實機到手
我都明白不論係三星還是消費者，心裡總係覺得有個 Plus 字就係好，而見到鋪天蓋地的廣告宣傳一律都係以 Galaxy Tab S7+ 為重心，身為老二的 Tab S7 非常可愛，可憐無人愛呀！ 而版主都千辛萬苦，歷盡艱辛咁攞到呢部老二機比本 YK 試玩。所以係無箱可開，只有機身本體以及必備配件。
▲ 到手的有機身本體，鍵盤， S Pen 以及書本式磁力蓋。
▲ 呢部 Tab S7 11 吋屏幕係支持 120Hz 刷新率，屏幕比例係常見的筆電 16:10 比例，擁有 2560 X 1600 解像度，DCI-P3 色域和 SGS 低藍光認證。 最正係乜？ 你都估到我想講乜，佢係 LCD、LCD、LCD 呀！ 剩係呢個賣點已經秒殺佢大佬 Tab S7+ 啦！
▲ 金屬霧光黑低調的作風，可以見到機背左右各有兩行天線塗層，磨砂手感一流；一條黑色大 BAR 係磁吸 S Pen 的位置。
▲ 值得稱讚係 Tab S7 都加入超廣角鏡頭，好多時候拍攝文件都係近距離咁影，廣角鏡頭就可以發揮功用； 分別係 1300萬像素 f/2 鏡頭，以及 500 萬像素 f/2.2 超廣角鏡頭，亦支持 4K 30fps 影片攝錄功能。
▲ 機身頂部有音量鍵盤及整合指紋識別功能的電源鍵，值得注意係個電源鍵設計非常好，係平整無凸出，咁就唔怕放入袋會唔小心 hi 到著芒。
▲ 而 Tab S7 支持 microSD 卡擴充，呢部亦係 LTE 版，支持插入 nanoSIM 獲得打電話和數據上網的能力。
▲ 機身左右兩側係四個獨立 AKG 調教的喇叭，支持 Dolby Atmos 音效技術，亦自然有 USB-C 接口。
▲ 機身另一側就有一個收音孔，以及餘下兩個大喇叭； 大哥 S7+ 係嚇死人的 5.7 毫米的薄度，二老 S7 厚度係 6.3 毫米，但上手感覺一樣係太薄，薄到有點可怕；淨機身重量 LTE 版係 500g。
▲ 機身底部自然有磁吸鍵盤接口，以及左右兩個輔助扣。
組合配件一覽
雖然配件係另外要買，但本 YK 強烈建議必須集齊鍵盤 + 書本式磁力蓋 + S Pen + 本體，呢個四合一的方案配合 Samsung DeX 先係完全體！ 使用體驗話比大家聽，其實 Tab S7 係一部行 Android 系統的筆記本電腦，實際使用上足以成為日常的流動文書娛樂機！
▲ 五列鍵盤，配備一個八達通卡面積大小的多點觸控的板，支持手勢操作。
▲ 鍵盤配件擁有皮質感的背部，個人就其實唔太喜歡呢種高質感，有無得選擇耐用耐髒的膠殼？
▲ 書本式磁力背蓋具備防滑面。
▲ 提供凸出的筆槽以供放置 S Pen 於機身背部時完全套住。
▲ 呢個磁力背蓋其實都係一個支架，擁有無段式角度調整的可動性。
規格性能測試
其實呢個部分真係無乜意思，皆因Tab S7 同大哥 S7+ 一樣都係用上旗艦級配置：手上的 LTE 版用上 7nm 的 S865 plus 八核心處理器，8GB RAM 配 256GB ROM，再加埋 8000mAh 電量，絕對係移動怪獸。 下面我循例都要做下測試比大家睇睇，但結果當然係旗艦料。
▲ 準備做性能測試時候就出現更新？ 好，就等我更埋佢。
▲ 個鍵盤都有得更新？ 好，更埋佢。
▲ 安兔兔測試接近 58 萬分， 畢竟 S865 Plus 已經市場上的旗艦處理器。
▲ 而 Androbench 測試中，睇連續讀寫無乜意義，隨機讀取和隨機寫入速度都破 200MB/s，快過你屋企部陳年電腦啊！
▲ 跑 1440 級的 GPU 測試結果比較漂，從 36fps - 55fps 都有，但跳落去 1080 級就破晒 60fps 順到無朋友；你都無幾多遊戲會係跑原生 1440 級畫質啦，玩 PUBG 攞命黎搏咩，何況仲要係平板電腦 ~
▲ 擁有 8000mAh 電量對比大哥叫做少，但係咪續航力就差呢？ 答案話你知，續航得分破萬 10860 分。
▲ 整個測試中 Tab S7 都無偷雞跑足 100% WORK，耗電情況亦相當穩定，馬不停蹄咁跑左我 18 小時；得分超越我部手機一倍，就咁睇幾日一充無難度。
使用體驗
一部可以令到本 YK 大力暫時和推薦的 Tab S7 平板電腦，其實唔係平板電腦咁簡單，旗艦性能我都費事講，所以上面都係隨意比大家望下就算，更重要係各種實用不花巧的功能，以及設計細節符合人類的使用習慣。 下面我會逐個分享使用一段時間的體驗係點：
