開箱：入門機勝在夠平
首先，需要說明一下，本 YK 是次開箱的型號是 TB3-730X，而 Lenovo 旗下的 Tab 3 系列中另一款 7 吋平板冠名 Essential，或許樣子跟我手上的 TB3 非常相似，但其實兩部有截然不同的規格。 忘了說，如果你只追求高性能硬件的平板，那麼此平板並不適合你收看。本人購置 TB3 的用途主要是工作上處理電郵、查看文件，收工後睇片、睇新聞之用，遊戲和重度操作不屬需要用途之列，敬請留意！
▲ 包裝盒原有塑膠封包，每邊開口有封條，以說明是全新未開盒貨。
▲ 盒面列名，屏幕是 7 吋 IPS 1024 x 600 解像度，但實際體驗上卻無明顯的顆粒感。
▲ 重要賣點一眼見到嗮，主要有 IP 52 防水濺和杜比 ATMOS 加持。另一個讓我選擇 TB3 而非 Essential 的原因在於，TB3 有 2GB RAM + 16GB ROM，以及支援 LTE 通話，這個通話不需要外插耳機 / 藍牙耳機！
▲ 開箱啦！一板、一線、一牛、四書，就係咁多野；而 TB3 跟香港聯想行貨一年保養。
▲ 火牛輸出只有 1A，充電速度慢是預期之事，但我習慣訓覺充電，所以無任何大影響。
設計：手感一流
對於一部唔過一千蚊的平板，可以要求得幾多？ TB3 最令我驚訝是造工，背殼手感一流，塑膠感竟然令我覺得更勝於金屬殼！ 另外，機身配色沉實，黑色陪藍色絕對好過一堆大陸金配銀，唔容易污糟又顯出本人踏實、沉穩的風格。
▲ 本體登場！ 第一觀感上 TB3 極像 Google Nexus 7 平板，機身加入窄邊框設計。
▲ 採用虛擬三天王之餘，亦盡量保留了原生 Android 6.0 的界面，包括 Launcher 和系統選單。
▲ 機頂有 micro-usb 接口，亦支持 OTG 讀取 USB 手指。
▲ 機身保留 3.5mm 耳機接口，你可能會話咁都要講？ 因為 TB3 支援 FM 收音機，所以呢個接口好重要 。
▲ 音量鍵與電源鍵就一定有架喇，按鍵咁非常清脆！ 而主鏡頭有 500 萬像素自動對焦，有勝於無。
▲ 但我想強調下，TB3 機背非常舒服，磨砂質感設計除了增強抓握力外，亦不容易留下指紋。
▲ 三選二式卡槽：兩張 micro-sim 或 一張 micro-sim + micro-sd 卡，支持 Android 6.0 的記憶卡整合功能。
▲ 講明係 LTE Call 平板，機身底部設有一個收音孔。
▲ 前置鏡頭得 200 萬像素就唔多講；聽筒位好特別，同時亦是外放喇叭位，音量夠大而播片效果亦不錯。
▲ 平價的代價係屏幕，我講緊塊透明塑膠，容易留指紋和油污，而且滑動界面時並不滑動，明顯是出於成本的緣故，並沒有採用強化玻璃，所以我另外購入玻璃貼以補完這個問題。
性能測試：入門中的入門
我話得係入門平板，一千唔使就買到，你都唔會信佢會比到你旗艦規格掛？ TB3 處理器用 64bit 的 MTK MT8735P 2GB RAM + 16GB ROM 並預載 Android 6.0，內置 3450mAh 容量電池。需要留意係 WiFi 並不支援雙頻，但竟然有訊號指示燈。
▲ 界面好乾淨，仲可以打橫睇，方便我保持橫向睇片、做野等場景切換，唔係部部機預載 Launcher 都做得到！
▲ 不得不提，TB3 一開就叫我更新軟件，連續更新左三次定四次我已經唔記得，雖然有更新係好事，但每次更新都搞好耐，一個小時走唔甩！
▲ 圖像性能方面，Basemark ES 2.0 Taiji 顯示得分只有 31.98fps，說明大型遊戲與 TB3 無緣，甚至是一些設計差的「大食 App」都會慢 + Lag 如 Facebook，所以我轉用 Facebook Lite 算數。
▲ 安兔兔測試顯示，TB3 性能低至 23498 分，印像中係我手上最低分的一部機。而 2GB RAM 的閒置記憶體大概有 600-700MB，文書使用上未試過因為 RAM 不足而發生彈出情況。
▲ 有一個奇怪的問題，或許與我使用了「整合 micro-sd 卡功能」有關：安裝部分應用程式後會無法打開 / 運行部分功能。到底是 Lenovo 系統寫得不好？ 還是應用程式兼容差？ 這我就不知道了。我只是知道重新開機就不再出現這個問題。
續航力長：一日肯肯定無問題
其實你都估到啦，MTK 處理器係續航的保證，3450mAh 電量睇落好一般，但實際用落卻好長氣！ 官方聲稱可以用 9 小時，但我普通一日處理郵件、睇文檔、睇片、睇新聞，偶然玩下 Facebook 同網友係 Telegram 吹水，翻到屋企 10 點一睇，TB3 電量仍然有 40 %。
▲ 預設有個待機智慧型省電，原理係乜我雖不知道但照樣開住。大家看到電量圖中間空白位置嗎？ 這個是 TB3 預設的自動關機和自動開機，設定好時間後，就會幫你自動關機和自動開機，適合生活有規律的人如本人使用。
結論：平野真係有好野，但睇你能否接受入門規格
好多朋友好富有，都同我講「不如比多少少買乜乜乜好過」，我都十分同意，畢竟有錢我買乜都得啦！但睇嗮一千樓下的平板，不外乎大陸機 / 水貨機，要打電話？ 更加少只有少。Lenvovo TB3-730X（唔係 Essential 呀）處理器弱確實不適合高性能需求的用途。 但如果你跟我一樣只是睇文件、漫畫、睇片，又需要一部有 LTE 功能的平板，TB3 確實係本人近期覺得不錯的選擇。
呢部平板原先定價幾多我唔知，我見某網絡商買兩千幾，但我用 970 元買到。至於邊度買？ 私底下入黎 Telegram PM 問我啦！題外話，如果網友有其他好推介，不妨留言分享下～