見到個標題已經 J 出血！ 早幾個星期版主坤哥爆料話三星 Galaxy Tab Active 3 平板電腦正式係香港賣街，價錢爲港幣 3888 元，好多網友未睇晒就已經嫌貴，但睇真少少係平又抵玩至真呀！我 CHECK 完個規格表後立刻向版主借入呢款年度「稀有種」產品，同大家黎一篇試玩實測分享文！
外觀一覽
所有 Patreon 網友好早就知道我會試玩呢部平板，而你地所提出的問題，我會將答案全數加到本文當中比大家參考。其實過往三星都有出 Active 系列，一般都擁有粗獷外表、防水防塵防撞等高品質設計特性，但香港總係無得買，一般係美國限定。呢次三星引進三防 Galaxy Tab Active 3 可以話係值得大讚，而且係讚爆果隻。 WHY？ 大佬呀，你係市場上搵一部平板電腦對手黎睇睇？ 無呀 X 你！ 可以插卡、換電、防水、防撞，支持 LTE 通話之餘，更加有埋三星 S Pen 呀！ 黐線，呢部機已經成爲本 YK 出門必備的愛機了。
▲ 登登 ~ 今次無箱可開，直接就獲得機身本體，機身顏色只有沉穩的黑色。
▲ 機背兩邊已經見到兩條增強抓握感的凹凸槽，相當硬朗的外型設計。
▲ 講明係三防平板，機身本體通過最高 1.2 米跌落測試；同時亦符合美國 MIL-STD-810H 軍用級標準，論堅固可靠度目前睇完勝市面上其他平板產品。
▲ 大光圈 f/1.9 1300 萬像素主鏡頭，支持自動對焦，足夠日常記錄文字之用；但呢個鏡頭出乎意料地支持 4K 30fps 錄影。。。
▲ 點解機背邊框附近好似有個「卡槽位」？ 咁都做到防水防塵咁厲害？
▲ 唔係呀，睇落似「卡槽位」，但實際上是比你打開背殼！ 唔好忘記呢部軍規平板係可以換電！ 而且我實測過，你可以拆走粒電池接上充電器依然開到、用到部機，完全唔怕 N 年後電池老化的問題。
▲ 好多人話插卡換電做唔到 IP68 防水，三星話可以做到！ 背蓋設有防水膠條就解決到問題；但需要注意係呢類膠條經過日晒高溫和時間洗禮後，塑膠會否快速變硬而導致防水性能失效就暫時無人知。
▲ 擁有 5050mAh 電量不算大，但勝在可以換電嘛。
▲ 機身右側是快捷鍵、電源鍵、音量鍵；橙紅色果個唔係電源鍵，係可自訂快捷鍵黎，本 YK 一開始都成日搞錯。
▲ 機身側面紅色的多功能鍵係可以自訂開啓任何程式，包括長按和短按兩種觸發方式。
▲ 電源鍵亦支持自訂功能，自由度相當高。
▲ 機身左側是多功能金屬觸點，以及卡槽；我問過三星方面，暫時未有「金屬觸點相關」特色配件可供零售，例如充電線等，企業銷售先可能會有。
▲ 卡槽分別是 nanoSIM 及 microSD 卡，最高支持 1TB 擴充容量；注意卡槽蓋邊沿都有防水膠，插穩卡槽蓋先發揮到 IP68 的實力。
▲ 機身底部有喇叭、3.5mm 耳機、USB-C 3.1 Gen 1 接口和收音孔（係呀，呢部機可以打電話）。
▲ 終於黎到機身正面，邊框相當粗；粗背後的含義係軍規級，自然有一定的堅固可靠度；擁有一塊 8 吋全高清 LCD 屏幕，護眼不刺眼、耐用無燒印，值得稱讚！
▲ 頂部有內放聽筒和 500 萬像素前鏡頭。
▲ 正面底部見到久違的實體三天王，分別是多工鍵、主頁鍵、返回鍵； 而主頁鍵同時係指紋識別器，實際體驗解鎖速度非常快，輕輕一摸立刻解鎖。
▲ 值得留意係 Tab Active 3 除了支持 S Pen 外，其實亦支持 Samsung DeX 功能，包括 DeX Dual 模式，將你部機的工作內容射落電視度，又或者開影分身同時進行多重工作，正！
▲ 留意，S Pen 和保護殼係隨機附送，不需要另外再比錢買；三星呢次送的套係超高質，高質程度超越晒我所見過的任何套；而戴左套之後最高跌落測試就變成 1.5 米高，黐線。
▲ 個套上面仲會刻埋 NFC 位置，怕你戴套後唔記得左要啪邊個位置，相當貼心。
▲ 連支 S Pen 都具備 IP68 級別，而且擁有一定粗的筆身，可以話係目前最好揸手的 S Pen 黎。
▲ 點解話戴套好重要呢？ 因爲咁粗的 S Pen 無辦法放入機體內，只能放係套的頂部，已經預留了一個筆槽安放。
▲ 放落去之後就係好似圖片咁。 你睇，我呢支野係咪好粗呢？
▲ 套上的按鈕位係完美開模，戴套後的按鍵感依然相當好；但留意個厚度係增加不少。
