▲ FonePad 7 LTE 包裝，跟一系列華碩 FonePad 也差不多。多了 LTE 一字，代表它支援 4G LTE。它是通話平板，仲可以打電話架。
▲ 跟機只有 USB 線及充電器，Packing 好簡單。
帶佢去旅行
今次版主 Keith 試呢部機，分為兩部份。頭五日其實帶了它跟我去泰國芭提雅旅行。用它，因為平時工作都要對住 MacBook Air，放假要跟公事，但也想比較輕鬆點，一部有話音功能，裝到 LINE、WhatsApp 與上到網的平板，一件過會比手機方便，所以這部份，FonePad 7 LTE 就係跟我去 hea。個人比較愛七吋平板，因為個芒比較大，但機身不會大好多。而雙手舉起它也可以用倉頡輸入法打字，方便好多。FonePad 7 LTE 跟我用開的 Nexus 7 2013 版本，大細相約，只嫌比較重，但也好揸。因為版主夠壯健，放係褲後袋也可以，係芭提雅行下街，食下飯，也無難度。人在芭提雅，外出時間比較多，亦沒有通話，所以 FonePad 7 LTE ，在當地 3G 網絡下，用到一日。不過，FonePad 7 LTE 也有不足之處。首先，屏幕亮度不足，在泰國天朗氣清、陽光猛烈的季節，係無可能係戶外，睇到屏幕顯示什麼。若果你真心當佢係電話仲大件事，乜人打來都唔知! 另外，ASUS 的 UI 真係寫得好差，開心影完相，跳返出去，首頁一定要等一陣才能復完。這是跟他用 Intel 處理器有關係嗎？我問過 Engadget 達人 Danny Mak，他說 Intel 雙核處理器，其實效能不會這樣差。事實上，我用 Chrome、Firefox 上網、用 Facebook App、WhatsApp、LINE 也好順的，當然，相比 Nexus 7 2013 ，還是差少少，但不影響使用。講完衰野，都要講下好處，ASUS 是中文倉頡輸入法，是 HTC 之後做得比較好，我覺得比起 Google 的更好用。
係香港用 4G
泰國的 Traveller SIM 卡是沒有 4G 的，所以試 4G 網絡，真正配合 4G 的使用時間，就是回了香港才試了。有無想過，其實 3G 上網可以好快，不過最好用 4G 手機，因為大部份 4G 手機也會支援雙通道接收，版主試過係曼谷機場 Magic Food Court，3G 測速去到 20Mbps 的，所以就算你是 3G 用，用這部 FonePad 7 LTE 也有著數。講番香港，4G 收訊沒有問題，一整天開著 4G / 3G 待機兼上網，中間做了半小時 Tethering，連續使用十六小時，回到家也有 5% 電量，可見這塊平板在 4G 環境下，用到一日。亦因為接上 4G 網絡，上網感覺比起 3G 平板好好多！
▲ FonePad 7 LTE 的外型，跟早前推出的 FonePad 7 3G 雙卡版本有點分別。但版主覺得最醒神是這有全白色選，面、底都是白，靚好多。
▲ 機左側已有針才能導出的 microSIM 卡槽。機右側有開關、音量及 hotswap 的 microSD 埠。
▲ 機頂有 3.5mm 耳機位、機底就有 microUSB 埠啦。
▲ 下面的一部是上一代 FonePad 7 3G 雙卡版本。
▲ 七吋平板＋手機，我剛剛可以一手舉起。係呢到要講一講，FonePad 7 LTE 內建電話對話錄音功能，我覺得十分有用。
▲ 左面是 FonePad 7 LTE 右面是 Nexus 7 2013。
▲ 機背比一比，左面的 FonePad 7 LTE 其實比較闊。而 FonePad 7 LTE 也是厚少少。
▲ 屏幕比較，擁有 Full HD 解像度的 Nexus 7 2013 版本 (右) ，質素好好多。
▲ 側視覺度，也是 Nexus 7 2013 好好多 (右面)。
效能比拼
FonePad 7 LTE 採用 Intel ATOM Z2560 雙核心處理器，有 1GB RAM 及 16GB ROM，七吋 1280 x 800 pixels IPS 屏幕。相機是 500 萬後置 + 120 萬前置。支援 800 / 900 / 1800 / 2600 頻段 FDD-LTE，香港用 4G 也沒問題。至於效能如何呢?
▲ 用來測試手機整體效能的 Quadrant Standard 與 AnTuTu 分數分別為 7620 與 18277，整體來說是 2012 年高檔手機的效能。雖然感覺是很耐以前，但手機的操作是很滿順的。用來試測試上網瀏覽器效能的 Vellamo HTML 分數為 1760，比起 Nexus 7 2103 要差，事實上，用 FonePad 7 LTE 上網睇網站，撥動頁面的速度，不算十分快，也是合理，只係用慣了 Nexus 7 2013 的版主，要小小時間去習慣一下。
▲ 用來測試遊戲效能的 Basemark ES 2.0, 只有 37.18，表示打機真係麻麻。
▲ 以平板來說，續航力也說不錯。在開啟 3G / 4G 自動模式，以藍牙長期接駁 Pebble 手錶，開著 WhatsApp 與 Line 再加 Facebook / Gmail 實時接收，用了 16 小時後，也有 5% ，要用成日，沒有問題呢。
▲ ASUS 本身的介面，是由基本的 Android 4.3 介面變出來，不算難用。
▲ 本身有省電模式，可以自動不同應用程式時的光暗度，要否 sync 等。
▲ 電話及電話簿介面。
▲ 影相介面，有不少調控功能。不過，大部份用家，都係雙手舉起平板即影，即拍。版主都係咁，覺得影相部份，有點 Lag，耐不耐會由相機介面彈返出首頁，再要等待主頁回復正常。但 Bug 沒出現時，影相拍片感覺還是可以，像下面有兩幅元朗天后出巡時拍攝的照片，舞龍隊伍不等郁動，都拍得，算係咁。
▲ 版主在芭提雅拍的照片，靚嗎?
▲ 元朗天后出巡。
小評價: 價錢決定一切
ASUS FonePad 7 LTE 不算一部完美的平板，同是華碩製作，版主用開的 Nexus 7 2013 的芒靚好多，造工比較好，當然還有順好多。Nexus 7 2013 4G LTE，Google 價 $3598，街價大約 $2800 至 $3000。ASUS FonePad 7 LTE 行貨價 $2798，預期好快會係腦場跌價，到時跟 N7 賣價又會有距離, FonePad 7 LTE 應該點都平一點。另外，你要部平板七吋屏幕大細、支援 4G LTE、仲要可以通電話，FonePad 7 LTE 係幾乎唯一的選擇。電話部份有什麼好處？版主覺得用來做 Backup 電話都不錯，反正 FonePad 7 LTE 使用時間不俗，另外內置對話錄音，亦係好有用。ASUS FonePad 7 LTE (ME372CL) 在文章刊登時，賣價為 $2798，按這裡有更詳細規格及最新賣價。
