真機外觀
當初無點留意 AVITA MAGUS 14 正式登錄香港，原因係見到官方宣傳圖仲以爲係普通平板電腦，點知有日朋友問起話未見過咁有趣的產品，先知道原來係特別野黎。 機身厚度有成 16mm，對比其他 Windows 平板電腦厚成倍！ 但個芒又有 14 吋咁大，而且鍵盤又可以隨拆隨裝黎用，到底呢種有趣 「FormFactor」係乜體驗呢？。 最重要係價錢吸引，平少少的型號係 3990 元（Intel Celeron N4020），貴版本係 5490 元（Intel i3-10110U）。 但其實官網已有折扣優惠，3290 元就可以入手到 N4020 處理器 + 8GB RAM + 128GB SSD 的型號。 姐係你張消費券加幾百就買得到了。
▲ 機體攞出黎已經覺得相當特別，已經可以見到大大隻支架；，官方稱呢種配色「壯麗紫」，其實係噴漆塗層仿金屬質感，不同光線下會有少許漸變效果，確實好吸睛。
▲ 網友可能未必即時理解得到 MAGUS 14 的結構：紫色的部分以及下方黑色的組件，其實係物理上一體化不能分拆。 紫色外殼覆蓋的是主機板、電池、處理器等零件，而黑色部分主要是觸控屏幕，是相當罕見的設計。
▲ 支架部分最大開展角度如圖，能夠達到 90 度；支架上亦備有兩塊防滑膠，提醒相當穩定的防滑效果。
▲ 機身側面分爲兩部分，其中黑色屏幕組件側面分別是電源燈、電源鍵及音量鍵。
▲ 紫色外殼部分，則提供全尺寸 HDMI、USB-C、USB-A 和充電口。
▲ 仲未夠，MAGUS 14 的支架底部隱藏另一組 USB-A、microSD 卡槽（支持最高 256GB 容量）和3.5mm 耳機口；以今日筆電或平板電腦標準黎睇，呢部機的 I/O 接口相當豐富。
▲ 機身後方頂部具有大型散熱出風位，允許機內散熱風扇吹出熱風。
▲ 眼利的網友可能已經發現，MAGUS 14 機身底部具有 4 PIN 金屬接點，能夠以微磁吸的方式外接專用鍵盤。
屏幕本體
▲ 老實講，MAGUS 14 呢塊全高清觸控芒真係令人又愛又恨：市面上你想問 14 吋大芒平板？ 我一時間都想不起。
▲ 但令人恨的地方係，屏幕所採用的技術明顯是以前「台灣牌子平板電腦」果種「空氣層」技術，屏幕表面偏軟，與顯示面板亦具有一段距離，這種情況下是不利戶外高光的環境；亦因爲屏幕軟身的關係，你如果係光亮度高的地方，會好明見到屏幕表面似波浪咁，未必人人能夠接受到。
▲ 但幸好此機如果用途係定位室內的話，本身個芒亮度相當足夠，實際感受係色彩表現唔刺眼好舒服，收工翻屋企床上睇片係相當正。
鍵盤合體
▲ 官方原裝鍵盤採用短絨面方案，所以係會比較容易整污糟。
▲ 雖然叫做外置鍵盤，但佈局大小合理，係屬於正常 14 吋筆電應該有的佈局。
▲ 按鍵手感出乎意料地好，打字爽快程度甚至比某 Windows 平板鍵盤仲要好打！
▲ 觸控板塗層物料順滑，橫長形設計亦有助 16:9 橫型芒上獲得更佳的滑鼠定位效果。
▲ 鍵盤亦可以透過磁條進行二段式角度調整：一係躺平、一係起角，視乎用戶對打字手感的要求。
▲ 如果從側面睇就好似上圖對比，一個具傾斜度，一個可以貼平檯面黎用。
外購觸控筆
▲ 鍵盤就係跟機送埋，而 AVITA UBIQUE ST01 觸控筆係需要獨立買，官網顯示售價 119 元。
▲ 打開筆蓋會見到類 Adonit 設計的圓盤觸控盤，設計上聲稱會比一般電容觸控筆更準確。
▲ 另一邊係粗頭導電布觸控筆；而實際體驗中，呢個布頭好舒服，好過上面圓盤筆頭，因爲 MAGUS 14 屏幕屬於軟膠物料，膠對膠摩擦系數提升，流暢度表現一般。 但導電布頭接觸面積大，提高屏幕觸控的敏感度之餘，摩擦系數亦非常低。 大大力點擊屏幕亦準確無誤。
各項性能測試
規格一覽