▲ 呢個係無套的機體，實測本體重量接近 430 克。
▲ 呢個係戴左套之後的情況；有 Patreon 網友問到底部野係咪好重，我幫佢過磅：加套加筆後的 Tab Active 3 體重達到 515 克； 比個參考資料你，Galaxy Tab S7 LTE 版擁有 11 吋屏幕重量都只係 500 克，但重量換來軍規質素、防水換電是否值得就要問你自己了。
性能測試
睇完上面的分享，相信大家都對 Tab Active 3 堅固可靠的外觀設計無野好講，咁內在硬件又如何呢？ Samsung Galaxy Tab Active 3 採用自家 Exynos 9810 八核心處理器，配備 4GB RAM 和 64GB ROM，運行 Android 10 系統。 以下做了幾個性能測試比大家參考下：
▲ 首先睇系統軟件版本，出廠已經運行 Android 10 系統，Knox 版本亦採用 3.6 版。
▲ 而有 Patreon 網友問到的安全性修補程式級別，出廠已經係 2020 年 9 月 1 日的更新包。
▲ 自家獵戶座處理器 Exynos 9810 其實用過在自家旗艦手機 S9 系列、Note 9 及 Note 10 Lite 身上；呢款採用 10nm 製程工藝的旗艦級處理器，當年對手係高通的 Snapdragon 845 處理器；實測安兔兔綜合性能測試達到 297981 分，分數仲稍好過之前搭載呢粒 SoC 的手機。
▲ 至於 Geekbenck 5 單核和多核性能測試結果都唔弱：單核心得到 338 分；多核心得到 1987 分。
▲ 對比高通 S845 處理器，大家可以見到 Tab Active 3 單核性能稍弱，但多核心性能就挽回一仗；整體上黎講，日常中絕大部分工作 Tab Active 3 都能輕鬆勝任。
▲ 在 Androbench 讀寫測試令人驚喜！ 原本估計 64GB ROM 多數係用慢速 eMMC 晶片；結果，連續讀寫和隨機讀寫的速度相當滿意，四項破百的速度在平常操作反應都相當靈敏。
▲ 係 Geekbench 4 的續航測試當中，得分只有 5230 分，由於電池容量只有 5050mAh，所以續航力表現並不亮麗，但本 YK 在日常睇網頁、寫電郵、畫示意圖等都可以堅持連續 12 小時輕度的工作量；而 Tab Active 3 優點在於可換電，又可以拆電 + 接線操作平板，更適合經常定點操機的用戶。
超長總結
三星今年的平板電腦都相當吸引，繼之前我愛不惜手的 Tab S7 後，今次連 Active 系列都引進到港，實在係用戶福音。有網友嫌 3888 元的定價高，唔好意思 I DON'T THINK SO。正如我開首所講，宜家市場上邊度有得買插卡換電的平板？ 仲要有防水防撞軍規級認證！ 仲要係可以打到電話、直接聽到電話的 LTE 平板！仲要有握感超好的特粗版 IP68 認證 S Pen 磁感筆啊！
部機有無乜大缺點？ 有網友擔心話機體重量超過 500g 覺得好重，但其實部 Tab S7 都有 500g 重，成年人雙手操作都問題不大。但我試過比小朋友玩，好消息係佢地覺得重好快就唔玩，而細路仔唔玩機係好事黎 XD。有樣野反而開頭覺得好唔習慣：實體三天王。 手指一旦習慣了虛擬鍵的「無力觸控」後，實體三天王要用力按壓反而一時間接受唔到。
但當你以爲非旗艦型號平板的其他硬件用料就是是但但、求其了事？ NO，你再望真少少 ~ 藍牙 5.0 佢有；Wi-Fi6 （802.11 ax）佢都有；NFC Payment 佢都支持；Wireless DeX 佢都有；想用黎做戶外行山地圖？ GPS、Glonass、北斗、伽利略佢都有，仲有陀螺儀、地磁感應器、加速計，做電子地圖無難度。再細心少少睇：支 S Pen 係特別有掛繩設計，原廠送的套都係有掛繩設計，屏幕本身亦支持手套觸控模式，充電亦可以手動選擇快充或慢充保護電池。 呢部 Galaxy Tab Active 3 設計師相當細心，好多細微位都做到出黎。
你見到我好難得地係會大讚特讚一件產品，因爲 Galaxy Tab Active 3 係市場上根本無同類產品對手，三星香港呢次填補左多年無人理會的空白，大家可能都唔明白本人心中的果份激動 ~望住自己手上部 8 吋芒 LTE 平板已經係整整三年前的產物，睇黎又係時候買聖誕禮物了 ~