呢個網友 Jason 早於聖誕前已多次問本 YK ：為何會開機會出現漫長的自動修復、會自動重啟之類的問題，我都好心一一教佢跟住個芒逐一修復，但到最後都係搞唔掂，機都開唔到，我就叫佢盡快去 Lenovo 的維修中心。 我對呢件事咁上心，其實...... 當初係我推介呢位網友買 ThinkCentre 產品，所以我......唔再講了，講翻件事。
▲ 網友在 Lenovo 官網入手，11 月 29 日買，聖誕前已送到。
Jason 跑去位於長沙灣的維修中心，原來當日職員已同佢講，如果係軟件出問題導致重新安裝 Windows 10 系統，會收取 100 元的維修費用。 事後問翻，佢話當時電腦死左、上到 CS Centre 收乜費用都梗係整左先再講，等住用機唔通上到去唔整咩。 聖誕假後，Lenovo 維修判斷結果係重裝 Windows 就解決了問題，需要付款 100元。 呢個網友屬於電腦白痴類別，所以本 YK 當日係星巴巴嘆茶都好，都叫佢駁 CS 的電話給我了解情況。
▲ 網友買的是圖中 ThinkCentre M720p 自訂規格版，並加錢升級做 3 年保養。
當日我與客戶服務人員的通話我有錄音，內容大意如下： Lenovo 香港的公司政策，任何軟件問題不包保養，重裝 Windows 可以解決的問題一律當作軟件問題。我隨即追問維修師傅能否判斷這次的送修原因，是否網友的操作失誤而出現故障？ 客服話無法回應，因為佢唔係維修部。 而我再問，如果出廠軟件有出現衝突、或聯想自己預載的軟件出現偶發性故障，是否也不包保養？ 客服只重複：重裝系統可以解決的問題，一律當作軟件問題，而軟件問題是保養不包，每次需要付 100元的安裝費用。
▲ Lenovo 出張收費單確實係 100 蚊，作為維修師傅辛勞的安裝費。
我向客服表示擔心下一次會出現同樣的情況，導致資料、時間、金錢等不必要的損失。客服表示可以幫忙留機在維修中心運行一兩天視察情況，如果沒有問題再取回主機。事後 Lenovo 話確認沒有出現問題，網友 Jason 唯有上維修中心排隊，比 100 蚊取機就離開。本 YK 都希望事情可以告一段落，都唔想呢位網友變成常山趙子龍。
但今日核心問題來了：到底電腦軟件出問題，保養係咪真係唔包呢？
本 YK 孤陋寡聞，真心未聽過廠機分開軟件、硬件保養咁樣處理。電子野就係硬件同軟件架啦，一係硬件壞、一係就軟件出問題。 手機產品唔理你客戶裝乜軟件、系統點樣死、硬件點樣壞，總之就分人為同非人為，後者保養先包。 我記憶中的 Lenovo Think 字頭產品係隨時可以上 CS 借復原光碟，比你慢慢洗機。我 Google 一下，有人遇到類似問題，其他網民甚至回覆話，保養一路都係只包硬件唔包軟件，呢個答案確實震驚 13 億人民～
本 YK 趁著仍然有聖誕新年假期 MODE，走去逐個電腦大品牌放蛇問一次，到底軟件出問題包唔包？ 咁各位網友以後買電腦時都可以作為一個參考嘛～ （以下回覆排名不分先後）
一、ASUS 網上客服對話功能
▲ 第一位佳麗係 ASUS，客服話電腦無法開機正常都唔需要收費。
▲ 再問得準確少少，保養期內軟件問題都唔需要收費。
▲ 客服人員更主動關心本 YK 的「壞機情況」。
二、SAMSUNG LiveChat 諮詢平台
▲ 到三星，也是很快就連接上客服。
▲ 難道經大學購買會有不同的保養條款？
▲ 呢位客服睇黎好想第一時間將自己的心聲傳遞給本 YK～
▲ 過保 / 非自然因素要收錢，其實我都知，好合理的做法。
▲ 姐係硬件出事就包，咁軟件呢？
▲ 到最後，如果軟件出現問題就要交比維修中心判斷跟進了...... 姐係無答案要睇情況。
三、DELL ONLINE CHAT 平台
▲ DELL 最爽快，客服話軟件、硬件乜春都包，連部分第三方軟件（如 Microsoft Office）炒左都會有 N 展支援你。
四、HP 電郵查詢
▲ HP 竟然無 ONLINE CHAT，要電郵發過去問，但第二天就收到回覆。
▲ HP 保養期內又係乜春都包，上門幫你整埋佢，不另行收費。
五、Acer 保養條款寫明
▲ Acer 清楚寫嗮保養條款，問都唔需要問，軟件安裝係唔包保養的，非記錄中預載軟件都係唔包的。
六、VAIO / Avita 電郵查詢
▲ 負責 VAIO 及 Avita 產品的 Nexstgo 回覆本 YK 查詢時，話如果因為原廠系統問題而需要重置 Windows 系統係免費，但不包括非原廠因素。
▲ 而官方網站亦清楚寫明，保固只是硬體保修的服務，其他野唔包。
總結
無人想電腦壞，尤其對於電腦白痴級別的網友黎講，搞電腦慘過做趙子龍，無機用都係一個問題，最怕係資料無嗮；更怕係明明死機已經夠慘，但同你講原來要額外收錢。 本 YK 都戴翻個頭盔先， 上面官方的回覆唔代表一世都係咁，如果擔心的話最好買機之前再聯繫官方人員取得最新、最準確的回覆。買乜機？ 你識揀啦～
唔知其他網友又有產品保養中伏經驗呢？ 齊齊分享下，等其他人見到免中伏啦～