PlayStation VR 不用版主多說，大家都知道係乜東東，所以閒話少說，講左價錢先最實際！PlayStation VR 將於 10 月 13 日正式上市，並於明日起 (29/7) 開始接受預訂，淨頭戴裝置的賣價就 HK$3180，但你都無理由淨買頭戴唔買攝影機，所以如果買哂兩樣野，賣價則為 HK$3480。（手掣呢？香港暫時似乎未有消息，一有消息會為大家補上）如果你本身屋企有 PS4 的話，當然最好，不用另外買，但如果你無 PS4 的話，出面細舖買行貨價，都係大約二千四左右，加埋六千有找。這個價錢，我會覺得比 HTC Vive 更抵玩。
或者有網友會質疑：邊有得比，HTC Vive 的像素又高過 PlayStation VR，而且如果你買一部硬件強大的電腦，遊戲體驗仲會更佳添！但有無諗過，淨係 HTC Vive 已經八千幾蚊，仲要一部打機勁嘅 PC，加埋真係唔少野，差不多成兩萬蚊。相比之下，版主覺得始終都係 PlayStaiton VR 最划算。
重溫一下 PlayStation VR 的規格配置先，PlayStation VR 頭戴裝置的機身尺寸約 187 x 185 x 277mm，而處理器則約 143 x 36 x 143mm，淨 VR 頭戴裝置 (不包括電線) 重約 610g，配備了 5.7 吋 OLED 顯示，解像度有 1920 x RGB x 1080 (左右眼各顯示 960 x RGB x 1080)，視角更約 100 度，內置 6 軸測量系統。隨機附有處理器、VR 頭戴裝置連接線、HDMI 線、USB 線、耳機、電源線以及 AC 變壓器各一。唔知網友又點睇呢？