而小米手環 2，代表了最新一代 （YES 不是第二代，因為嚴格來說，中間還有一款光感版)。而手環亦代表佢唔會好似智能手錶咁，真係有大大隻錶面，仲可以顯示好多圖案及文字，手環代表一切功能都從揀。第二代小米環，相比第一代，就係多了 OLED 顯示屏幕，還有一個觸控按鈕，就係呢少少改變，令小米手環 2 可用性更加高。好啦，在分享之前，不如用下面個表，分享一下三代小米環係功能上不同之處，了解一下小米手環 2 多了什麼。
| 小米手環 | 小米手環光感版 | 小米手環2 | |
| 續航力 | 30 天 | 10 天 | 20 天 |
| 心律偵測 | X | O | O |
| 顯示 | 燈號 | 燈號 | 0.42 吋 OLED 芒 |
| 控制 | 敲擊 | 敲擊 | 觸控按鈕 抬手顯示 |
| 功能 | 運動偵測 睡眠偵測 來電震動 手環鬧鐘 手機解鎖 |
運動偵測 睡眠偵測 來電震動 手環鬧鐘 手機解鎖 心跳偵測 |
運動偵測 睡眠偵測 來電震動 手環鬧鐘 手機解鎖 心跳偵測 久坐提醒 |
先談佩戴感
圖片已簡單說明，小米手環 2 有乜用。不如來個實錶寫真，之前講講手感。其實，用得小米手環，香港賣價二百蚊有找，都知道佢唔會俾到真正手錶嘅感覺。全隻錶都係膠就預咗。我記得用第一代 Sony 手環個陣，用左半日成隻跌係街，但小米手環 2 唔會發生，因為佢好似錶帶咁，用穿扣方式戴上手，我用了五日，未試過跌落地。而試用呢四天都係三十幾度高溫，但戴著部位都無出晒汗，配戴感十分唔錯。
▲ 小米借來的黑色手環，好合版主的低調性格。
▲ 若果沒有時間顯示，我係唔會用小米手環 2 的。但時間顯示，又不是 Always On，你要搖一部手機先會顯示時間，當然你還可以按掣。我覺得係最基本睇時間呢個部份，都算係方便嘅。
▲ 採用穿扣方式。中間的小米手環部份，可以拆出來充電。
▲ 要使用專用充電線。
▲ 小米手環可 2 可以顯示什麼資料？包括時間、步行 Steps 次數，電量，心跳等。
講功能
小米手環 2 最好用嘅功能，都係同健康無關。首先，一定係時間。都帶得係手，時間顯示好重要。基本上，佢會跟番手機個鐘，睇時間無乜好講。另一個功能，就係做到手機嘅來電通知、SMS 及即時通知送上手環，基本上，所有 App 嘅 Alert，都可以透過揀選，推送到手環，再用震動提示。講到來電通知，原來佢可以做做到頭幾響聲不送到手環，有乜用？好似我用開「小熊來電」有時騷擾來電，點都要響一、兩下才被攔截，呢個 Delay 震動嘅功能，估唔到有佢特別用途。而其他 Apps 嘅通知，都有少少 Bugs，就係多 Add 了幾個 Apps 後，手環會出唔到 WhatsApp 個 Logo，全部 IM 都係一個信封。。。至於其他與健康有關嘅功能：步速偵測、心跳偵測，最好是可以 Set Goal 目標，睇下每日有無達得到，例如世衛建每日要行八千步，我就要努力達標了。係咁多健康功能上面，Sleep Tracker 同久坐提醒都係幾有趣。Sleep Tracker 好多智能手環都有，用來計算你睡眠質素，版主真係差到爆。而 久坐提醒，即係可以 Check 你係咪坐得耐過頭，叫你行番幾步呀。最後要講講電量，版主收到 Sample 有七十巴仙電量，用到第六日，才要叉電，還是 5％ 才充。即係，用一星期才充電。這才是手環應有的電量呀。
▲ 係用之前，你先要登記做小米會員，同埋輸入你的個人資料，其實只係用來計算你的健康指標。若你只係想佢做 alert 功能，咪亂填一通囉。
▲ 可以設定來電、SMS 或不同 App 嘅 alert 震動提示。
▲ 你亦可設定手環顯示什麼資訊。
▲ 你的健康資料，可以跟 Google Fit 同步，但你唔可以用 Google Fit 代替小米 Mi Fit 呢個 App，即係一定要用佢。
小米手環 2 會由即日起，係小米官網發售：文章刊登時，賣價為 HK$199。