Surface Book 係一部筆記簿型電腦...... 唔係，正確來說佢係一部「變型筆電」，除左因為擁有強大的性能之外，更因為佢配有一個可拆卸的鍵盤，當你將個鍵盤拆走之後，佢就可以變身成為一部平板電腦。Surface Book 具備 Surface 系列的所有特點，配有同 Surface Pro 4 一樣的 Surface Pen 以及觸控支援，由於枝筆的功能同 Surface Pro 4 的一樣，所以版主今日亦唔會再詳細示範呢枝筆的功能，簡單啲黎講就係呢枝筆除左基本操作以及繪圖之外，最特別的功能，就係按一下筆頂快速開啟 One Note，快按兩下就 printscreen，想了解更多可以睇番之前 Surface Pro 4 的 review。
▲ Surface Pen 其中一個功用就是作繪圖用途，而 Microsoft 今日亦邀請了一位設計師親自示範，利用 Surface Book 配合 Surface Pen 在 Photoshop 上繪圖。
Surface Book 機身薄，鍵盤造工亦很精緻，但亦有改善空間
咁循例都同大家講下呢部 Surface Book 在外型上有咩野特點先啦! Surface Book 用上了鎂合金製造，在尺吋方面，如果拆除鍵盤作為平板電腦的話，Surface Book 的尺吋為 220.2 x 312.3 x 7.7 mm，但係如果作為手提電腦的話 (即裝上鍵盤之後)，佢嘅最薄處為 13 mm，而最厚處則為 22.8 mm。至於屏幕方面，其實亦可以話係 Surface Book 的特色之一，Surface Book 採用了 13.5 吋、解像度為 3000 x 2000 (267 ppi) 的 PixelSense 屏幕，配備 1700:1 的對比度以及 100% sRGB 色彩空間，令畫面更加清晰，啲色亦都更能呈現出來。事實上，版主覺得呢部 Surface Book 本身的設計不錯，有筆有鍵盤，鍵盤的造工亦好精緻，最重要是有 trackpad。但問題係個鍵盤實在係有點重，連部平板都仲輕過佢，導致成部 Surface Book 俾版主的第一感覺係：好「墮手」! 呢點係版主認為 Surface Book 需要改善的地方之一。
▲ Surface Book 配備同 Surface Pro 4 一樣最新的 Surface Pen，筆尖同樣具備 1024 級壓力敏感度﹐以及減少了延時。
▲ Surface Book 採用了13.5 吋、解像度為 3000 x 2000 (267 ppi) 的 PixelSense 屏幕，提高對比度及畫面的清晰度。另外，你可以見到，Surface Book 運行 Windows 10 作業系統。另外，屏幕方面，你可以將佢反轉再重新與底座連接，唔單止得一種「玩法」。
▲ 如果就咁睇個機背，由於係銀色的關係，其實係有少少 MacBook Air 的 feel。
▲ Surface Book 的前方配有 500 萬像素前置高清鏡頭以及 Sensor，另外亦支援 Windows Hello 人臉辨識功能。
▲ 而 Surface Book 的機背後面則有 800 萬像素自動聚焦鏡頭，能夠支援 1080p 高清影片的拍攝功能。
▲ Surface Book 的頂部，你可以見到設有開關鍵以及音量鍵。
▲ 機的右側上方設有一個 3.5mm 耳機孔。
▲ 而機的左側你可以見到係乜都無嘅，所以以下會主要講個鍵盤。
▲ 佢鍵盤的轉軸設計其實非常獨特，令人一睇就認得出呢部係 Surface Book。
▲ Surface Book 配備了 Surface Connect 磁吸式專用鍵盤，毋須連接藍牙，一插即用。
▲ 如果想拆個鍵盤落黎，你只需按下紅圈內的按鍵，之後就可以輕鬆拆下 Surface Book 的鍵盤。呢種拆卸方式同其他平板電腦的鍵盤有點不同，版主稍後會有示範俾大家參考一下。
▲ 值得一讚的是，Surface Book 的鍵盤同 MacBook 的設計相似，都係會着燈的，而且可以自行調整亮度，方便就算在陰暗的環境下，都可以繼續使用。
▲ 作為一部筆電，TrackPad 絕對是非常重要的，而 Surface Book 鍵盤的 Trackpad 都幾大，同一張海洋公園的卡比較，大小如圖。
▲ 鍵盤的左側會有兩個 USB 3.0 插槽以及 SD 讀卡機。
▲ 而機的右側則有 Mini Display Port 以及充電插位。
▲ 版主對手比較細，不過大約都可以俾大家睇到個鍵盤大約的大小。
