香港行貨一年保養，原生 Google 支援
同上次的台電平板一樣，今次介紹的馳為 V89 同樣有香港代理，買機都係有一年的保養，所以大家都係不用擔心買完壞左唔知點算這個問題。而另一個香港行貨的好處就係在於有 Google 服務。再來就簡介一下 V89 的規格，除左支援 3G 上網外， V89 亦配備左 8.9 吋 1920 x 1200 IPS 屏幕、 Intel Z3735F 支援 64bit 的 四核 1.83GHz 處理器以及 2GB RAM 和 64GB 內置容量（支援最大 64GB 記憶卡） 。相機就有 500 萬像素主鏡頭，電池量為 6400mAh 。外型方面實在係 V89 的弱點之一，係造功方面即使以大陸平板來計都唔算高水平，例如上次向 iPad 「致敬」的台電平板都比 V89 「硬淨」。而重量方面 V89 重 360g 拎上手感覺不算很重。
至於大家最關心的價錢又如何呢？相比上次賣價超過兩千蚊的台電平板，今次馳為 V89 相較之下吸引力是比較高的，賣價為 $1699 ，而更重要係買平板會送官方的藍牙鍵盤！（即係上圖果個鍵盤）雖然版主試用過就覺得略嫌有點細，不過免費送又係原廠出，無疑係有吸引力呀。
▲ 機盒會有鐳射貼紙標明為行貨。 機盒內附有 OTG 線、 USB 線、保養卡以及 SIM 卡針，充電器另外會送。
▲ V89 外型普通，沒甚麼特別之處。
▲ 用手指按壓機背會發電內裡有不少虛位，反映了造工的不足，另外行貨 V89 在機背也有鐳射貼紙。
▲ USB 插口以及聽筒位於機頂，而開機、音量按鍵、 Micro SD 及 SIM 卡槽都在機身右邊。
▲ V89 的 SIM 卡槽需要用 Mirco Sim ，支援 3G 上網及通話。
▲ 1920 x 1200 屏幕的細緻度是令人滿意的，放大看亦未見有「狗牙」的情況。
▲ 可視角度亦在可接受水平，低角度看光度未見有減弱。
支援 Android + Windows 8.1 雙系統！ 一鍵切換解構
相信大家都知道雙系統平板的原理就係在 Windows 系統上載入 Android ，而一鍵切換又係咩一回事呢？在馳為平板上的一鍵切換其實只係在 Windows 以及 Android 系統上加入捷徑去轉換 OS 。同上次台電平板不同， V89 係開機後預設係要開啟 Windows 系統的，用家若要轉換 OS 就需要係桌面揀選一個名為「InsydeQ2S」的軟件再進行設定。而進行所謂「一鍵切換」就係將 V89 重新開機再進入另一個系統，所以雙系統實際上都係獨立運作而無互通性的。至於 V89 的內置容量分佈又係點呢，同其他雙系統平板一樣， V89 的 64GB 內置容量係分割成兩半比兩個系統使用的。係 Android 方面 V89 一開始有 10.52GB 可以使用，而係 Windows 系統方面就有 35.5GB 可以使用。整體來講兩個系統的內置容量比起上次的台電平板都多唔少，而今次的馳為 V89 同樣支援最大 64GB Micro SD 卡，相信勉強夠一般用家使用吧！
▲ 用家可在「InsydeQ2S」程式中就設置一鍵設定的功能，例如在 Dock 中加入一鍵切換快捷鍵。
▲ 在 Android 方面，用家只需拉出 Notfiication bar 就可見一鍵設換的快捷鍵。
Android 方面使用原生 Google 介面！Windows 預載 Office
同一般大陸牌子愛用自家介面不同，馳為的 V89 只係用返普通的 launcher ，所以係有 app drawer 的，軟件版本就係 Android 4.4 。因為原生已有 Google service 的關係，不止 Google Play Store ，連 Google Now 等 Google 軟件亦一應俱全。至於係 Windows 方面，版主初步試用感覺 V89 行 Windows 系統都算係順暢的，而且 Office 亦可以免費安裝，但需要用家網上登記再下載返 Office 啟動軟件。唯一要講的問題係 V89 始終只係得 8.9 吋的屏幕，版主個人就覺得這個屏幕尺吋使用 Windows 8 系統不算很方便。
▲ V89 只是用最簡單的 Android 原生 Launcher ，但勝在可用到 Google 軟件例如 Google Now ，原有 10.52GB 可以使用。
▲ 而 Windows 系統方面，V89 用上 Windows 8.1 系統，原有 35.5 GB 可用。
V89 效能測試，安兔兔跑分優於 S600 水平
係效能方面，馳為 V89 所用的 Intel Z3735F 四核處理器以及 2GB RAM 這規格其實同早前的台電 X98 Air 屬於同一水平。用過安兔兔、 Quadrant Standard 同埋 Basemark 2.0 測試之後，結論都係整體表現普通，並唔太差亦算唔上出色，比 Qualcomm S600 處理器出色一點但未達 S800 的水平，而且在 3D 表現方面亦比較弱。當然以普通使用體驗來說， V89 表現版主都覺得是可以的，上網及開啟 app 的速度也不會令人覺得很慢。
▲ 在 Quadrant Standard 上 V89 得分為 15696 ，而安兔兔方面得分為 30604 ，介乎 LG G3 以及 HTC ONE M7 之間。
▲ Basemark 來講，V89 得分為 37fps ，理論上玩 3D 遊戲勉強可以應付。
版主小結：$1699 行貨性價比不錯，雙系統將成國產平板主流？
初步試玩過之後版主覺得今次的馳為平板係性價比方面尚算係不錯的，二千蚊樓下相信都乎合不少朋友的心理價位，二來 V89 不止有雙系統而且又有 3G 可以通話及上網，而且原生對 Goolge 的支援又是一般大陸水貨平板所缺乏的。版主係上次為台電 X86 Air 開箱時都提過，某程度上雙系統只係一種噱頭，實際作用未必如大家所想像，這評語其實也可以套用在 V89 身上，雖然有一鍵切換功能總比不支援一鍵切換的雙系統平板方便，但配置亦局限了 V89 使用 Windows 系統時的作用，要做效能要求較大的 task 仍然會有難度的。但如果換個角度睇，將 Windows 系統當作係一個 Bonus ，將 V89 視作一部可以用 sopcast 或者 Acesteram 睇波（雖然 Android 系統都可以做到，但無咁方便）同埋可以用 Windows Office 的 Android 平板， $1699 這個價錢不知大家又覺得點呢？
▲ 如果覺得 V89 用 8.9 吋芒太大又想用到雙系統的話馳為另一部平板 Vi8 可能也是一個可以考慮的選擇。在硬件規格上除了 8 吋 1280 x 800 IPS 屏幕外，亦有 Intel Z3735F 支援 64bit 的 四核 1.83GHz 處理器以及 2GB RAM 以及 32GB 內置容量，（支援最大 64GB 記憶卡） 。相機就有 200 萬像素主鏡頭以及 30 萬像素前鏡頭，電池量為 5000mAh 。可見在規格上是稍低 V89 一級的，而價錢當然亦較便宜，賣價為 $1099 。