真機上手
雖然 ASUS 官方叫佢做「ASUS Chromebook Detachable CM3」，但實際上是 TAB 也是 BOOK，是 TABLET，也是 Chromebook！ 媽呀~ 真係好混亂。 但呢部機係我短短試用幾日已經愛不釋手，因爲完全係 HIT 中晒生活上的工作和娛樂需求，一部機搞掂晒。 先講價錢先，建議零售價 3998 元，包左原裝鍵盤套以及原裝觸控筆，無任何配件係需要你額外再配再課金，一個價錢已經包晒架喇。 但令人費解係一部咁鬼正的產品，香港 ASUS 竟然靜悄悄、極度低調地係 11 月頭就開賣左。 如果唔係橙店朋友同我講，我絕對會錯失呢部好機！
▲ 一黎就比大家睇個完全體：原裝磁吸鍵盤套、支架蓋、機身本體。
▲ 但事實上 CM3 係三件頭，鍵盤和支架蓋均可以隨你喜歡拆開黎用，要套定要蓋隨你自由選擇。
▲ 本來以爲又係千篇一律的 ALL BLACK 風格，殊不知原來上下飾面係牛仔布風格的防污物料，沉穩得黎多一絲潮流的味道。
外觀設計
▲ 正面等寬邊框內藏 10.5 吋、解像度達 1920 X 1080 的 16:10 比例觸控屏幕，難得的係屏幕通過 Pantone 色準認證。 而事實上呢塊芒睇電影相當舒服，完全唔刺眼、顏色唔味精。
▲ 正面仲有一個 200 萬像素前鏡頭，比你用黎開視像會議用。
▲ 機背採用一體成形礦灰色鋁金屬製成，揸落去相當堅固可靠；磨砂質感亦相當舒服，缺點當然係容易上油污。
▲ 機背另設 800 萬像素主鏡頭，一般用黎影下文件都有足夠解像度。
▲ 機頂有兩個獨立收音咪外，同時亦係收發無線信號的位置。
▲ 機身側面有獨立電源鍵和音量鍵。
▲ 機身另一側備有電源指示燈、USB-C 充電和數據口，可透過 OTG 轉接器讀取 USB 手指或小型外置硬碟； 仲有一個相當實用的 3.5mm 耳機接口，比你自己一個戴耳機睇 AV 而不騷擾其他人。
▲ 機身底部就是 5 PIN 金屬接點，透過磁吸方式接上官方專用鍵盤。
▲ 至於 ASUS 專用觸控筆就隱藏係機身筆槽內，書寫觸感當然沒有 Wacom 級的順暢。 雖然官方無列明詳細規格，但專用觸控筆具備壓力感應，可以做到簽名筆觸粗幼變化的效果。
▲ 筆本體需要充電，插落筆槽就會自動充電，官方宣稱充電 15 秒就可使用長達 45 分鐘。
▲ ASUS 觸控筆具備防呆設計，只有一個方向能順利插入，其他方向都會像上圖一樣被頂而無法入槽。
配件組合
CM3 獨特的地方在於配件，當你實際用落去的時候就會發現，不論是鍵盤和保護蓋、甚至係觸控筆等各種細節，設計上配合得天衣無縫。特別是非常實用又具創意的保護蓋。
▲ 裝晒鍵盤、套、筆，連同機體的實測總重量只有 915g 左右，不足一公斤的重量有利於便攜性。
▲ 保護背蓋採用磁吸附設計，只需要貼近機身就會自動被吸住，而且吸力相當強勁可靠。
▲ 特別的是，背蓋作爲機體支架卻支持雙向直立模式。
▲ 坊間一般放置於平面上的狀態（如上圖）是橫向 16:10 比例，適合一般睇電影、以及文書編輯之用。
▲ 但特殊支架加持下，CM3 卻能人所不能做到直立支撐；呢個模式適合閱讀 PDF、瀏覽網頁，直身方向能一眼睇到更多的內容，唔需要係咁碌呀碌。 本 YK 期待已久的平板閱讀體驗，在 ASUS CM3 上呈現得相當完美。
▲ 機身頂部兩個外放喇叭剛好無遮無擋，市面上大部分平板電腦在橫向模式下，未有考慮用家左右手緊握會遮擋到喇叭口，但 CM3 的兩個外放喇叭剛好放在頂部無遮無擋。
▲ 耳機孔和 USB-C 充電口的位置亦明顯係有用腦思考過，插住耳機同電線黎聽歌睇戲，就唔會出現「吊吊揈」半天吊的問題！
▲ 支架最大開合角度如上圖，鍵盤亦具有 ErgoLift 傾斜 6 度的設計，另輸入手感能獲得更強的回彈觸感。
▲ 鍵盤屬於標準 Chromebook 佈局，傳統上 Fn 功能鍵變成特定的功能快捷鍵。
▲ 鍵盤面積對於大手人來講是需要時間適應，畢竟只有 10.5 吋芒的面積，鍵盤想做大佢都係無乜可能；但保留 1.5cm 鍵程深度，整個輸入體驗尚算良好，適應大約半小時後，打字準確度亦恢復正常。
▲ 觸控版面積適中，支持多點觸控的操作方式； 面板加入磨砂質感塗層，能減低手指移動時摩擦力的差異，從而提供一個更穩定、順滑的滑動體驗。
▲ 原裝附帶的 45W 小型 USB-C 火牛（港版會是英規三腳），自動切換 4 種充電模式，帶出街都相當輕巧。
系統體驗
其實 ChromeOS 已經推出左好多年，而系統一路都升級緊。 黎到現今的 ChromeOS 已經可以支持安裝 Android Apps、使用 Linux 環境、以及離線使用的體驗都相當好。 本 YK 係呢度會就住系統使用上的一些特點以及注意事項，向大家逐一分享。
▲ 最多人問過的問題係，ChromeOS 輸入法體驗如何，上圖已清楚列出原裝內置的輸入法。本 YK 有將近 10 年時間都係採用 Chromebook 作爲寫稿的工具，作爲打字機佢係相當稱職。