▲ 最後，睇完哂 Surface Book 以及鍵盤的外觀之後，咁版主都上手拎下，如果係平板模式 (唔加鍵盤) 的話，其實以 13.5 吋屏幕黎講，呢部 Surface Book 一點都不重。然而，如果加上左鍵盤之後，鍵盤的重量甚至比平板本身更重，導致拎上手的時候有啲「墮手」，仲重過版主部 13 吋 MacBook Air，如果話要拎出街的話，其實都會有少少唔方便。所以版主認為，鍵盤雖然係有特色，但同時亦係 Surface Book 的弊處之一。
同 13 吋 MacBook Air 相比，Surface Book 屏幕大，機身小
相信大家都好想知道，呢部 Surface Book 如果同 MacBook 比較的話，到底會出現甚麼現象呢? 不過軟件上就比較難比較，因為始終兩部電腦，一部行 Mac OS，另一部行 Windows，兩個唔同的 system 好難比較。唯一能夠可以做到相對公平的比較，就是外型方面。版主用自己的 13 吋 MacBook Air 同 Surface Book 做一個簡單的比較，發現雖然 Surface Book 擁有 13.5 吋屏幕，比我部 MacBook Air 還要大，但機身卻比 MacBook Air 還要小。不過缺點是，Surface Book 比 13 吋的 MacBook Air 還要重。
▲ 雖然 Surface Book 有 13.5 吋屏幕，而版主的 MacBook Air 是 13 吋，不過機身方面就反而 Surface Book 比較細一點。
▲ 而論厚度的話，因為同 MacBook Air 做比較，所以都係用番筆電模式的 Surface Book 比較會適合啲。其實 Surface Book 平板本身並不厚，不過加上鍵盤之後，就變得好厚。
Surface Book 鍵盤拆卸示範
你可能會話，唔係呀化，連拆鍵盤都要示範? 可能對你黎講，拆個鍵盤落黎好簡單，不過版主覺得 Surface Book 的拆卸方式與一般平板電腦的拆卸方式不同，而呢種方式令到個鍵盤比以往的更穩固。以往的 Surface Pro 4 的鍵盤，只係採用了簡簡單單的磁吸式設計，輕輕一拔就能夠拔個鍵盤落黎。而 Surface Book 不同的地方，在於佢係需要先按一個按鍵，等個按鍵着左綠燈，然後畫面仲會顯示「準備好中斷連接」，然後你先可以拆個鍵盤落黎。如果你想裝番個屏幕落個鍵盤度呢，仲簡單，就咁插落去就得，畫面上會顯示「已連接」，之後就可以開始使用。
Surface Book 鍵盤打字測試
如果話 Surface Book 係一部平板、筆電二合一的電腦，最基本的功能就是文書工作。而講到文書工作，打字舒唔舒服、鍵盤好唔好按，呢啲都好重要。尤其是好似版主咁，需要長期打稿的話，如果鍵盤唔好撳，真係會浪費左好多時間。而版主覺得，雖然 Surface Book 個鍵盤係就係重左啲，不過打起字上黎其實都幾順，唯一需要適應的是，因為版主用慣左 MacBook，突然間用番 Windows 的鍵盤，總是覺得有點兒不習慣切換輸入法的方式 (MacBook 當你打緊中文的時候，只要按 Caps Lock 就能夠打到英文，但 Windows 例如你用緊倉頡，你就要按 shift 鍵來切換)，但打起字上黎依然可以達至「啪啪啪」的效果。
小結
總括而言啦，今日版主親身上手感受過呢部 Surface Book，不過因為時間不多，未有機會詳細測試硬件性能以及系統的穩定度，所以只能從 Surface Book 的外型、鍵盤以及最基本的打字作出評論。對於用慣左 13 吋 MacBook Air 的版主來說，如果而家俾我揀，或者我依然會繼續用番 MacBook Air。最主要原因係，版主工作一定要用到鍵盤，但如果加埋鍵盤的話，雖然芒係 Surface Book 大啲，但佢嘅重量比 MacBook Air 仲要重，對於版主黎講會係有少許不方便。
不過，Surface Book 都有佢嘅實用性，佢有齊哂 Surface 系列的特點，配備左 Surface Pro 4 全新的 Surface Pen，場上亦有設計師示範利用 Surface Book 繪圖，並且打字感覺尚算流暢，作為一部工作機的話，呢部 Surface Book 都係一部唔錯的電腦。最致命的地方，相信係在於價錢方面，導致不少網友原本對佢好有興趣，但都因為價錢方面而卻步。唔知你又對 Surface Book 有咩野睇法呢?
在文章刊登時，Surface Book 的建議零售價為 HK $11588 起，按這裡有詳細規格及最新賣價。