搶先睇女人最愛的 Hello Kitty 平板電腦
其實呢個地方就係市中心既灣仔，灣仔既會展喇！ 小弟今日偷步入場2015 年香港動漫電玩節，發現 Xbox 同 Microsoft 既會場裡面，竟然有大量既 Win 10 平板試玩，更「離譜」既係竟然係現場可以訂購我最喜愛既 Hello Kitty 平板 + 鍵盤！先講係邊度可以試玩同訂購第一批 Win 10 平板，當然係灣仔動漫電玩節 D01、D02、E01 攤位啦！廢話少講，等小弟同大家簡單搶先試玩部新 Win 10 平板啦！
首先要介紹既係白色 Hello Kitty 特別版 Grace 10 ，擁有 10.1 吋 1280 x 800 解像度屏幕，處理器方面採用低價平板熱門既 Atom Z3735，配合 2GB RAM 和 64GB ROM，並支援最高 32GB 外置記憶卡，運行 Windows 10 作業系統和包含 Office for Tablets and Phones。跟機附送鍵盤一個，平板加鍵盤重量只有 1.1kg，配備 6600mAh 電池，官方聲稱可以提供 5 小時續航能力，預訂售價為港幣 2788 元，預計九月中正式推出。
▲ 至於黑色 Hello Kitty 既 Grace 10 light 版，規格上大致相同，但配備 32GB ROM，電量有 6800mAh，同樣隨機附送可拆式鍵盤，定價為港幣 2488 元，預計八月底正式推出。動漫電玩節現場提供多部機比網友試玩，並可以預先訂購呢款可愛既 Win 10 平板！
▲ 其實部 Hello Kitty 特別版有白色，Model 妹妹同部機好相襯！
二千有找平板 + 鍵盤
雖然 Hello Kitty 吸引，但更吸引既係一部叫做 Trekstor Surftab wintron 10.1 既平板，因為價錢好平，只係埋港幣 1999 元咋。但 Microsoft 方面就未有提供詳細既規格，而且聽聞未咁快正式發售，小弟我就偷偷影落黎比大家睇睇！
▲ 其實 1999 元買到 10 吋平板 + 鍵盤，真心覺得抵！好過自己去淘寶買國產平板，畢竟呢 D 機有 MS 篩選過，質素應該有保證少少掛。
▲ 眼利既網友可能見到上面個規格表唔係寫住 Win 10，但其實部野係可以行到 Windows 10 架！
▲ 同樣跟機送鍵盤，係國產機果種折合式鍵盤套。
▲ 背面大大隻字寫住 「Intel」，機身背部摸落好似三星 Galaxy S5 果種膠布感覺，但我覺得幾舒服。
Windows 10 既方塊界面更好用！
正主來了！ 最令我期待既 Windows 10 竟然係會場內安裝嗮係 Surface 平板，比我任玩任試！先簡單講講我既試玩感覺：同 Win 8.1 有明顯分別，流暢度高之餘，方塊式界面亦變得更容易用，最起碼我會更願意去用啦！
▲ 桌面界面同過往分別唔大，得個垃圾桶係桌面，最下面就係條功能 Bar。
▲ 同 8.1 最大分別既地方在於，一開始就已經見到方磚界面下，功能 Bar 仍然存在！ 代表我可以告別 8.1 果種繁複既拖、拉等操作手勢！從以往硬要分開兩個界面模式，到 Win 10 上已經整合左一齊，雖然呢個改動只係好細，但其實係操作上好用左好多，少左切換既過程同一眼就開到自己想要既野！
▲ 會場內真係有有好多部 Surface 平板，玩到我唔想走～
▲ Windows 10 另一個功能係串流 Xbox 遊戲，我現場玩過，流暢度非常好，睇唔出係 Streaming！ 現場有專人服侍你，教你透過 Surface 平板串流玩 Xbox 既遊戲！呢個，小弟我興趣唔大，留翻比各位網友自行發掘啦！
如果你好似我咁，苦於手上無多餘既 Win 平板試玩最新系統，咁去動漫電玩節搵 Microsoft 確實係比較好既辦法，玩之餘又有專人解答你既問題。睇中既話更可以預先訂購埋 Win 10 平板，都算非常方便。