▲ 基本上我路都係用呢組合出街，有時候拆走個鍵盤就咁用 S Pen 平板；全部配件大合體的重量都係 910 克咋，相當輕便。
▲ 大家都知道鍵盤絕對係戰士的命根，好用的鍵盤係戰場的利器；Tab S7 的鍵盤體積雖然比老大哥 S7+ 細（因為屏幕大小細的關係），但打落去手感係出乎意料地好。
▲ 本人手掌可以單手揸籃球，但用上 Tab S7 鍵盤打字大約用了 5 分鐘就完全適應無難度；而且觸控板用盡上下空間，按壓感實在，順滑之餘又支持手勢操作，確實係爽。
▲ 鍵帽面積亦唔細，但五列設計自然要犧牲 Function 列，整合落去數字列，而包括 Backspace 功能亦會以 Fn 組合鍵方式出現；最初幾分鐘唔習慣，之後都無晒問題，最重要係手感爽。
▲ 呢個鍵盤當然有缺點啦，好地地個 Esc 竟然要用 Fn 組合黎實現。三星呀三星，你唔係第一日知道 Android 系統的精華係在於 Back Button 呢個設計嗎？ 其他機我一路喪 CLICK 個 Esc 按鈕就可以係咁返回，但係 Tab S7 鍵盤上就唔爽了，呢個亦係唯一令我感到遺憾的設計。
▲ 至於卡扣就可以放心，相當穩固無搖晃的情況。
▲ 磁力扣係相當可靠，靜止揸住鍵盤都可以 HOLD 得住機身； 唔知應該話磁力強還是機身輕，或者 WHY NOT BOTH？
▲ 書本式背蓋其實都係支架，角度隨你調整，最大支持 165 度，咩話？ 有無得放平？ 如果要平放，直接收埋個支架即可。
▲ 而 S Pen 呢種收納方式其實都好方便，顧及到隨要攞筆出黎，但又要隨時充電，放後面就最理想。
▲ 而且背蓋本身就係筆盒，要用時候先打開。
DeX 先係重點
三星開發 DeX 模式開頭都只係普通的小改界面，到了後期越來趨成熟，而 Tab S7 上的 DeX 已經令我覺得有 Chromebook 的感覺，簡潔輕巧，重點係支持多視窗重疊，方便文書工作的場景。
▲ 呢個係 DeX 模式下的 Tab S7，真係成部 Chromebook 咁的界面。
▲ 需要留意係，部分功能會係 DeX 裡面消失，但基本的 Office 應用、上網、睇 AV 等就無縫對接； 只需要係鍵盤 / 通知欄下輕鬆一按就直接進入 DeX 模式。
▲ 但其實絕大部分 App 要 DeX 唔 DeX 都無太大分別，例如檔案總管咁。
▲ 呢個計劃就係 DeX 模式下的檔案總管，你會見到顯示比例上係細左，同一個版面下睇得更多內容。
▲ 唔知係咪軟件問題，DeX 下部分 App 功能會限制左，例如錄音機；廣東話語音轉文字的功能在 DeX 模式係無。
▲ 單純識別廣東話係相當準確，但如果涉及中英混合的錄音就會出事。
▲ 好似上面咁的 DeX 模式，開多幾個視窗都毫無難度，計數機、電話、寫文，同一時間用各種工具，本 YK 的流動辦公就係要呢種； 而且配合 S Pen 直接批改 OneDrive 上的 PDF 文件，亦都係另一個一路已有的功能，加大晒本人的生產力。
▲ 如果你有買 USB-C Dock 的話，作為旗艦型號的 Tab S7 當然可以插 RJ-45 進行有線上網。
結論
本 YK 經常同網友講，識貨一定係買 LCD 機，今次三星做到了，而且唔係降級將就下咁出一部老二 Tab S7 平板，而係一個比佢大佬仲要好的移動工作娛樂方案。 最便攜的 11 吋筆電好早就已經消失係市場，部部機都變到大一大，真係有錢都唔一定買到好機。三星 Galaxy S7 的出現係一個救星，成個 Package 出晒黎。
我對移動辦公工具的要求好簡單：輕巧細部，鍵盤手感必須好打，而且一定要有 OTG 擴充功能，等我可以插 USB 手指 / 硬碟等，有埋個 PEN 方便備註就大大加分。 叫得做流動就一定要電量夠多，長時間工作就一定要部唔閃的 LCD 芒，頂你部 S7 仲有埋低藍光認證。
有網友夠膽走黎問我 Tab S7 同 iPad Pro 邊個好，佢平時肯定發緊夢，如果要係 Android 同 iOS 二選一，唔使問阿貴啦係咪呀？ 一個多 App 又多不同自訂玩法，一個自閉系統斷網變磚頭，咪玩啦，移動辦公？ 望埋個 V2Ray 平台 Android 有幾多玩法你就知道。 如果錢對你黎講唔係負擔，今次呢部 Galaxy Tab S7 絕對係值得你 All in 的選擇。
