▲ 今日版主 Keith 最想試嘅係呢部 Z4 Tablet！係手機 Z4 未推出之前，Sony 第一部用上 S810 處理器嘅產品會係一部平板電腦。呢部 Android 平板電腦令人期待地方，主要四方面：防水、夠薄，高規同埋用上 2K 屏幕，真係你手上部手提電腦，都未必有咁高清架。Z4 Tablet 有 WiFi 及 4G LTE 版本，10.1 吋屏幕，賣價應該跟 iPad Air 32GB 相約。按呢到有完整規格。
▲ 記得係三月嘅 MWC2015 手機展公佈 Sony Xperia M4 Aqua，好受網友嘅關注。以前 Sony 嘅防水手機，比較側重高規格款式，中低檔都無份，呢部 M4 Aqua 唔同喎，採用 Qualcomm S615 處理器，2GB RAM，有 5.0 吋 HD 芒。防水規格係 IP6/8，泳池游水無問題! 版主估計，Xperia M4 Aqua 會以 4G 手機機種上市，賣價跟 M2 Aqua 剛推出時相約 $2498 左右，大家又點睇，當然真實賣價，就要等今日下午兩點嘅發佈會啦？按呢到有詳細規格。
▲ Sony Xperia C4 Dual 睇名字都知佢係一部雙卡雙待手機，但加入 4G LTE 上網功能。它有 5.5 吋 Full HD 大屏幕、千三萬像素相機、五百萬前鏡。佢都係八核心再加 2GB RAM 手機，用嘅係 MTK 6752 - 1.7GHz 處理器，呢粒 CPU 唔差架，HTC Desire 820s 同埋 Meizu M1 Note 都係用佢。賣價相信都係 $2498 左右。按呢到有詳細規格。
睇完簡單嘅介紹，係版主們參予發佈會之前，大家對於呢三部機，有乜問題？趁早上及中午時份，係呢到透過 ePrice 會員系統或 FB 發問啦，我地兩點鐘左右就會有現場報價與直擊及直接把問題跟 Sony 有關人員查詢架啦。