好喇，首先講下外型方面。喺外型方面，呢隻 Huawei Watch 個樣一啲都唔似係一隻智能手錶，反而我會覺得同傳統嘅手錶無咩分別。Huawei Watch 採用了圖形的錶面設計，喺好耐之前版主 Lawrence 都同大家提過，呢隻 Huawei Watch 嘅機身係有三種顏色，分別係黑色、銀色同埋金色，而且你亦可以自行選擇皮革或者金屬製嘅錶帶，隨時幫佢「換新衫」都得! 而今日版主上手測試左兩隻銀色機面嘅 Huawei Watch，一隻配搭銀色嘅金屬錶帶，另一隻配搭黑色嘅皮革錶帶，帶上手又唔會覺得好重，絕對適合唔同年齡層嘅消費者。
▲ Huawei Watch 嘅正面圖，可以見到佢嘅機身採用左圓形的設計，並採用了 1.4 吋 AMOLED 400 x 400 解像度嘅屏幕，而個人認為呢個設計為隻手錶增添左時尚嘅感覺。
▲ Huawei Watch 嘅背面有心跳感應器及充電磁石。
▲ 錶嘅右上方，大約兩點鐘方向，會有一個開關鍵，個人認為如果帶左手會方便一些。
▲ 銀色嘅金屬錶帶，錶扣位置會寫住 HUAWEI。
▲ 黑色嘅皮革錶帶。
▲ 版主帶隻錶上手俾大家睇下個效果係點。值得一提嘅係，呢隻 Huawei Watch 嘅防護安全級別為 IP67，代表呢隻手錶能夠完全防塵，並可放入最深 1 米嘅水入面約 30 分鐘。
咁講完佢嘅外型，咁係時候上手試下佢嘅功能。首先你按一下開關鍵，你就會見到有個時鐘嘅界面。唔中意個界面? 小問題啫! Huawei Watch 為你提供左超過 40 款嘅錶盤界面，好簡單一個動作，只要你長按時鐘嘅界面，咁你就可以自行轉換錶盤嘅風格，既方便又岩你心水。
▲ 預設的錶面，你唔中意可以長按更換。
▲ 長按出現錶面選擇畫面。
▲ 幾個版主比較中意嘅界面俾大家參考一下。
咁如果你無用藍芽連接 Android Wear 嘅話呢，隻手錶嘅基本功能有設定 (Settings)、日程 (Agenda)、鬧鐘、步數計算等等。
▲ 從右邊向左撥，可以見到基本功能表。
▲ 有設定、日程、鬧鐘、步數計算等功能。
咁以下版主就會為大家示範一下 Huawei Watch 點樣做到測試心跳嘅效果：
▲ 為大家示範一個心跳探測嘅功能。
▲ 按入去 Heart rate，你就可以見到呢個畫面。
▲ 按一下個心心圖示，就會見到寫住「計算中」(Measuring) 嘅字眼。
▲ 如果手錶綁得唔夠鬆，可能會 detect 唔到心跳，佢會提示「Tighten hand and keep wirist still and level. Try again」，即係叫你要緊啲同埋要拎高隻手，並且要固定，再嘗試一次。
▲ 咁版主再嘗試多一次，終於得左，每分鐘 90 下心跳，好彩都算正常哈哈!
好喇，入正題喇! 正題就係，頭先都講過呢隻 Huawei Watch 係可以支援 Android Wear，咁到底連接左 Android Wear 之後可以有咩功能可以玩! 首先第一步呢，我地就要同時將 Huawei Watch 同埋你智能手機嘅藍芽開左佢，然後做 pair up，pair up 完之後呢，你就可以透過 Android Wear 有效咁使用你嘅手錶。
Huawei Watch 功能 (1) : 通知推送功能
只要你連接左手機嘅 Android Wear，你就可以設定喺手錶上嘅通知推送功能，例如如果有人喺 Facebook Messenger 度 inbox 你，或者有人 send email 俾你，你都可以喺手錶上見到通知。版主之前試過一隻型號為 LG-118 嘅手錶，唔支援中文，對於香港人黎講係一個弊處，而呢隻 Huawei Watch 就支援繁體中文，咁就方便得多。版主我就親身示範一下收通知俾大家睇。
▲ 版主朋友喺 Facebook 發送遊戲邀請俾我，我可以喺 Huawei Watch 上收到通知，並支援繁體中文。
▲ 向上撥可以見到其他通知。
▲ 總之手機上收到咩通知，手錶上都一樣可以見到。
Huawei Watch 功能 (2)：「OK Google」
呢個其實亦都係一般 Android Wear 手錶嘅賣點之一。只要你喺手機嘅語音輸入 set 番做廣東話，咁你就可以對住隻 Huawei Watch 講聲 「OK Google」，咁佢就可以解答你嘅問題。不過目前 OK Google 嘅功能始終都仲未夠多，基本做下記事、set 下鬧鐘、問下天氣，呢啲功能都做到嘅，但再複雜啲嘅問題就好難解答到喇!
▲ 對住手錶講「OK Google」。
▲ 問佢：「天氣」，佢就會連接你嘅手機，同你 Search 下天氣嘅相關資料，然後可以喺手錶上睇到有關天氣嘅資訊。
▲ 向上掃可以見到更多同天氣有關嘅網站，如香港天文台。
以下我就俾大家睇下 Huawei Watch 嘅規格詳情，等大家可以更加了解呢款 Huawei 手錶：
▲ 更多有關 Huawei Watch 嘅規格詳情。
唔知大家睇完之後，有無開始對呢隻 Huawei Watch 感興趣呢? 版主呢，就幾中意呢款嘅智能手錶，佢外型靚不在話下，最重要佢嘅功能都算強大，足以滿足版主嘅基本需要。至於售價方面，Huawei Watch 嘅售價尚未公佈 (不過，外國有網站話賣 HK$27xx 左右)，大家有興趣就要等下。你又點睇呢?