外型 + 上手感：缺點是 USB 槽少
呢部 Surface Pro 4 的機身尺吋為 292.1 x 201.42 x 8.4 mm，重 766g，並採用了 12.3 吋 2736 x 1824 解像度 267 ppi PixelSense 屏幕。咁版主我第一下拎上手嘅時候，其實都覺得有點兒「聚手」，不過呢，版主拎番自己部 13 吋 Macbook Air 黎比較，發覺其實 Surface Pro 4 都唔算係好重，比 Macbook Air 輕左差不多 600g，平時出街放落個袋應該會幾輕鬆 (事關版主每日揹住部 Macbook Air 拎出拎入其實都覺得幾辛苦)。
Microsoft 強調 Surface Pro 4 係一部可以完美取代手提電腦的平板電腦，到底係唔係真係能夠做到完美取代呢?咁好似版主呢啲長期用電腦工作嘅人黎講，除左會關注部機嘅性能之外，其實亦都會關注佢有幾多個 USB 插槽。喺呢方面黎睇，Surface Pro 4 比起一般手提電腦就稍有不足了。Macbook 係有 2 個 USB 槽、1 個 SD 卡槽、1 個 3.5mm 槽，其實 2 個 USB 槽我覺得唔多夠，而呢部 Surface Pro 4 就只有 1 個 USB 槽以及 1 個 microSD 卡讀卡機，版主覺得真係少左啲，呢個係佢嘅缺點之一。
▲ Surface Pro 4 真機圖。
▲ 同 13 吋 Macbook Air 比較，可以見到 12.3 吋的 Surface Pro 4 大約有幾大。
▲ 重量為 766g，第一下拎上手其實有少少重，不過當然要視乎你點拎啦!
▲ 前方會見到有 500 萬像素前置高清鏡頭、人臉識別鏡頭以及 sensor。
▲ 機的左邊上方有 3.5mm 耳機孔。
▲ 左邊下方有個坑位，方便你打開佢嘅支架。
▲ 機的右方會有 1 個 USB 插槽、1 個叉電槽以及 1 個 Mini DisplayPort。
▲ 值得一提嘅係，佢嘅支架係可以自由調校，角度差不多 140 度左右，你可以按你的需要去調校最舒適的角度。
▲ 機的頂部會有開關鍵以及音量鍵。
▲ 背面係咁嘅樣，有 800 萬像素主鏡頭以及 microsoft 的 logo。
▲ 機的厚度為 8.4mm，同 Macbook Air 相比，其實相對薄啲。
試玩 001：鍵盤打字手感 OK，trackpad 過於敏感
Microsoft 亦為呢部 Surface Pro 4 推出左一啲改良版的配件，包括實體鍵盤保護蓋、以及一枝 Surface 手寫筆，而呢兩款新的配件都比之前嘅更強大。今次推出的 Keyboard 比之前的擁有更大嘅 Trackpad，能夠更容易地控制滑鼠游標。不過版主在試用的時候發現，佢個 Trackpad 實在太過敏感。例如我用 trackpad 將個滑鼠游標指向「開始」嘅位置，咁平時我地係要出少少力按落去個 trackpad 度，聽到「噠」一聲，然後個開始欄先會彈出黎。但「改良」左呢個 trackpad，版主唔肯定呢點係唔係一個 bug，有時候就算我無按落去個 trackpad，純粹加左少少力落個 trackpad 度，無聽到 「噠」一聲，但佢已經彈左個開始欄出黎。呢個係目前發現比較無咁好用嘅地方。值得一提的是，如果大家之前有睇到 10 月 Microsoft 發佈會的話，應該都知道佢嘅 Keyboard 本應係有指紋識別功能，但係今日會上嘅保護蓋係無呢個功能，經版主向職員了解後，就話果種有指紋解鎖功能嘅鍵盤保護蓋暫時香港未推出，唔知要等幾耐香港先會有得買。
▲ 鍵盤的 size 大約係咁，打字其實都算幾順，只係 trackpad 嫌佢太過敏感。
