將發佈 Apple Watch ， 18K 金版本最平 8 萬蚊！
如果話今次 Apple 發佈會有乜嘢產品可以肯定係會發佈的話，咁一定非 Apple Watch 莫屬啦！因為 Apple 係上年發佈 iPhone 時已表明 Apple Watch 將會係 2015 年春季推出，而且當時已經提到定價將會係由 349 蚊美金起跳，亦即係最平 $2700 港幣左右，估計所指的就係用上膠錶帶，主打運動功能的 Apple Watch Sport 。除左知邊款最平，相信大家都好想知用上不銹鋼錶殻的普通版 Apple Watch 同埋最貴以 18K 黃金製造的 Apple Watch Edition 會係大約幾錢。價錢呢個 Apple 高度重視的機密大家當然都唔會知啦，但都可以估下嘅。 Apple 產品爆料權威 John Gruber 相信 Apple 會為三個版本的 Apple Watch 提供 38mm 同 42mm 錶面兩款錶面大小供買家選擇。而且估計普通版的 Apple Watch 價錢最低都要 700 美金（約 $5429 港幣）而用上 18K 黃金的 Apple Watch Edition 就會索價最少 10,000 美金（約 $77,568 港幣）。早前亦有消息知，中國大陸嘅天貓會同步發售天價 Apple Watch ，唔知有無得炒，睇怕真係到 3 月 10 號先知了。
更輕更薄， 12 吋配備 Retina 屏幕 MacBook Air 都會發佈？
除左 Apple Watch 之外，今次發佈會另一個焦點就係傳聞會發佈的 12吋 MacBook Air 啦。一般相信 12 吋版本的 MacBook Air 將會比目前 11 吋的 MacBook Air 更輕同埋更薄。另外，唔少人都好期待呢部 12 吋 Mac 機將會加入目前 MacBook Air 仍然未有的 Retina 屏幕。但係在更輕薄的同時外國媒體 The Verge 就估計係呢個情況下 Apple 只會係呢部超薄 MacBook Air 上加入耳機插孔同埋 USB Type-C 插口一個！早前華爾街日報就提到呢個新型號的 MacBook 將會係 4 月至 6 月期間開始出貨，如果報導屬實的話，咁 3 月 9 號的 Apple 發佈會亦相當有可能係 12 吋 MacBook 的發售日。
搭載 Broadwell 處理器，MacBook Air ＋ MacBook Pro 都會升級？
唔止傳聞中的 12 吋 MacBook Air ，唔少人都好期待 Apple 會藉今次發佈會同時為目前的 MacBook 同 MacBook Air 帶來規格上的提升。隨住 Intel 第五代的 Core i 處理器 Broadwell 推出，唔少朋友都好希望 Apple 會將呢個新型號處理器帶到 MacBook 同 MacBook Air 上面。而 Apple 係發佈會上宣佈更新 MacBook 產品線呢個可能性其實都有，因為之前網上就流傳住部份疑似係用上 Broadwell Core i5 1.6GHz 處理器同 4GB RAM 的 13 吋 MacBook Air ，所以今次發佈會上大家如果見到 Apple 推出規格加強左的 MacBook Air 都唔需要驚訝呀。
產能問題，加大碼 12.9 吋 iPad Pro 發佈機會微
到最後就係 iPad 啦，早前有傳聞話 Apple 正係密謀推出一部比目前屏幕更大的 12.9 吋 iPad Pro 。不過相對 12 吋 MacBook ，呢部加大碼 iPad 係 3 月 9 號發佈會推出的機會就應該唔大啦。因為最近彭博就透露受到屏幕產能問題影響， Apple 被逼將 iPad Pro 推出計劃推遲到 15 年 9 月先能夠正式推出。想換 iPad 的朋友睇怕今次發佈會會令你失望了。
最後總結一下目前有關 Apple 3 月 10 號發佈會的資料。如果以可能性來區分的話， Apple Watch 作為今次 Apple 發佈會的主菜，基本上都可以肯定會推出。而 12 吋版本的 MacBook 都有一定的推出機會，至於為目前 MacBook 同 MacBook Air 產品線升級都可能係今次發佈會的重點之一。不過相信大家都知道 Apple 的保密功夫一向做得幾嚴謹，要事前得知 Apple 推出乜嘢新產品實在唔容易，大家都係密切留意 Apple 的發佈會好了。
最後版主 Keith 千叮萬囑叫我同各位網友講，3 月 10 號凌晨，ePrice.HK 會同大家直直擊發佈會一切，留意當朝新聞及分享，有機會得到 Apple 相關產品一套，用緊 iPhone 與 iPad 嘅網友，會特別啱用。所以呢幾日，要留意 ePrice 版主們嘅分享啦。
來源：The Verge 、appleinsider 、Daring Fireball