之後一於唔比佢冷卻，本 YK 立刻打開高性能模式再跑多次，結果係分數相當好：單核心 1274 分、多核心 4092 分，性能瞬間提升屌打埋 i7-1165G7 15W 版！
▲ 我貼多次比大家睇，一鍵解鎖加速就係 F11 按鍵，滿足用戶有臨時簡單剪片或者遊戲的需求。
GPU 圖像處理性能
▲ 在 Basemark GPU 標準測試的 4K Vulkan 1.0 測試中得到 1199 分，符合 Iris Xe 核顯應有的分數；再講多次， Intel 核顯係第 11 代處理器中已經脫胎換骨，同過往 8、9、10 代完全係兩個世界。
電力續航測試
▲ 內建高達 63Whr 電池容量，同樣是自家出品電池，一部 870g 不到的筆電可以有咁大容量電池，宜家科技真係進步得好快。
▲ 在 Full Load 測試中只係得到 3.5 小時的成績，絕對係超級短超級短，原因當然好明顯，三星允許呢粒 i5 提供無鎖性能， CHUR 盡處理器的性能下自然續航力縮短。
▲ 而利用 Chrome 做播放指定的 720p 解析度 Youtube 影片恆常測試中（亮度最暗、WiFi 附近）； 過了一小時後 Book Pro 還有 93% 電量，也就是睇 Youtube 最長可以睇到 14 小時先無電，續航力相當不錯。
自家套件
▲ 好多網友都會問，旗艦定位筆電除了性能強大之外仲有乜特別？ 好似三星咁會提供一整套自家實用軟件，一開箱就立刻用得，對商務人士黎講最有用當然係 Samsung Notes 和 Voice Note ，支持同手機同步以及語音筆記。
▲ 如果你本身用三星手機，配合 Galaxy Book Pro 的同步軟件可以做到更簡單方便的資料傳輸。
▲ 如果偶然要剪下公司活動片，甚至小朋友家庭樂影片，三星都內置左 Studio Plus 比大家簡單方便製片。
結論
三星係筆電市場的佈局越來越完整，而且每一部產品定位相當清晰，更重要的是設計、造工、功能越來越明白消費者真實的需求，本 YK 覺得其他老牌筆電廠商要開始擔心、開始努力了。呢部 Book Pro 完全是三星頂尖技術的示範，超輕薄機體設計但同時提供完整接口，要客戶拖住條 Dongle 真係好唔貼心囉！ 而最令我印象深刻係，極少見到其他廠商會花心思改良充電火牛，細到好似手機 USB 火牛咁，成套野帶出街都唔知有無 1 公斤，呢個先係真正的移動筆電方案。
建議零售價 10280 元起買到 Book Pro 其實唔算貴，限時送一年 Office 365 訂閱，再送真無線藍牙耳機、送套送滑鼠，基本上就係即買、即開、即刻落場用得！ 當然，如果你唔介意多少少 1.04kg 的重量，升上去買 Galaxy Book Pro 360 超旗艦筆電，會多左一個非常適合商用場合的 360 度反轉芒，亦送埋 S Pen 比你觸控書寫，機身同樣係通過美國軍規標準。對於有需要做 Demo 展示的用戶黎講係極大方便和優勢。