首款平板打通中港 4G 全網通！ Samsung Galaxy Tab A 仲用到 S Pen
Android 平板市場呢排相當淡靜，亦都缺乏有吸引力的新機係香港推出。今次 Samsung 推出的 Galaxy Tab A 可以話睇準時機而出。首先講下 Galaxy Tab A 系列的賣點先，新推出的 Tab A 系列有 8 吋同埋 9.7 吋兩個屏幕版本，兩款都有 Wifi 同埋 4G LTE 版本。以往來講版主個人都唔覺得平板支援 4G 有好大吸引力，但今次 Galaxy Tab A 支援 4G 就一定要鄭重地提一提，因為佢係首款支援中港 4G 全網通的行貨平板（以往都有華為的 X1 但係支援頻段上並不齊全），除左 TDD-LTE 齊頻外連 3G TD-SCDMA 同 CDMA 都支援。以 Samsung 來講恐怕只有 Galaxy S6 Edge 有如此齊全的支援啊。除左支援全網通 4G 之外， Galaxy Tab A 系列另一項賣點就係支援 S Pen ，而 Air Command 、 S Note 同埋版主係 Galaxy Note 4 上覺得幾好用的 Multi Window 功能 Samsung 亦都帶到落 Tab A 系列上，對嫌 Note 4 貴又想用 S pen 的朋友 Galaxy Tab A 都係一個可以考慮的選擇來嘅。
▲ 可能係為左配合 Tab A 有筆的特色， Samsung 順勢推多個「 Book Cover 」，不過定價 $299 都唔算好平。
未有 FHD 芒！ Galaxy Tab A規格入門定價又算唔算平？
Galaxy Tab A 既支援全網通又可以用到 S Pen 無疑係幾有吸引力。不過，版主遲遲未提到的規格相信就係呢部平板的弱點了。係屏幕上，不論係 8 吋芒還是 9.7 吋芒， Galaxy Tab A 都只有 4:3 屏幕比例 1024 x 768 解像度。而處理器上 Galaxy Tab A 系列平板都只係用 Qualcomm APQ8016 1.2GHz 四核心處理器（ APQ8016 即係 S410 ）配合 2GB RAM 以及 16GB 內置容量，雖然內存較少但就支援 128GB SD 卡。相機方面就有 500 像素主鏡頭配搭 200 萬像素前鏡頭。電量方面香港 Samsung 係新聞稿上雖然未有提到，但參考返已經開賣的台灣地區資料， Tab A 8 吋版有 4200mAh 電池而 9.7 吋版就有 6000mAh 。最後所有 Tab A 系列平板都搭載 Android 5.0。不論係 Wifi 還是 LTE 版， Samsung Galaxy Tab A 系列平板都已經係香港推出啦，兩款屏幕尺吋版本都有白色以及灰色可選。價錢方面就係 Tab A 8 吋 Wifi 版 $2298 、 4G LTE 版就要 ＄2898 。而 9.7 吋 Wifi 版本就係 $2698 ， 9.7 吋 4G LTE 版本 $3298 。唔知呢個價位大家又覺得算唔算抵呢？如果俾版主揀就一定會揀 8 吋 LTE 版啦！大家都一齊講講意見啦！
