開箱
雖然 AVITA LIBER V 係「舊瓶新酒」，但個「舊瓶」造工、質素確實相當之高，接近部分大廠萬元級的質素，特別是從轉軸、外殼可以體驗得到。 而 LIBER V 系列一向玩色，全球高達幾十種配色選擇，今年食埋 PANTONE 年度潮色，在沉寂筆電市場中吹翻少少潮流風。 最緊要係質素好之餘，價錢又唔貴。兩隻 PANTONE 年度潮色「極致灰」和「亮麗黃」本 YK 都成功到手，一齊睇睇先 ~
▲ 上圖的白色彩盒就係安放 LIBER V 本體，配上鐳射「AVITA」標誌。
▲ 機身火牛並無採用最新的 USB-C 接口充電。
▲ 支持定額 19V/2.1A 輸出模式，提供接近 40W 的功率。
真機外觀
▲ 首先係「亮麗黃」，一攞出黎相當搶眼，年輕活力感好強烈啊！
▲ 「極致灰」就截然相反，相當低調，但滲透著少許商務專業的感覺；外殼亦用上堅固的鋁金屬物料，磨砂質感摸落去舒服；「亮麗黃」型號的鋁金屬外殼上加入顏色物料塗層，所以手感完全不同。
▲ 機身底部採用強化塑膠物料，對稱佈局亦相當乾淨。
▲ 你會見到 LIBER V 新版都依然保留呢個人性化的設計，機體可以輕鬆做到單手開合屏幕。
▲ 底部一條長散熱開孔，亦可以見到銅金屬散熱板塊的蹤影。
▲ 另外，底部左右兩個開孔分別是 1W 外放喇叭，實際聽感重低音部分的反饋感比較弱，中頻和高頻部分會更分明； 底部四角亦具有防滑膠，一般室內平面的支撐和防滑均足夠可靠。
▲ 機身重量只有 1.3 公斤，最厚的部分是 17.4 毫米，以 14 吋屏幕類別的筆電黎講，屬於輕量級中的重量級； 但揸上手相當堅固的外殼會令人更加安心。
▲ 轉軸的設計與蘋果的 Macbook 系列相當似，但開蓋的順滑程度比 Macbook 更穩定和舒服。
▲ 但同 Macbook 一樣開合角度都係無法做到商用機 180 度攤平，最大角度如上圖，適合一般室內平面坐檯的空間使用。
▲ 機身左側接口有：安全鎖、USB-A 3.0、3.5mm 耳機口和 microSD 卡槽。
▲ 而右側分別是：充電指示燈、充電口、另一個 USB-A 3.0、USB-C 3.1（支持 PD3.0 充電和影像輸出功能）、全尺寸 HDMI 接口，足夠應付一般家庭和辦公室需求。
內部佈局
▲ 輕鬆單手開蓋後就見到內部佈局，鍵盤面板亦係採用鋁金屬，能夠提高手枕位的堅固度和耐用性。
▲ 採用全高清 16:9 IPS 防眩光屏幕，可視角度達到 178 度；呢種磨砂係人性化設計，比普通亮面屏幕能夠減低更多眩光，可以舒緩對長時間用電腦的眼部不適。
▲ 屏幕上方除了提供視像鏡頭之外，亦具有雙收音 MIC 設計，強化視像會議時收音的效果。
▲ 新版 LIBER V 亦保持三邊超窄邊框設計，並且配上緩衝膠條，可以更好地保護屏幕和鍵盤。
▲ 屏幕下放會見到低調的凹刻「AVITA」標誌。
▲ 內部鍵盤的佈局如圖，見到超大面積的觸控板。
▲ 如果係「亮麗黃」的型號，鍵盤面板 + 觸控板都會變成黃色，「黃 + 黑」確實相當型仔！
▲ 從呢個角度就可以見到「黃色顏料」其實係鋁金屬外殼的表面。
▲ 評測型號係採用 Intel 第 11 代 i5 處理器，所以就會有張相應的貼紙。
▲ 機身亦內建指紋識別器，支持 Windows 系統快速登入；而細心觀察會見到，指紋識別器其中一個方向特意做斜面，用戶快速按壓抽手之後，亦不會被金屬殼邊沿刮傷。
▲ LIBER V 鍵盤依然具備二段式背光功能；而電源鍵和 Cap Lock 指示燈亦獲得保留。
▲ LIBER V 的鍵盤係我打過咁多部千元級筆電中最好打的一部：按鍵深度足夠，而且得益於鍵盤下具有穩定板設計，用力打落去鍵盤唔會浮動，增強反饋感之餘，亦提供輸入的速度和準確度。如果你係需要一部價錢唔貴，但極度注重輸入體驗的筆電，不妨去試玩下 LIBER V 個鍵盤，絕對會「打字打上癮」。
各項性能測試
規格一覽
LIBER V 新版採用的是 Intel 11 代處理器，而你會發現市面上甚至官方網站依然做緊 10 代處理器的減價優惠，記得唔好買錯版本喇！ 而今次 YK 到手的係 i5 處理器的型號，另外有 i7 版本，原先建議零售價係 6990 元和 8490 元。 但官網暫時提供「期間限定」優惠，5990 元就買到 i5 版本（8GB + 512GB）。
