真機一覽
呢部 10.4 吋大芒平板係 2020 上半年最期待的平板產品。 最重要係放棄 PWM AMOLED 更護眼，但同時保留大電池設計，頂級質感的造工和高級版 S-Pen 觸感，而且有埋商務客戶最喜愛的 LTE 型號。 由於係搶先實測，連盒都無就無辦法做開箱。
▲ 灰黑色真機，擁有極舒服的磨砂金屬背殼，隨機附送的磁吸收納 S-Pen 就係隔離。
▲ 正面入目的是一塊 10.4 吋 2000X1200 解像度 TFT 屏幕，注視屏幕非常舒服，尤其是夜晚微光，沒有了低頻 PWM 的刺眼和閃動，正！
▲ 面對大燈和射燈的環境，本來以為採用 LCD 屏幕會嚴重反光，結果三星 Tab S6 Lite 無呢個問題，屏幕可讀性非常高。
▲ 超窄四邊框的設計係爽，三星亦合理地留了一個手指位的邊框，可以牢牢抓緊平板。
▲ 到底 Tab S6 Lite 有幾窄？ 得一支筆咁窄咋，同旗艦機 Tab S6 睇齊。
▲ 機身右側有音量鍵，電源鍵反饋清晰，按鍵感清脆。
▲ 底部係其中一個喇叭，以及 USB-C 接口。
▲ 頂部係另一個喇叭，以及 3.5mm 耳機接口。
▲ 機背設有一個 800 萬像素自動對焦鏡頭，實測影文件係清晰，作為普通影記錄用足夠，起碼製作 PDF 掃描件清晰度足夠。
▲ 叫得做 LTE 版，支持 nanoSIM 卡自然係常識黎。
▲ 但最值得大力讚賞係卡槽反過來就係 microSD 卡擴充，最大支持 1TB 容量。
▲ 其實 S-Pen 最大優勢係利用 Wacom 不需充電就用得的技術，而 Tab S6 Lite 筆觸同 Tab S6 近似，但在屏幕上書寫的阻力會稍弱，也就是更加「流暢」。
▲ 至於 Samsung Notes 功能當然基本齊備，但要留意因為 Tab S6 Lite 的 S-Pen 並不支持藍牙，所以不需要充電，但亦缺少藍牙 S-Pen 一些獨有的功能。
性能實測
叫得做 Lite 版就自然唔會送頂級處理器比你啦：Tab S6 Lite 擁有八核心 Exynos 9611 處理器，配備 4GB RAM 和 128GB ROM，再加上 7040mAh 大電量組合。 到底性能實測結果如何？
▲ 安兔兔跑分結果係 161839 分，性能上大約等於高通 S660 和 S670 水平；唔打機的情況下係絕對可以勝任文書和 AV 娛樂任務。
▲ 而 Androbench 的測試中四項破百，包括通常最慢的隨機讀寫，也獲得 136MB/s 和 190MB/s 的成績。
▲ 送埋 Geekbench 5 的性能測試結果比大家睇：單核心 345 分； 多核心 1169 分；
▲ 不論是單核心還是多核心，性能與高通 S660 相若；
▲ 另一個最值得關注係續航力，擁有 7040mAh 電量的 Tab S6 Lite 在 Geekbench 4 續航測試中獲得 5900 分，分數上不算強悍，但實際體驗是能滿足一整天文書工作的操作。
▲ 好多網友關心 Tab S6 Lite 配獵戶座處理器，咁到底規格減弱左，實用體驗有無減弱到呢？
實際體驗分享
下面我就用條片黎分享部分體驗感受，先講結果先：梗係好用啦！ 睇 PDF 做筆記都係好爽，最爽係細機身有 LTE 可以隨時插耳機打電話，又可以隨時連線搞 OFFICE 文件，配合埋整套 Google 軟件，方便又就手！
結語
呢部 Tab S6 Lite 深得本 YK 歡心，我有少許後悔係屋企出現一部 Tab S6 平板，對於我 呢種務實型的用戶黎講價錢貴 + 配置過份豪華，反觀 Lite 版的規格夠用有餘：八春配 4 + 128GB + 卡的組合，大電及踢走低頻閃芒，自然成為本 YK 的年度「DREAM PAD」。
老實講，平板喇叭做到聲波炮級都係無意思，出到去公眾場所一樣唔比你播； 觸控筆要充電？ 咪玩啦大佬，我只係想儘快批改晒堆文件就收工咋！ 平板電腦最常用功能係睇上下網睇下股票、睇 AV 影音娛樂、批改 PDF 同 Microsoft Office 文件，呢類工作根本對硬件性能要求不高，Tab S6 Lite 留得低都係實用設計，仲可以打到電話。。。
提醒各位，要玩「流動辦公」記得選擇 LTE 版，完整的 Google 應用 + Microsoft Office 就可以好似本 YK 咁真正做到 Work From Hill 啦 ~ 我係邊？ 係欣澳海邊打完稿喇，收工！
