前言
其實 Tab S7 FE 5G （簡稱 Tab S7 FE）正式發佈時，唔少網友都反映定位唔清晰，規格上套入高通 7 系處理器，而原有的 Tab S7 和 S7+ 兩款旗艦平板，有留意去年本 YK 的實測就知道，是一部獲得高度評價的平板產品。 面對兩位出色的師兄，S7 FE 到底有乜優勢亦都係相當令人關注。
香港行貨建議零售價 5388 元，你可以理解爲 CPU 降一級，但依舊擁有各種旗艦體驗的「Tab S7+」。 但如果係真正的 Tab S7+ 在細鋪叫價最平亦要 7100 元。 反觀 Tab S7 FE 目前街價已經被壓制在 5000 蚊有找的水平，對於要大芒通話平板的用戶來講，可以話係非常誘人。「採用高通 7 系處理器、真機實際體驗有乜分別？」，呢個問題就成爲我實測 Tab S7 FE 的誘因。
真機外觀
▲ 設計上沿用 Tab S7 系列的超窄均距邊框的設計，機身擁有超大 12.4 吋的 PLS（比 IPS 擁有更高亮度）屏幕，提供 2560 X 1600 的解析度，色彩通透發色自然，很適合睇相睇片之用，長時間睇文件比較舒適；正前方亦配有一個 500 萬像素 f/2.2 大光圈鏡頭。
▲ 一體化金屬外殼造工精細，同時具備 S Pen 磁吸設計；本 YK 手上的是霧光黑版本，港行另有霧光綠和霧光分紅，一律採用頂級的磨砂工藝，揸落去手感真係好正，「磨砂最高！」
▲ 具備 800 萬像素自動對焦 f/1.9 大光圈主鏡頭，另外鏡頭旁邊提供指向性收音咪。
▲ 機身邊沿設有天線走位，支持雙頻 WiFi 之外，亦提供 5G 數據和通話功能。
▲ 凹刻「SAMSUNG」字樣高質感卻相當平實低調。
▲ 獨立音量鍵和電源鍵，注意 Tab S7 FE 機身並無任何指紋識別器；只能透過人面識別或者傳統的密碼、圖案等進行解鎖。
▲ 身爲旗艦產品線，Tab S7 FE 同樣獲得 AKG 調音認證；留意機身底部留有金屬接點，支持官方原裝外掛鍵盤功能。
▲ 上面提及的 AKG 調音，加持機身左右兩個獨立大喇叭輸出，手動開埋 Dolby Atmos 音效獲得更強的環迴立體聽覺效果！
▲ 機身側面是 USB-C 3.2 Gen 1 的接口，最高支持 45W （另購）的快速充電模式，官方聲稱最快可以 90 分鐘就充滿電。
▲ 機身內置 nanoSIM 卡槽，擁有流動數據和通話功能的平板，絕對係移動辦公的利器。
▲ 你以爲 Tab S7 FE 無得插記憶卡？ 錯喇！ 卡槽背面擁有 microSD 卡槽，最高支持 1TB 的容量擴充。
▲ 隨機附送的 S Pen 同樣支持低延遲反應，能夠提供更敏捷和即時的書寫反饋，更貼近實際用筆的體驗。
▲ 三星 S Pen 一貫都是無需充電，配合筆身獨立按鍵，以及特製筆頭所提供的摩擦感，對於有繪圖、手寫需求的用戶係一大優勢。
性能實測
有不少網友都曾經問過 Tab S7 FE 係咪 S7 Plus 的閹割版？ 會唔會好多實用功能都裁走左無得用？ 高通 7 系處理器會否慢好多？ 畢竟上面提到，兩者的實際街價差距都有兩千蚊。 從定位上黎睇，Tab S7 FE 係三星提供的粉絲版，在三星粉絲用得到各種頂級功能之下，對硬件規格進行合理裁減，成本低左自然就可以回饋比粉絲們。
▲ 安兔兔跑分測試中，高通 S750G 加持的 Tab S7 FE 獲得接近 40 萬分，對比 S865+ 的 58 萬分水平，高達 18 萬分的差距，但這個差距主要來自 GPU 性能（有 14 萬分差距）；意味住如果平板電腦的用途並非 GPU 要求高的遊戲，或者剪片功能的話，高通 S750G 性能體驗上其實與 S865+ 無乜分別。
▲ 睇埋 Androbench 的測試結果，對比 Tab S7 版的用料，Tab S7 FE 明顯稍微慢一些，但隨機讀寫速度破 180MB/s 水平，根本已經快到多餘喇！ 正常用途裏，本 YK 無法體驗出 Tab S7 FE 有任何令人不耐煩的遲滯感。
▲ 最令人有驚喜的絕對係續航力，內置 10090mAh 的電量，在 26 小時測試結束後，Tab S7 FE 獲得超驚人的 15530 分！ 每日只係工餘時間睇下片、批改 PDF 工作，偶然打開數據網絡收電郵，最後成個禮拜都未充過電，本 YK 仲以爲係電量計壞左。。。
重要功能無得留低？
▲ 多工浮動視窗模式下，實測最多可以同步開啓 5 個 Apps 進行操作（如上圖）；同埋唔好忘記 Tab S7 FE 係可以打電話，但就要用藍牙耳機黎打，畢竟機身無聽筒和 3.5mm 耳機接口。
▲ 旗艦功能 DeX 模式（無線版）亦出現在 Tab S7 FE 身上，配合官方鍵盤套就十足一部筆電。
▲ 有了三星 Tab S7 FE 高質素的屏幕就不需要額外再購置「電腦副屏幕」！ 本 YK 最愛的「第二個螢幕」功能亦在 Tab S7 FE 獲得保留，平板變成電腦的無線屏幕真係相當實用。
結論
早前有唔少網友見到 Tab S7 FE 對比 Tab S7+ 減少 RAM 和 ROM 的容量，又改用 7 系高通處理器，就嘩嘩聲咁鬧「CUT COST 呀！」、「偷工減料！」；但好老實，呢個裁減絕對係「CUT 得好！ CUT 得妙！」，一般用戶係用唔到 8GB RAM、又裝唔盡 256GB ROM 架，何況仲有插卡呢！ 而 Tab S7 FE 呢部產品的推出，反映出三星係有做過深入的市場調查，知道大部分用戶到底需要乜性能、乜規格。
你見到 Tab S7 FE 依然保留高級版的「高壓感、低延遲 S Pen」，又改用埋本 YK 最愛的高質 LCD 芒，續航力更加係超級黐線地長氣！ 但實用的多工畫面、DeX 模式、無線屏幕、甚至通話功能都一次過比晒你，而最終價錢係有一炮過減晒比你架！當你需要一部旗艦功能的平板、又要支持鍵盤和 PEN 操作，但手上只有一張 5000 蚊的消費券，三星呢部 Tab S7 FE 會係一個相當吸引的消費選擇！