平板外觀得唔得？
作為一部通話平板，T1 具備 3G 通話功能，我估有網友肯定話唔接受無 4G 既平板
。 T1 採用少見既展訊四核心處理器 Spreadtrum SC7731G A7 1.2GHz，配合 1GB RAM 和 8GB ROM，支援最高 32GB 的 Micro-SD 擴充記憶卡。而前後鏡頭都係 200 萬像素 
，並無任何補光燈。 最吸引我既係電量達到 4100mAh，上手一段時間既印象係續航長，電力相對持久！
▲ 前黑後白熊貓配色，雖然平板邊框望落好似好闊，但仍然能夠輕鬆單手揸得住。
▲ 華為官網寫住金屬機身，但其實只有背殼係一塊金屬，上下白色位置係訊號位，所以用上塑膠殼。
▲ 機身右側是一音量鍵和電源鍵，按鍵反饋明顯、觸感相當實在；機身右側下方就是 Micro-SD 和 Micro-Sim 卡槽。
▲ 底部是收音孔和 Micro-USB 接口；機身頂部是 3.5mm 耳機接口，背部有個 200 萬像素鏡頭，拍攝時無法手動選擇對焦位置。
▲ 呢個除左係內放聽筒外，竟然仲係喇叭黎，姐係聽電話又係佢、播歌都係佢，而軟件內可以分別控制音量；右邊係 200 萬像素既前鏡頭。
7 吋屏幕表現係點？
我好中意 7 吋芒平板，因為個大小岩手感。呢部 T1 都係 7 吋芒，但需要注意既係，屏幕解析度只有 1024 x 600，並未達到 720p 高清水平。下面給大家看看 T1 的屏幕表現：
▲ 擁有 7 吋屏幕既 T1，你肉眼痴埋佢睇芒確實會見到粒粒。
▲ 屏幕有明顯的空氣層，但可視角度尚算不錯，在室內世界光情況下，仍然看得清楚。
▲ 而抗光性尚算良好，有反光的情況，但並不嚴重。在反射戶外光線既情況下，畫面仍能清楚看見。
性能跑分看可以嗎？
T1 賣到唔使一千蚊，咁個規格自然就屬於入門級。但處理器用上展訊處理器，雖然曾經有大廠都用過，但呢排出場率最高都係 MTK 同 Qualcomm，到底展訊 U 既跑分又會係點呢？ T1 採用 32bit 既 Android 4.4 KitKat + 自家設計 EMUI 3.0，界面切換尚算流暢，但開 Apps，或者係 Chrome 開多幾個頁面就開始慢，但基本播放 720p 影片都流暢無遲滯感。
▲ T1 在安兔兔跑分得分 17801 分；呢個分數同 S400 既 Moto G 差唔多，快過 Nexus 4 少少。
▲ Basemark ES 2.0 Taiji 圖像分數是 27.19 fps；玩輕量遊戲、播放影片等操作仍能應付得到。
▲ 至於 Vellamo Chrome 瀏覽器得分為 1381，稍差過 Moto G；而多核得分是 977，對比同樣四核心的 S400，評分落後約三分一；金屬評分是 661，表現跟 Moto G 睇齊。
相機體驗、但求影到！
T1 的相機表現符合我既預期，影出黎確實無一般手機咁好，但影得清楚記錄到野，我都收貨喇！ 200 萬像素又無自動對焦，你覺得成像會飛天咩？ 我影左幾張相比大家望下：
總結：用落感覺還算不錯！
規格雖然入門，但金屬背手感冰爽，機身造工和質感都超過千元價位既預期。日常普通瀏覽網頁，上 Facebook 等操作體驗上尚算良好，而且開機已經包括完整 Google 服務體驗。平板我從來都唔用黎影相，所以鏡頭表現遜色呢個問題對我黎講就唔係問題，但如果你中意影相就要留意。另一樣需要注意既係，T1 的屏幕觸控靈敏度一般，要成個手指頭接觸個芒先操作順暢，同旗艦手機果種「輕輕力 high 芒」既習慣好唔同，我猜測同個空氣層有關。
如果你預算得一千蚊，呢部平板你又會唔會考慮呢？ 唔考慮既話，又有無其它好建議呢？ 歡迎留言一齊討論下啦！
華為 MediaPad T1 7.0 在文章發表時，定價為港幣 998 元，詳細規格和發售資訊請參考這裡。
