唔使 Adobe Photoshop！Apple 傳會推出新「相片」App 加入生成式 AI 圖像編輯功能

左定坤 (Cho Ting Kwan) 2024-05-07 15:14 | Apple

市場上有好多手機品牌，都會將 AI 當成賣點，而真係比較貼地，適合大部份人使用的 AI 功能，應該係圖像編輯嘅功能，就好似 Google、三星等等，就有一些例如魔術橡皮擦的功能，可以幫助用家將相片中一些多餘的人或物，透過 AI 移走，並自動生成背景，令相片不像被編輯過的樣子。最近有傳聞指出，Apple 都會推出全新的「相片」App，會加入一些生成式 AI 圖像編輯功能，挑戰三星、Google 等對手。想知詳情，睇下文啦！



根據外媒 AppleInsider 表示，Apple 網站上的新預告片中，暗示佢哋可能會推出全新版本的「相片」應用程式，而呢個全新嘅「相片」App 將會利用生成式 AI 為普通消費者提供一些 Photoshop 級嘅編輯功能。

Apple 或會推出全新「相片」AI 編輯功能

Apple 網站上宣傳今晚 (7/5) 發佈會嘅標誌，突然變成咗互動式，允許用戶用滑鼠擦除部份或全部標誌。雖然呢個舉措最初被認為係關於改進嘅 Apple Pencil，但亦有人認為，可能係指 Apple 計劃喺今年稍後推出改進嘅相片編輯功能 —— 有熟悉 Apple 下一代作業系統嘅人士同 AppleInsider 提到，iPad 製造商內部測試緊「相片」App 嘅增強功能，而呢個功能將利用生成式 AI 進行相片編輯。

傳內部測試「Clean Up」功能，iPad、mac 都用到

該功能喺 Apple macOS 15 嘅測試版本中被稱為「Clean Up」，而位於新版本「相片」App 嘅編輯選單中，旁邊仲有現有嘅調整、濾鏡、裁剪等選項，而呢個功能似乎取代咗 macOS 本身嘅「修飾」工具，但不同的是，「Clean Up」功能預計將提供改進嘅編輯功能以及刪除照片中較大物件的選項，使用者能夠透過畫筆工具選擇照片的區域，並從影像中刪除特定的物件，在應用程式內部測試版本中，測試人員還可以透過調整畫筆大小，以便更輕鬆移除較小或較大嘅物體。



雖然呢個「Clean Up」功能本身預計會喺 Apple 下一代作業系統上進行測試，但 Apple 都有可能決定提前預覽或宣佈呢項功能，作為宣傳新 iPad 機型嘅一種方式。如果 Apple 選擇喺 6 月 WWDC 大會之前就發表全新的「Clean Up」功能，咁 Apple 好大機會會將新款 iPad 定位為配備人工智能的設備，讓用戶可以選擇使用 Apple Pencil 從相片中刪除某個人或者物件，而這將會係展示 AI 實際優勢嘅好方法。

來源：AppleInsider