▲ 採用 Intel i5-1135G7 四核心八線程處理器，採用 Intel 最新的 10nm 製程技術。
▲ 處理器擁有 8MB SmartCache 快取記憶體。
▲主機板廠商和 BIOS 供應商都係 AVITA 自己。
▲ 機身提供 8GB LPDDR4x 記憶體，支持四通道模式。
▲ 採用核顯單元 Iris Xe 圖像處理技術，相信大家都唔陌生了。
開機速度
▲ 開機需要 9 秒就完成系統啟動，絕對係快；再過 18 秒就完成載入程序，呢個速度對比同價位產品而言可以稱得上非常快速。
綜合性能
▲ 係預設狀態下進行 Novabench 綜合測試，手上呢部 LIBER V 獲得 1843 分，整體分數明顯是被硬碟分數「拉低」左。
SSD 測試
▲ 因爲機身採用的並非高速 NVMe SSD， 而是 SATA 制式；而呢款 FORESEE SSD 係來自中國「江波龍」旗下的品牌，而「江波龍」就是幾年前收購 Lexar 大廠的企業。
▲ 在連續讀寫結果中，LIBER V 獲得 552mB/s 和 523mB/s 的成績；而多工隨機讀寫 （4K Q32T1）達 220mB/s 和 224mB/s 速度，日常使用中你會覺得佢比一般機械硬碟電腦快，但更好的速度體驗固然係 PCIe SSD 喇！
CPU 處理器性能
第 11 代 Intel 處理器一直都同各位網友測試過好多部機，而 i5 呢粒處理器，都支持廠商自行調教 TDP 而決定實際性能。 到底 AVITA 會點樣設定 LIBER V 新機的效能呢？ 我地一齊睇睇跑分數據。
▲ 預設狀態下在 Cinebench R23 的跑分結果：單核心 1289 分、多核心 3551 分；分數對比上一部同大家評測過的三星 Galaxy Book Pro 稍高，估計係得益於機身厚度留有更大的散熱空間；但留意到 MR Ratio 連 3 都達不到，說明性能上依然被壓制住。 無辦法喇，呢個係輕巧機的宿命 ~
GPU 圖像處理性能
▲ 在 Basemark GPU 標準測試的 4K Vulkan 1.0 測試中得到 1067 分，符合 Iris Xe 核顯應有的分數。
▲ 而 Basemark GPU 標準測試的 4K DirectX 12 測試中得到 1103 分，再次印證 11 代處理器的核心顯示單元擁有滿足日常基本用途的性能。
電力續航測試
▲ 內建約 37 Whr 的電池容量，作爲一部 14 吋屏幕的筆電黎講電量係過少，特別是以移動工作爲重點需求的場景黎講。
▲ 在 Full Load 燒電測試中只係得到 3.5 小時的成績，時間係非常短，但面對 37Whr 的電量都係預期之內。
▲ 而利用 Chrome 做播放指定的 720p 解析度 Youtube 影片恆常測試中（亮度最暗、WiFi 附近）； 過了一小時後 LIBER V 還有 86% 電量，也就是睇 Youtube 最長可以睇到 7 小時就無電，續航力一般，距離官方聲稱的最高長達 10 小時依然有一段距離。
結論
升做 11 代處理器後，性能提升相當明顯，加隻滑鼠輕度打機如英雄聯盟低效模式都相當流暢。 但講到配色上，官網玩不定期補色，本 YK 就最愛「無限黑」，四塊面板都係黑色夠晒低調。 而 2021 年度色黎講，黃色絕對係 THE BEST 搶眼。AVITA 係筆電市場上玩味感最濃厚的品牌，經常推出相當有驚喜的筆電，特別係外觀相當特別又出衆。
LIBER V 定位上相當適合作爲都市蝸居台機替代品，閒置狀態可以融入家居成爲潮品裝飾，用佢的時候好打到喊的鍵盤、舒適的屏幕、超大塊觸控板都會讓你有更好精神狀態捱到收工！ 固態硬碟未有採用最新的 NVMe SSD 卻係最大的遺憾，但實際操作上你又唔會覺得慢，因爲慢極都係讀寫破百，一般文書、上網、睇片用途唔會有好大分別。 港幣六千有找可以買得到「紅點產品設計大獎」加持的筆電產品係相當吸引。