上手短評
手上呢部 ASUS Chromebook Tablet CT100PA 個名真係好長（簡稱 CT100）印象中應該係香港第一部 ChromeOS 平板行貨，而 ASUS 算係香港最積極推出 ChromeOS 產品的公司。今次只借到樣板機，所以就無開箱喇！
▲ 以灰色黑色為主調的外殼，機背下方的 Chrome 標誌特別搶眼。
▲ 金屬色澤的 ASUS LOGO，留意背蓋蓋用了蜂窩式耐刮坑紋。
▲ 配備一個 500 萬像素你同我都唔會用到的鏡頭。
▲ 市場少見的 WACOM EMR 免電式觸控筆，唔需要為個 PEN 充電，而機身有獨立的筆槽裝住支筆。
▲ 筆身並沒有按鈕；筆嘴亦採用了具備一定摩擦力的橡膠物料，加強書寫觸感。
▲ 電源鍵旁備有指示燈，音量鍵旁邊具備開放式 micro-sd 卡槽。
▲ 機身另一側就乾淨無任何 I/O 或按鍵。
▲ 機身頂部備有 3.5mm 耳機孔、收音孔，以及外放喇叭。
▲ 機底擁有另一個外放喇叭（所以係有立體聲效果），以及支持 PD 規格的 USB-C 3.1 接口。
▲ 原廠 USB-C 火牛支持 20V/3.25A、15V/3A、9V/3A、5V/3A 四個輸出模式。
▲ 機身四角採用軟膠包裹，通過了 MIL-STD 810G 軍規級測試，我上手揸兩揸確實感堅固！
▲ 正面除了有一個 200 萬像素鏡頭外，就是一塊 9.7 吋的 2048 X 1536 觸控屏幕；值得留意的是，屏幕長闊係接近 4：3 的比例，正！
值得留意的系統特點
話明係 ChromeOS 平板電腦，自然係採用 ChromeOS 啦！ 本 YK 可以話係 ChromeOS 的忠實打手，經常向各位網友推廣呢個輕巧又省電的移動作業系統。有乜好玩？ 詳情可以 GOOGLE 翻之前我寫的文章，你輸入「ChromeOS ePrice」就見到。
▲ ChromeOS 平板的界面直接顯示所有的應用，並沒有獨立的桌面顯示設計；下方係 DOCK BAR，見到返回鍵和主頁鍵，右下角就係狀態列，可以召喚出各種設定。
▲ ChromeOS 絕大部分所謂的應用都係透過 Chrome 瀏覽器運行（其實姐係網頁版 ~ ），例如上述的 Netflix 網頁版，但亦支持 Chromecast 投放功能，可以直接射落去電視機播放如上圖。
▲ 這部 CT100 支持 WACOM 觸控筆，你拔出筆時會自動彈出觸控筆工具對話框，允許你整截圖、快速寫筆記等等，這是非常實用的設計。
▲ 支持 OTG 功能，透過 USB-C 轉 USB-A 線材，可以直接讀取 USB 手指內容。
▲ 再玩多少少就係透過 OTG 線材直接連手機，讀取手機裡面的檔案，包括相片影片；在網絡欠佳的地方非常實用。
▲ 由於沒有實體鍵盤，所以要用虛擬鍵盤，你亦可以自己加藍牙鍵盤。
屏幕大解構！
呢部 CT100 係採用 4：3 的屏幕比例，同 iPad 一樣玩法。呢個比例非常適合閱讀絕大部分的網頁和文件。如果唔明我講乜的朋友，你可以將手上的手機打橫睇網頁，超窄的上下可視角度，完全不利於閱讀，但打直部機睇又要內容排版遷就你長條芒的比例。
▲ 睇 A4 的 PDF 檔案，4：3 比例可以減少放大縮小的操作，快速睇清楚檔案內容。
▲ 再打開 ePriceHK 的網頁版一睇，CT100 的屏幕係可以完美 FIT 到左右邊！
▲ 你打直部機睇又得，一樣係舒服的顯示效果，「四比三」萬歲！
▲ 系統預設的顯示解像度係 1024X 768，如果你想用盡個屏幕原生解析度，就會好似上面咁樣，獲得小型字體和比例的顯示效果。
▲ 開盡解析度的顯示效果就會變成咁樣，呢樣就要睇你自己喜歡而調整啦！
性能測試
一貫 ChromeOS 產品的硬件性能未必最強，但操作流暢度和續航力在經驗中都是信心的保證，官方號稱 CT100 提供最高 9.5 小時的續航力！ 如果唔玩太多、太大型 Android App 的網友，手上呢款 4GB RAM + 32GB ROM 的組合很足夠。
▲ CT100 採用的是六核心 OP1 CPU（其實係 RK3399），這是 Google 找來 Rockchip 的定製版，之前三星高階 Chromebook Plus 亦採用此處理器；跑個 Andorid 版安兔兔，獲得 119831 分，
▲ 而 Androbench 獲得 113MB/s 連續讀取、45MB/s 連續寫入、28MB/s 隨機讀取、14MB/s 隨機寫入的測試結果。
▲ 本 YK 亦找來 Youtube 播放影片進行測試。
▲ 在預設解析度顯示中，播放 1920 X 1080 30fps 毫無難度，獅子出場了，播放過程完美流暢。
▲ 而在 4K 影片播放測試中，OP1 亦無受到太大壓力，順播 3840 X 2160 30fps 的影片。
▲ 如果將屏幕解像度推到最高的 2048 X 1536 呢？依然流暢播放 4K 影片！ 因為 OP1 處理器係原生就有 4K 影片的解析能力（VP9 / H.264@60fps），配合左右雙喇叭，睇動作片一流！
結論：平玩 ChromeOS 平板
香港 ASUS CT100 售價是 2498 元，以價錢黎睇對手還有最低級的 iPad 和 Android 平板做對手。如果你一直想玩 ChromeOS 平板，CT100 應該係你目前唯一的平價選擇：通過軍規 MIL-STD 810G 測試，完全唔需要戴套；配有免充電 WACOM 觸控筆，你話其他廠都乜年代喇，仲要幫支筆充電，傻的嗎？
本 YK 最愛是全功能的瀏覽器，以及 4：3 的屏幕顯示效果，絕對稱得上是睇文神器。但如果你有大量文字輸入需要，CT100 未必適合你了。偷偷話你知，其實同步開賣仲有部貴一千的 Chromebook Flip C214MA，也是獲得軍規認證 + 有筆 + 反芒，仲有 USB-A 和 兩個 USB-C 接口。
正所謂「蘋果窮三代，玩 Chrome 平一生」，入了 ChromeOS 的極樂世界，你會發現原來平機都可以咁快咁好用。
查詢：ASUS HK