▲ ASUS CM3 原生支持 Play Store 商店（其實新機 99.99% 都支持架喇！），只需要啓動和安裝 Google Play 服務後，就可以登入 Play Store 安裝 Android Apps 架喇！
▲ 同時間你可以啓動各種通信應用程式，而上述所見的應用程式皆是直接透過 Play Store 安裝。
▲ 但如果你有用 Signal 這款通訊軟件，遺憾地暫時不支持 ChromeOS 系統，只能利用 Linux 環境指令手動安裝桌面版的 Signal 軟件。
▲ 啓動 Linux 環境需要額外空間進行安裝適配，而這個過程係一個漫長的等待。。。
▲ 另一個多人問的問題相信係 Microsoft Office 的應用，原則上是不支持安裝（如上圖），但你可以透過 Office 365 的網頁版進行直接編輯； 又或者嘗試安裝 APK 封包、甚至透過 Linux 環境安裝 LibreOffice 等第三方編輯軟件。 當然喇，呢類方法都唔係普通人識玩。
▲ 而需要留意的是，ChromeOS 原生係不開放 APK 封包的安裝；如果要安裝就需要 unlock 成爲開發者（免費），機內資料會重新清洗一次，詳情大家自行 Google 或個別詢問。
觸控筆夠方便
平日本 YK 會使用 Office 365 配合 OneDrive 進行批改 PDF 檔案，用筆黎批改絕對係最方便的方案。而 CM3 的觸控筆雖然唔係原生支持 OneDrive 直接批改（S 記平板電腦係可以用 Apps 直接批改存檔），但熟悉流程後用落去都相當順手。
▲ 在網頁上打開 OneDrive 的 PDF 檔案，可以選擇左上角直接開啓。
▲ Chrome 瀏覽器本身就係一個 PDF 閱讀器，在新的 Tab 分頁內選擇右上角「筆」按鈕就可以批改檔案了；大家見到上圖示範，各種顏色、粗幼度的筆觸，熒光筆當然都有，能滿足一般文書的需求。
▲ 如果你要開視像會議，觸控筆仲可以有 Laser Pointer 的功能。
▲ 如果文字太細，CM3 的觸控筆亦有電子放大鏡功能。
▲ 但要留意 PDF 作出修改後，不具備任何自動儲存能力，離開網頁會顯示警告字句。
▲ 這個時候記得選擇儲存包含你所做的變更，然後呢個被修改過的 PDF 就會儲存在機體內，不會自動更新 OneDrive 內的檔案，而 PDF 檔案一旦被修改及儲存後就無法復原。
性能測試
▲ 至於 CM3 的性能，呃，其實 Chromebook 係唔講硬件性能；不過 CM3 所採用的 MTK Kompanio 500 （MT8183）八核心處理器，Geekbench 5 跑分結果只是對標高通 S660 處理器。 而超大 128GB eMMC 空間和 4GB RAM 配置，應付細食的 ChromeOS 系統已經屬於豪華規格。
▲ 在 Androbench 測試中，連續讀寫速度破百，但隨機寫入速度比較慢，只有 15.3MB/s 的速度； ChromeOS在「入門硬件」中依然跑得相當流暢，只有進行高密度多工切換時（例如安裝 Apps 同時又跑 Online Office）才會感受到系統反應遲滯。
▲ 透過播放 720p 的 Youtube 影片進行續航力測試（最低亮度、關閉喇叭、採用 5GHz WiFi 連接），經過 70 分鐘後只消耗 8% 電量， 意味住齋睇 Youtube 最多可以獲得超過 14 小時的續航力，比官方宣稱的 12 小時還要多！
與 Android 手機互動
▲ 目前 ChromeOS 原生已可透過藍牙無縫連接你的 Android 手機。
▲ 其中一個最大的作用係，提醒你手機上顯示的信息通知。
▲ 例如好似上圖咁，會彈出 Whatsapp 的信息通知，你亦可以直接回覆信息。
▲ 而系統亦支持手機在附近即解鎖 Chromebook 的 Smart Lock 功能、亦可以透過手機分享數據網絡等功能。 如果你喜歡電腦和手機有更多的互動，這套功能會令你用 Chromebook 時更得心應手。
結論
相當喜歡用 CM3 作爲日常的出入工具，而 Google Chrome 插件是可以直接在 ChromeOS 上使用，這一點是其他平板電腦無法給予的優勢。 平日主力收發電郵、線上編輯 Word 和 Excel 數據、用觸控筆直接批改和簽署文件，這些工作對於 CM3 黎講係綽綽有餘、流暢無比。而一條友邊食飯邊睇片確實係好爽，收工係車上睇書都清晰舒服。
買平板電腦最重要係認清自己的用途，因爲唔係隻隻系統都可以滿足你的工作用途和娛樂需求。 ChromeOS 係一開箱登入 Google 帳號就用得，無其他複雜野要搞。 輕巧、長氣、齊件，再加上 CM3 造工和功能都相當好，香港 ASUS 肯靜悄悄地引入呢部變形平板絕對係用家福音 ~