▲ 佢個鍵盤係採用磁吸式設計的。
試玩 002: Surface 手寫筆都幾實用，而且有得換芯
改良版枝手寫筆真係幾唔錯，用黎喺 OneNote 度寫 Notes 又得，用黎喺小畫家或者其他繪圖軟件度畫畫又得，重要嘅係呢枝筆同以往最唔同嘅地方，就係調轉枝筆可以當「擦膠」用。另外，佢嘅筆頂部份除左可以當「擦膠」用之外，佢同時亦係開啟 OneNote 的快捷鍵，只要按一下筆頂，就可以開啟 OneNote，連續按兩下，仲可以做到 print screen 嘅功能，然後直接在 OneNote 中開啟，之後就可以在 OneNote 入面進行編輯。值得一提的是，佢枝 Surface 手寫筆係有得換芯的，可以換不同粗度的筆頭。
▲ 筆頭有得更換的，不過會場上沒有貨，未能給大家看。
▲ 筆頂可以當「擦膠」，按一下可以快速開啟 OneNote，連按兩下可以 print screen，並直接在 OneNote 中開啟。
試玩 003: 用枝筆去 print screen
咁頭先都同大家講過，呢枝 Surface 手寫筆按一下就能夠快速開啟 OneNote，連按兩下就可以 print screen。但你可能會問，下? 點連按兩下 print screen 呀? 咁版主會簡單示範一下俾大家睇。
▲ 例如而家我想 cap 左左邊部電腦落黎，咁我就係呢個畫面連按兩下枝手寫筆嘅筆頂，咁佢就會自己在 OneNote 中開啟。
▲ 然後你可以用枝筆，自己選擇你想 cap 的位置。
▲ 最後，完了。
▲ 其實在 OneNote 中開啟都有好處，就係你可以直接編輯幅圖。
試玩 004: 用枝筆畫畫
Microsoft 強調 Surface Pro 4 對從事設計的用家都好有用，咁當然最基本就係佢嘅繪畫功能。透過 Surface 手寫筆，你可以在不同類型的繪圖軟件上畫畫，例如小畫家、甚至是 Adobe 的繪圖軟件。另外，Surface Pro 4 配備了重力感應器，繪圖的時候能夠感應你的力度，畫出不同的效果，包括線條的粗幼度、顏色的深淺度，都能夠因應你的力度而改變，但重力感應呢項功能，就需要配合指定的軟件。
▲ 在 Microsoft 示範的軟件中，能夠應用到重力感應呢項功能。你大力啲嘅話，畫出黎就粗啲。相反輕力啲嘅，就可能會淺色啲同埋幼啲。
▲ 呢個軟件你可以選擇不同的筆，你亦可以為其他圖片繪上顏色。
▲ 當然你喜歡的話，你可以直接在 OneNote 上寫字，甚至畫畫，但 OneNote 就發揮不到重力感應的功能。
▲睇唔明，呢到有條 Video 示範俾你睇。
好喇! 睇完以上的介紹，應該對呢部 Surface Pro 4 有更多的認識。售價方面，其實之前版主都同大家提過，呢部 Surface Pro 4 的建議零售價由 HK $6988 起，並將會在 11 月 19 日起公開發售。
雖然話就話版主我對呢部 Surface Pro 4 有興趣，但如果你問我，當我手上咩電腦都無，而面前有 Surface Pro 4 同 Macbook Air 俾我揀，我會點揀? 版主都係會揀番 Macbook Air。呢部 Surface Pro 4 其實個重點係枝筆，但枝筆除左用來寫字之外，其實另一有用嘅功能就係 print screen。但如果講到 printscreen，版主覺得用手寫筆呢種嘅 printscreen 方法比 Macbook Air 麻煩，假如平時做發佈會直播要 printscreen，相對下會好唔方便。你地又點揀呢?
在文章刊登時，Microsoft Surface Pro 4 的建議零售價為 HK $6988 起，按這裡有詳細規格及最新賣價。