AVITA MAGUS 14 規格上不強勁，你見到兩款型號選擇都係屬於入門型處理器，分別 Intel Celeron N4020 和我手上持有的 i3-10110U。 而如果你只係需要普通上網、大芒睇片、收發電郵玩小遊戲的話，呢個年代已經無乜處理器滿足唔到你要求喇。 所以，睇預算做人 ~
▲ 本 YK 手上持有的版本是採用 Intel i3-10110U 雙核心四線程處理器，沿用 Intel 舊代 14nm 製程技術。
▲ 今次主機板自己搞，而 BIOS 改爲委託美方工廠製作。
▲ 不論是什麼版本的 MAGUS 14 一律採用 DDR4 8GB 記憶體並支持雙通道模式！
▲ 入門規格筆電自然採用內置 GPU 顯示單元。
開機速度
▲ 開機需要 13 秒就完成系統啟動，速度一般；再過 17 秒就完成載入程序，剛好達到「30 秒」開機的要求。
綜合性能
▲ 預設狀態下進行 Novabench 綜合測試，得分 1058 分，整體分數符合規格應有的表現。
SSD 測試
▲ MAGUS 14 沿用 SATA 制式 SSD 設計，來自中國品牌 FORESEE 的產品。
▲ 在連續讀寫結果中，MAGUS 14 獲得 554mB/s 和 512mB/s 的成績；而多工隨機讀寫 （4K Q32T1）達 116mB/s 和 195mB/s 速度，速度表現足夠應付日常輕度文書用途。
CPU 處理器性能
▲ 老實講， 入門機其實無乜性能測試要求，畢竟是價格和性能的妥協，但 MAGUS 14 表現依然相當不錯，係 Cinebench R23 的跑分中獲得單核心 1015 分、多核心 1702 分； 而 MR Ratio 是 1.68x，意味住預設狀態下多核心性能有少許減弱。
GPU 圖像處理性能
▲ 在 Basemark GPU 標準測試的 4K Vulkan 1.0 測試中，MAGUS 14 憑着老朋友 Intel UHD Graphics 獲得 348 分； 但呢粒處理器原生支持 4K 60Hz 解碼，睇靚片毫無難度。
電力續航測試
▲ 跟機火牛輸出模式19V/2.1A，只有 40W 不到的功率。 但實際上寧願要細唔要大，後面本 YK 會再解釋。
▲ 內建約 37 Whr 的電池容量，以 14 吋普通筆電黎講當然屬於少；但需要注意是 i3 版本的 MAGUS 14 才擁有 37Whr 容量；如果選擇 Celeron 處理器版本的話，降低到只有 24Whr 電池。 到底 AVITA 玩緊乜呢？
▲ 在 Full Load 燒電測試中獲得超過 6 小時的成績，呢個 37Whr 容量黎講算係好表現。
▲ 利用 Chrome 做播放指定的 720p 解析度 Youtube 影片恆常測試中（亮度最暗、WiFi 附近）； 但今次我掛住睇電影，睇左 2.5小時先記得自己做緊電量測試，但 MAGUS 14 竟然仲有 74% 電量！ 姐係話，如果你睇 Youtube 極限可以睇到最長可以睇到 9 小時！ 有少少出乎意料。
結論
最近幾年筆電市場中，AVITA 算係創意十足的廠商，今次部 MAGUS 14 外觀設計深得本 YK 歡心，功能性導向相當強，能夠勝任家庭娛樂機或桌面電腦副機等用途。 本 YK 傾向拆走鍵盤，改用 Windows 10 內置觸控式鍵盤配觸控筆，機身佔據檯面空間就極少，而且最得意係佢可以當大型相架，14 吋屏幕開住個幻燈片模式，自己會係咁 LOOP 家庭相，放係客廳成爲裝飾品一部分。機身 1.4KG 在室內短距離移動亦毫不費力。
對比普通平板電腦，MAGUS 14 卻擁有相當齊全的 I/O 接口，要 HDMI 出大電視佢得；要插 HDD DOCK 佢又得；上床放餐盤桌睇片又得；要開工做野就插翻個鍵盤落去好打好用，成隻鐵甲萬能俠咁。目前用落都相當爽，美中不足當然係軟身的空氣層屏幕，最希望係可以改用磨砂面觸控版，但成本又肯定會高一大截。 我都知無野係完美，價格妥協下搵到適合自己用的產品就當贏左喇！