「點蟲蟲，蟲蟲飛」、「氹氹轉菊花園」、「落大雨水浸街」，呢啲童謠相信大家都可能聽過。版主虎仔最近收到朋友嘅轉載，相信來自一位長者嘅香港廣東話童謠合集，原來香港都有好多廣東話童謠，跳轉睇下 36 首裡面，有幾多你聽過甚至唱過？
[SEP]
為咗唔好俾佢哋失傳，有長者將佢哋記得嘅香港廣東話童謠結集，呢位有心嘅長者話希望代代相傳，其實啲歌詞咁得意，應該唱多啲，傳開去先啱！
月光光，照地堂；年卅晚，摘檳榔；檳榔香，嚼子薑；子姜辣，買蒲達；蒲達苦，買豬肚；豬肚肥，買牛皮；牛皮薄，買菱角；
菱角尖，買馬鞭；馬鞭長，起屋樑；屋樑高，買張刀；刀切菜，買籮蓋；籮蓋圓，買隻船；船浸底，浸親兩個番鬼仔；一個蒲頭，一個浸底；一個摸茨菇，一個摸馬蹄。
（1）
點蟲蟲，蟲蟲飛，飛到荔枝基；荔枝熟，摘滿屋；
屋滿紅，伴住個細蚊公。
（2）
排排坐，食粉果；豬拉柴，狗透火；貓兒擔凳姑婆坐；坐埋一齊唱支歌。
（3）
“凼凼”轉，菊花園；炒米餅，糯米團；亞媽佢叫我去睇龍船；
我唔睇，要去睇雞仔；雞仔大，搦去賣；賣咗幾文錢；
我買隻風車仔，佢轉得好好睇，睇佢凼凼轉啊菊花園，
睇佢凼凼轉啊凼凼轉啊轉。
（4）
ABCD，大頭綠衣；捉人唔到，吹BB。
（5）
落大雨，水浸街，亞哥擔柴上街賣，亞嫂出街著花鞋，
花鞋花襪花腰帶，珍珠蝴蝶兩邊排。
（6）
賣懶去，買精歸，賣左懶仔過新年，食過年飯好種田。
（7）
賣懶，賣懶，賣到年三十晚，人懶我唔懶。
（8）
細蚊仔，SIR滑梯，因住跌落嚟；咪學陳德貴，成日流鼻涕，
跌親籮柚唔好睇。
（9）
河邊有隻羊，羊邊有隻象，象邊有隻馬騮仔，好似你咁樣。
（10）
咬蔗鬚，要睇毛，短毛輸，長毛贏，冇毛唔算數。
（11）
搣開柑，數柑核，邊個核多就邊個贏，唔准手賴就縮骨。
（12）
拍大骳，唱山歌，人人話我冇老婆，扚起心肝娶翻個，有錢娶個嬌嬌女，冇錢娶個豆皮婆，豆皮婆，食飯食得多，屙屎屙兩籮，屙尿沖大海，屙屁打銅鑼。
（14）
呈沉剪，呈沉包，呈沉糯米叉燒包。老鼠唔食香口膠，要食豆沙包。
（15）
點指兵兵，點指賊賊，點著誰人做大兵，點著誰人做大賊。
（16）
估手指，要估中，邊個唔中，就唔中用，褲浪底見個窿。
（17）
騎牛牛，牛牛走，牛牛響前咪回頭，若然回頭就打籮柚。
（18）
大眼雞，鹹魚頭，你屙尿，唔洗手。
（19）
轆銅仙，打銅錢，全憑眼界手出變，叮響銅錢畀個仙。
打泥炮，泥炮響，唔使摣槍上戰場。
折紙機，麻鷹飛，飛嚟飛去唔落地。
（20）
趌跛跛，跛咗蹄，冇米煮，煮泥沙，冇屋住，住樓梯，樓梯有只鬼，
嚇到你嗊落床下底。
（21）
伸長手，頂手掌，死人都要頂硬上，依牙嘣哨就貓噉樣。
（22）
劈友，劈友，快啲走，走得快，好世界，走得嚤，冇鼻哥。
（23）
鬥遠掟石頭，因住咪甩手，石頭最冇眼，掟親唔好眼淚流。
掟磚頭，鬥大嚿，一掟掟到西門口，濺起浪花拋浪頭。
（24）
花手巾，真引人，基邊撈魚好過癮，一兜一條好手運，千祈唔好踎到你頭暈。
（25）
黐塘咪，塘咪飛，飛到菜田基，田基有條蛇，嚇親你兩仔爺。
（26）
一人騎膊馬，兩人騎豬乸，三步要埋頭，撞到面就打。
（27）
紅辣椒，綠辣椒，平時你嘴喵喵，今日你冇膽同我撩。
（28）
鬼叫你咁貪心，聞咗我個屁，嗍咗入個鼻，我要你賠翻二兩四。
（29）
Mei水底，摸泥沙，摸到泥沙當金龜，摸唔到喺契弟。
（30）
陳德貴，住得矮，床下底有只鬼，嚇到嗊抬底。
（31）
一二三，三二一，肥婆跳舞頂第一！
（32）
黑面李逵，紅面關公，三國水滸亂哂龍，打敗清兵系英雄。
（33）
乞兒仔，畫烏龜，一人一筆咪亂嚟，最後嗰個正衰仔！
（34）
大笨象，摣支槍，去打仗，打完仗，翻嚟食碗辣椒醬。
（35）
有隻雀仔跌落水，跌落水，跌落水，有隻雀仔跌落水，被水沖去。
（36）
肥仔個頭，大過五層樓，肥仔隻手，細過荷蘭豆。
資料來源：長者安居協會