其實三個月前，版主已發現香港麥當勞已可以用手機落 Order 叫餐。唔係「麥麥送」外賣，係餐廳叫餐。 By pass 咗櫃枱、自動販賣機，你可以係手機用 「麥當勞」App 點餐同俾錢，之後再等餐出，全程唔駛排隊！叫餐都快過人。
要手機落 Order 叫老麥，首先你要去 Apple Appstore 或 Google Play Store 下載「麥當勞」香港呢個 App (下載連結：Android | iPhone)，做一次會員登記，就可以叫餐。「麥當勞」App 叫餐程序，其實跟自動販賣機無乜分別，同樣可以點餐廳裡面全部食物飲品，仲有「少冰」「走醬」等細項選擇。
用手機叫餐，有幾個好處：
001： 格最平價。大家都知老麥定價好有趣，單叫未必貴過叫餐，用 App 你可以試完唔同嘅組合，試到最平才confirm，無人係後面排隊，你計到盡先落 Order 都 OK!
002：儲起我的老麥最愛。版主聽過，某記者去快餐店食飯永遠只叫同一款配搭。若果你都係呢類「Forever 豬枊強＋細可樂」嘅人，呢個 App 可以幫你 Save 低做「我的最愛」，咁你以後可以極速叫出「豬枊強」組合啦！
003：手機 App 仲可以幫你記得你叫過的每一餐，你係咪窮到餐餐 24 蚊餐，定係日日都食 signature 貴包，一次過記錄晒。
▲ 「麥當勞」App 裡面，有晒現時有得叫嘅餐單及食物資料同組合賣價。
▲ 用 App 訂餐，除左信用卡付款外，都可以揀用現金嘅。
用 QR Code 確定 Order
用 麥當勞 App 揀完餐到俾錢。你可以選擇用信用卡係手機攪掂，接受 VISA 、Mastercard 同 JCB，仲可以 Save 低常用卡，唔駛下下再入 Card Number。最後一個 Step 就係要掃 QR Code。暫時來講，呢個 QR Code 會貼係入口當眼處，你用手機照一照呢個 QR Code，Order 就會 Confirm，你即時收到 Order Number。份餐做好，你就可以跟 Order Number 取餐了！
▲ 訂餐最後一步，就係要照一照門口「訂餐簽到處」嘅 QR Code。將來，麥當勞可考慮將呢個 QR Code 貼在枱上，咁你可以坐底再慢慢叫餐！
版主教路，慳時間大法
版主了解過，其實分店門口 QR Code 代表一間老麥，假設你去開朗豪坊辦公大樓返工，又去開朗豪坊個間老麥，你有兩部手機，可以用副機影低個門市 QR Code 作記錄。係 Office 裡面，你未出門口，已可以幫全 Office 同事叫單，最後再照之前影低嘅 QR Code，咁呢間老麥即時同你造餐。你再慢慢落樓下，去到門口，話唔定要整好晒，等緊你。呢個先叫超級方便呀！
▲ 照完 QR Code，仲可以揀堂食定外賣，以上面 Case 來講，當然係外賣之後，手機會收到訂單號碼。你用呢個號碼去取餐就可以啦！
▲ 即日登記仲有優惠架！ 按呢到就知。