開箱
呢部 Surface Go 2 其實係暑假時候已經推出，可能有唔少網友都知道呢部機，一部 10 吋屏幕主打流動性的 Windows 平板，集合輕巧和實用於一身的產品，對於本 YK 呢類 TECH GUY 黎講有著說不出的吸引力。
▲ 話明係開箱，肯定要有個紙箱比大家開；一共兩個紙盒，分別係機身本體以及鍵盤套。
▲ 手上呢款鍵盤套係橙紅色，摸上手質感相當不錯。
▲ 套面上刻有 Microsoft 字樣驗明正身。
▲ 是套也是鍵盤，從第一代 Surface 到現在的 Surface Go 2 可見微軟玩鍵盤套已經出神入化，佈局、工藝、功能都是市場上第一，暫時未見到有任何其他品牌的平板電腦鍵盤套可以超越佢。
▲ 擁有 8 個金屬觸點，能夠直接為鍵盤供電，提供可調光背光功能； 而對比藍牙鍵盤，這種直接連接方式能夠杜絕輸入反應延遲的問題。
▲ 玻璃面質感的觸控板，絕對係皮套鍵盤中最高，甚至超越絕大部分筆記本電腦；在 10 吋屏幕級別的平板電腦裡面，要在觸控板面積和鍵盤大小中取得平衡，實在是不容易，但 Surface Go 2 做到。
▲ 真機準備現身，首先見到一張示意圖，話你知道 Surface 系列的特徵：自帶企立支架。
▲ 隨機配件少得可憐，只有兩本說明書以及火牛，除此之外無其他配件。
▲ 一個 24W 火牛可惜不是採用 USB－C 接口充電，而是採用自家專用磁吸充電頭。
▲ 港版行貨就是採用英規三角組件。
▲ 真機登場！
▲ 鎂金屬外殼，磨砂質感就係正！
機身佈局一覽
▲ 後置 800 萬像素自動對焦鏡頭，影文件係好足夠；而前置 500 萬像素鏡頭，自然支持 Windows Hello 人面識別登入功能。
▲ 亮面打磨的微軟「視窗」標誌，簡約中的一點亮。
▲ 二合一的模式是 Surface 系列標誌性設計，Surface Go 2 同樣採用無段式角度調節，可以調節到接近 180 度打平。
▲ 功臣自然係成熟的鉸鍊技術，保持適當的阻尼，穩定支架同時亦能讓你流暢調節角度。
▲ 手上這部是 128GB 容量的版本。
▲ 支架下放隱藏了 microSDXC 讀卡器，過往幾代都採用這種設計。
▲ 機身左側乾淨光滑，只有一個開支架的凹位。
▲ 所有的 I/O 接口 都放在右側，包括 3.5mm 耳機孔，USB-C 數據接口，磁吸充電接口。
▲ 機身頂部是電源鍵和音量鍵，造工非常紮實。
▲ 磁吸鍵盤亦可以選擇兩種方式：第一種係平放鍵盤，第二種係吸住鍵盤達到一定傾斜度，有助緩衝敲打鍵盤的手感。
▲ 而鍵盤套本身都支持背光功能，仲要係三段式調光。
▲ 機 + 套合體後的樣子如圖。
▲ 合體後的機背質感相當高級。
各項性能測試
規格一覽
▲ 手上的型號是採用 Intel Core m3 8100Y 係 2018 年推出，雙核心四線程處理器，主打低功耗移動市場。
▲ 擁有 4MB L3 Cache 加持，屬於 14nm 製程技術產物。
▲ 成套野包括個 BIOS 都係微軟自己編寫。
▲ 記憶體 8GB 支持雙通道。
▲ 機身咁輕巧的平板電腦自然係唔會有顯卡喇，UHD 615 都算係萬年核顯。
開機速度
▲ 開機只需要 11 秒就完成系統啓動，而需要額外 18 秒載入其他預載軟件；速度黎講甚至比唔少商務筆電都要快。
綜合性能
▲ 再 Novabench 綜合性能測試中，手上這部 Surface Go 2 獲得 973 分，主要是處理器屬於低階型號，CPU Score 無可避免獲得低分，但 RAM 和 Disk Scores 測試結果都相當好。
SSD 測試
▲ 採用 eMMC 並非傳統 SSD 固態硬碟，所以無法準確識別出儲存裝置的資訊。
▲ 再連續讀寫結果中，Surface Go 2 獲得 1703mB/s 和 836mB/s 的成績；而多工隨機讀寫 （4K Q32T1）只有 219mB/s 和 190mB/s 的速度；我再望住成皮野的 HP 商務機速度，只能說 Surface Go 2 好波！
CPU 處理器性能
