規格唔差賣價吸引！Nokia N1 大陸熱賣 5 分鐘售馨！
首先講少少有關 N1 的資料先，呢部平板本身係大陸首賣， 32GB 版本定價 1599 人仔（ $2000 蚊港幣唔使），結果第一輪兩萬部平板唔使 5 分鐘比人訂晒，反應非常好。事實上呢部平板規格真係唔錯同 iPad Mini 3 可以一拼，比例為 4:3 的 7.9 吋 IPS 屏幕解像度有成 2048 x 1536 像素，而且處理器用左支援 64 bit，並內建 PowerVR G6430 圖形處理器的 Intel Atom Z3580 四核心 2.3GHz 處理器配上 2GB RAM 同埋 32GB 內置容量。相機亦都唔失禮，有 800 萬像素主鏡頭同 500 萬像素前鏡，電池容量就係 5300mAh 兼且用上 Android 5.0 。難怪一推出唔少網友都話想入手啦！
▲ 正面來講， Nokia N1 相當簡潔，同一般 Android 平板差不多未算特別。
▲ 機背都好簡單，最顯眼就係個 Nokia logo 。而喇叭就置於機底部份，另外 USB 插槽用左最新的 Type-C ，可以用 Apple 的 Lightning 線一樣不分上下咁使用。
▲ 機身厚度方面厚度僅 6.9mm 。屏幕方面解像度達到 2048 x 1536 實在無咩好挑剔了。
Google apps 一應俱全但預設介面為 Z launcher
呢部國際版同大陸開賣緊的 N1 最大分別當然就係有 Google Service 啦！所以係呢部 N1 上面無論係 Play Store 定係 Play Music 都有齊晒，另外本身都預載左唔少歐洲人常用 app 好似 BBC News 、 TED 、Pinterest 同埋 Huffington Post 等等。另外值得留意就係本身 N1 介面係用上自家推出的 Z Launcher ，呢個 Z Launcher 用法同大家想用的 Launcher 有點不同，佢標榜能夠依用家使用習慣去排列桌面，但相信唔少朋友都想轉用返原生 Google Launcher ，其實 N1 本身亦內置左 Google Launcher 㗎，只要去 Setting 到清除 Z Launcher 預設設定就可以了。
▲ Z Launcher 其中一個賣點就係可以用手勢操作去搵想要的 app ，對平板來講係一個幾好用的功能。
▲ 軟體方面 N1 本身已預載 Andorid 5.0.2 ，亦係其中一項吸引之處。
最後，又到大家最關心的開賣細節啦，坦白講目前 Nokia 仍然係未有將 N1 係香港正式推出嘅消息，不過就有外國媒體收到消息過好可能 N1 係三月尾就會於英美兩地推出，定價係 250 美金左右（同大陸賣價相近）。版主覺得話晒呢部平板都係 Nokia 出品而且定價又唔係貴，如果係香港推出應該會有唔少朋友支持呀，唔信大家又點睇呢？不妨留言分享下啦。
在文章發佈的時候， Nokia N1 的發佈日期及賣價仍未確定，按此查看此機詳細規格及最新資料。