fonepad 7 2015 試玩！更輕更薄手感不錯
Asus 的 fonepad 7 系列係定位上可以話偏向入門低階，所以今次版主試玩的 fonepad 7 2015 版本同前代 fonepad 7 2014 年版本相比，規格上差異其實唔大，但外型上仍然算係有進步的。首先係就加左條銀邊，感覺上算係靚仔左，而且係用料上用返霧面塑膠材質，拎上手後手感其實比不少大陸品牌平板都要好。除左重量較前代輕之外（ fonepad 7 2015 重量係 280g 而 fonepad 7 2014 版重 290g） 。係厚度方面新一代的 fonepad 7 更只有 7.9mm ，雖然點都不及 Z4 Tablet 6.1mm 咁薄，但已經算係唔錯啦。
▲ 外型係 fonepad 7 2015 版進步比較大的地方，7 吋屏幕要單手拎住都可以做到。（但唔係指單手操控呀！）
▲ 今次機背採用不反光的霧面塑膠機背，好處係唔「跣手」兼且唔易沾指模。
▲ USB 插口同耳機孔都係機頂，而電源鍵同音量鍵都放置在鏡頭邊。
▲ 另一邊就係雙 SIM 卡插口，機背底部部可以設置 MicroSD 卡 ，
▲ 雖然 fonepad 7 只係支援 3G 上網，但有樣抵讚的地方就係用家可以係「設定」內切換上網或者通過的 sim 卡。
提升至 2GB RAM 但整體規格無大進步
不過係規格方面，坦白講， fonepad 7 2015 年版同前代比起上來進步並唔大，實在難以話好有吸引力。雖然可以插卡又支援打電話同 3G 上網兼且可以做到最高 42Mbps 的上網速度，但屏幕就只係得 7 吋 1024 x 600 解像度。而處理器方面就同上代一樣只有 Intel Z2520 1.2 GHz 雙核心處理器，幸好提升至 2GB RAM 同埋 16GB 內置容量。至於相機方面就升級到 800 萬像素主鏡頭和 200 萬像素前鏡頭組合，電池方面就有 4000mAh 容量同埋預載 Android 4.4 。以 $1698 呢個定價來講呢部 fonepad 7 又叫唔叫抵呢？真係見人見智了。
▲ 7 吋屏幕只係得 1280 x 700 解像度又只得 170ppi ，仔細睇 icon 已經會見到「粒粒」，另外亦建議用家盡量少睇完整版網頁。
▲ 從低角度睇屏幕光度會稍為減弱，表現未算出色。
提升至 2GB RAM ！但 fonepad 7 2015 Intel 雙核表現不算出色。
雖然 fonepad 7 2015 版本已經將 RAM 升到 2GB ，好可惜因為係處理器方面仍然沿用 Intel Z2520 1.2 GHz 雙核心處理器的關係，所以係跑分程式上面成績就真係麻麻地了。不論係安兔兔、 Vellamo 、 Basemark 定係 Quadrant Standard 幾個跑分軟件上 fonepad 7 表現都唔算突出，性能確實不算強。當然除左跑分實際試用都相當重要，版主試用 fonepad 7 瀏覽電腦版 ePrice 時就覺得表現還可，相信呢部平板應可以滿足用家一般要求的，但對性能有相當要求的話，呢部平板可能就不太適合你了。至於係軟件方面，用過 Asus 的朋友應該都知道本身係 fonepad 係會用 ZenUI 的，但同原生 Google Launcher 分別不大，要適應相信唔難。比較有趣係 fonepad 7 本身有「閱讀模式」功能，其實功能同唔少朋友都會用的「藍色光濾波器」相似，一開啟左就會變做「護眼黃芒」，都算係一項貼心設計來嘅。
▲ 係 Quadrant Standard 上面，fonepad 7 2015 版只係得 6588 分，而係安兔兔上面呢 fonepad 7 就係 18546 分，成績未算得上好，係安兔兔上表現更加未級小米的紅米 Note 。
▲ 係 Vellamo 上面亦可以見到 fonepad 7 只係屬於入門級水平，三方面的分數都係 Samsung Galaxy S3 之下。
▲ 最後就係 Basemark 2.0 的分績了， 38.67fps 呢個表現同樣只屬一般，看來升級到 2GB RAM 對 fonepad 的幫助不算明顯。
▲ 介面上都係用返 ZenUi 而比較有趣的「閱讀模式」只需要拉下 Notification Bar 就可以開到。
總結：外型有進步但硬件過時，吸引力成疑
坦白講，版主覺得呢篇 review 真係唔易寫，因為整體來講 fonepad 7 係 2015 版本上的進步實在唔多，真係幾難話有驚喜比到用家。除左係外型上比前代有進步之外優點真係乏善可陳，不過係實際使用時硬件表現又未如跑分成績咁不濟，反而屏幕只係得 1280 x 600 解像度低呢個問題比較大。 $1698 呢個賣價叫唔叫抵玩呢個只能話見仁見智，但版主今年已經見過唔少規格更強更具競爭力的平板而售價仲要只係三位數字（雖然都係大陸廠牌出品）反映到平價入門平板競爭係幾咁激烈，所以版主個人都唔太睇好呢部規格略為過時的平板啦。最後，唔知大家又覺得 Asus 呢部 fonepad 7 2015 版本能否吸引到你呢？快啲留言分享下啦！
在文章發佈的時侯， ASUS fonepad 7 2015 定價 $1,698 ，按此看詳細規格和最新賣價。