▲ 在 CINEBENCH R20 版測試中，Core m3-8100Y 多核心獲得 598 分；而單核心獲得 317 分，MP Ratio 只有 1.89x 略爲低於應有的 2x 比例。
GPU 圖像處理性能
▲ 在 BasemarkGPU 標準測試的 4K Vulkan 1.0 測試中得到 253 分。
▲ 而在 4K DirectX 12 測試中獲得 224 分。
電力續航測試
▲ 電池製造商是台灣企業順達科技 Dynapack （超人帝拿？），內建 26Wh 電量是十分少的水平，令人擔憂續航力到底如何。
▲ 呢部 Surface Go 2 無法透過 Imtec Battery Mark 獲得預測電量結果，顯示出 unknown 字樣； 而測試時間接近 2.75 小時，屬於罕見地短；意思係你 Chur 到盡部機係兩個小時多少少就玩完。
▲ 另外亦進行了 WiFi Youtube 播片耗電測試，測試環境和條件請參閱這裏；
▲ 過了一小時後，Surface Go 2 竟然還剩餘 90% 電量，由此推測符合官方所說的連續 10 小時續航力； 處理器針對影片播放的解碼令 CPU 負載不大，所以就會出現 Imtec 測試結果差，但 Youtube 播片測試結果好的情況。
其他體驗分享
▲ 鍵盤面積當然比較細，但佈局合理，亦好快可以適應上手；最吸引就係塊觸控板，順滑的程度跟蘋果電腦一樣，亦支持手勢操作；如果要說 Surface 系列的靈魂，鍵盤保護蓋絕對係其中一個核心中的核心！ 我在幾日的試玩體驗中，都可以好放心、好大力、唔需要就住就住咁打字，有幾多就出幾多，非常爽快的輸入體驗。
▲ 另一個超級驚訝的地方係前置雙喇叭，雖然喇叭只有 2 個，而且只有 2W 的輸出功率；但實際聽覺效果卻比其他平板電腦的 4 喇叭都要好；因爲 Surface Go 2 的喇叭設計是正面開孔，左右喇叭直線射聲入你耳朵，這個設計的立體效果擁有係最好，就像當年 HTC 手機的前置雙喇叭一樣道理。 所以我係用佢黎睇左好多片，投入感非常好！
總結
黎到最後總結，必須呼應翻標題對比 Samsung Tab S7 和 Surface Go 2 兩款機，亦係有 Patreon 課金 VIP 主動 PM 我問及的問題。 從造工和設計上兩者都相當好， Surface Go 2 採用一體化支架，而 Tab S7 就需要加個套落去，厚度增加。 而微軟身爲鍵盤蓋的元祖，Surface Go 2 的設計、佈局、以及觸控板（呢個真係正爆）細節上都比 Tab S7 優勝。至於觸控筆方面我就無從對比，我都無收到 Surface Go 2 的觸控筆，而 Tab S7 的 S Pen 配合相應的軟件係能夠滿足我日常文書需要，包括即時 PDF 簽名 、批改文檔等。
至於續航力考慮方面， Tab S7 續航力一日絕對唔擔心，出街翻去都仲有 40% 電量；但 Surface Go 2 就無咁多了，翻到去得翻 5 - 10% 係好平常的事，續航力 10 小時只適用於睇 AV 的情況。 對於 Patreon 課金 VIP 提出的對比，我估更多的是作爲平板採用 Android 和 Windows 10 系統的分別吧？ 老套講句係視乎你個人對平板的用途，如果你買部機係流動娛樂爲主，工作爲次要，咁 Android 系統的 Tab S7 會係你的選擇； 相反，如果你需要一部比筆電更迷你的裝置，平板 + 鍵盤的 Surface Go 2 擁有 Windows 系統的優勢，絕對比到你更全面的功能。
Windows 10 系統可以安裝各種功能強大的 exe 封包軟件，玩翻細個時候的「小朋友齊打架」都得，又或者係咖啡店內玩「叮噹大富翁」。好似我咁會經常用電腦進行錄音，每日分享最新的科技資訊比 Patreon VIPs，隨時隨地有一部輕巧的 Windows 裝置，可以安裝專業錄音軟件（目前 Android / iOS 都無），又要支持埋專業 USB-IN 錄音咪的話，輕巧的 Surface 系列成爲了最方便的選擇。 咁到底要選擇邊一部呢？ 只有小朋友先會做選擇，我就「全部都要！」