HONOR MagicPad 2 開箱評測
首先同大家由外觀設計講起，HONOR MagicPad 2 其中一個賣點係有大芒，採用咗 12.3 吋 OLED 大屏幕，解像度為 3000 x 1920，屏佔比為 92%，支持 144Hz 超高刷新率、1,000,000:1 對比度、10.7 億色，峰值亮度則為 1600nits，即使喺猛烈陽光之下，都可以大大提高平板電腦嘅可視程度。另外，屏幕亦支持 4320Hz 超高頻 PWM 調光，可以有效降低眼睛疲勞，同時亦獲得 TÜV Rheinland 無頻閃屏認證以及 TÜV Rheinland 低藍光認證。另外，HONOR MagicPad 2 支持靈動膠囊功能，這功能就有啲似 iPhone 個 Dynamic Island 咁，可以幫助你喺專注使用平板電腦嘅同時，唔會錯過任何信息，即時主動提供相應服務，提供效率，其中支持錄音、媒體播放、時鐘服務、影片美顏等系統服務。
HONOR MagicPad 2 用上咗超薄機身設計，機身厚度只有 5.8mm，重量則為 555g，有月影白以及星空黑兩種顏色，而我今次上手嘅，係月影白色，你可以見到機背會有如油畫一般嘅紋理，而微砂觸感更令機背細膩順滑，耐磨抗污。
跟機會送手寫筆以及鍵盤保護套，有得免費送贈係好事，但亦會有美中不足嘅地方。手寫筆同其他品牌一樣，當平板電腦橫向擺放時，都係可以吸附喺平板電腦嘅頂部，並可以做到無線充電功能。不過缺點係，當你平時拎出街唔用時，你又點樣可以妥善管理你枝手寫筆呢？如果任由磁吸頂部，會好容易跌咗唔見，而之前版主試過華為最新推出嘅 MatePad Pro，佢枝手寫筆既有得磁吸喺頂部，而專屬嘅鍵盤保護套，亦有個位置可以收納手寫筆，呢種設計會相對更佳，值得 HONOR 下代產品效法一下。
▲ HONOR MagicPad 2 包裝盒。
▲ 預載 Google Kids Spaces、支持 Hi-Res Audio 以及 Hi-Res Audio Wireless。
▲ 我手上的是月影白，內置 12GB RAM 以及 256GB ROM。
▲ 包裝盒內配件有充電火牛以及 USB 線，因為並唔係香港版，所以無謂影埋火牛隻腳了。
▲ 充電火牛支持最高 66W 輸出。
▲ 採用 12.3 吋屏幕，支持 144Hz 刷新率，並有一系列護眼功能。
▲ 屏幕橫邊會有前置鏡頭。
▲ 電源鍵以及音量鍵，頂部仲有兩個喇叭。
▲ 機背有後置鏡頭。
▲ 月影白會有一些特別嘅紋理，有少少似油畫咁。
▲ 支持 IMAX ENHANCED。
▲ 底部亦都另外有兩個喇叭以及 Type C 充電插槽。
▲ 買機會送 Keyboard。
▲ 裝咗 Keyboard 側邊係咁嘅樣。
▲ 仲有送埋手寫筆，吸附上方會直接充電，可惜係 Keyboard 配件無地方收納枝筆。
▲ 具有靈動膠囊功能，例如我 YouTube 背景播歌，然後做其他嘢，呢個位置會出現一個咁嘅膠囊。
▲ 撳一下個膠囊就會彈出一些快捷嘅操作。
HONOR MagicPad 2 性能跑分
規格方面，HONOR MagicPad 2 配備咗 Qualcomm Snapdragon 8s Gen 3 處理器，用上台積電 4nm 制程，無論工作、遊戲、3D 繪圖等多任務場景，都能應付自如。同時，平板電腦配備 12GB RAM 以及 256GB ROM，電池容量為 10050mAh，配合 66W 快速充電，令平板電腦具有超強續航能力，滿足一天出外嘅使用需要。咁到底呢部平板電腦性能如何，版主就會用一系列跑分軟件，將 CPU、GPU 等性能具體化，供大家參考一下。(去安兔兔網站下載 AnTuTu 3D，唔知做乜 Down 幾粒鐘都 Down 唔到，最後放棄。)
▲ PCMark 成績為 15914 分，性能相比小米 14 Pro 略低。
▲ 3DMark Wild Life Extreme 測試成績則有 3262 分。
HONOR MagicPad 2 其他實用功能
001：分屏顯示功能
作為一部平板電腦，多工任務係基本操作，而最簡單做到多工操作，就係分屏顯示，HONOR MagicPad 2 可以喺任意界面上滑觸發 Dock 欄位，切換屏幕、分屏一步完成。同時你亦可以自動調節懸浮視窗大小，令使用上有好似桌上電腦嘅體驗。
▲ 最多可以打開 2 個迷你視窗以及 2 個全屏幕視窗，共四個 App。
002：支持 HONOR Docs
文書工作，絕對係平板電腦嘅用途之一，而 HONOR 今次就全新推出咗一個叫 HONOR Docs (榮耀文件) 嘅應用程式，可以一個 App 做到常用嘅文字、試算表、Powerpoint 等編輯。
▲ 首次加入榮耀文件功能，方便用家可以做文書工作。
▲ 入面亦有個文件管理頁。
003：AI 降噪
透過 HONOR MagicPad 2 AI 降噪功能，AI 會自動識別你嘅聲音，過濾背景人聲以及環境雜音，適合平時去到戶外仍然要進行視像會議嘅上班一族。
004：手寫筆 + HONOR Notes
在初次使用時，只要將手寫筆放喺磁吸位置，平板就會問你係咪要進行配對，配對完就可以正式使用。初次使用因為我未更新最新系統版本，手寫筆寫唔到中文，但更新完之後就可以寫到，你亦可以透過全局手寫功能，在任何位置例如 Google Chrome 網址欄、地圖搜索欄等，在任何位置書寫輸入文字，配合 HONOR Notes，亦可以隨時隨地記錄或者進行繪畫，甚至可以手寫一些數學算式。
▲ 可以手寫輸入網址。
▲ 寫中文一樣得，打開地圖唔怕唔知邊度打 Badminton。
▲ 另外有快捷鍵可以打開記事功能。
▲ 可以將手寫公式變成文字。
▲ 亦都可以將你手寫嘅中英文，都變成文字，方便容易睇。