自助保安閘口是大伏
好似版主成日飛嘅人，都知道，一入機場禁區，本來有人對一對你嘅 Passport (或者回鄉證）再加 Boarding Pass，呢個措施，全球機場都有做，同埋必需，防止唔係要坐飛機嘅人，誤入機場禁區範圍。以前用人手 Check ，Check 完就算，唔會有實體紀錄。但最近變了！由 2018 年 9 月開始，入禁區前會多了一排自助保安閘口，唔駛人手，過程要先 Scan 你嘅 Passport 或回鄉證，Boarding Pass，仲無啦啦要影你相。老老實實，ePrice 兩個版主，大仙 YK 跟 go to school by airbus 嘅 Wilson 都唔知原來呢個可能係大伏！
機管局無重點講解當中私隱問題
根據上年唔少嘅報導，香港國際機場係上年，即 2018 年 9 月 20 日正式啟用自助保安閘口。當時以「採用生物特徵技術，為離港旅客進入機場禁區前核對證件」為賣點。「香港機場管理局強調，香港國際機場自助保安閘口，是為提升整體旅客體驗而推出的最新智能措施」。「自助保安閘口備有證件閱讀器及鏡頭，可代替相關的人手程序，讓旅客自行掃描證件及登機證，透過容貌辨識技術核對資料，整個過程約在 20 秒內完成。」而根據機場管理局網頁對機場自助保安閘口嘅個人資料收集聲明，寫明佢地會：
「收集你的個人資料（包括你的相片、全名、出生日期、性別、國籍、出生地點、登機證所示航班資料及當前的容貌特徵）並由相關系統處理，以供進入機場禁區，以及作自助保安閘口和輔助通道私穩政策聲明所詳載的其他用途。」
但亦有列明：「你乘搭的航班離港七天後，所有可用以識別你身分的資料將從我們的系統刪除，惟為保障機場使用者及航空保安目的、獲授權人士或監管當局就民航運作而提出要求者則作別論。」
換句話講：若果你透過「自助保安閘口」進入機場禁區，你嘅個人資料，係會被機管局保留七日之多，而當中獲授權人士或監管當局，可以要求提取你嘅個人資料」
當中獲授權人士或監管當局，可以要求提取你嘅個人資料
當中獲授權人士或監管當局，可以要求提取你嘅個人資料
當中獲授權人士或監管當局，可以要求提取你嘅個人資料！好重要，要講三次
你有權唔用
但有趣嘅係，私隱聲明又講到明：「如你不希望我們收集你的個人資料，請前往輔助通道及將有關意願告知職員，在此情況下，我們僅會收集匿名資料（而非個人資料）作統計分析用途。」即係用番人手核對資料，你嘅個人資料，包括你的相片、全名、出生日期、性別、國籍、出生地點、登機證所示航班資料及當前的容貌特徵，都唔會被儲七日，都唔會有人可以提取。
你又會話：我又唔係犯法，有乜好怕。都係一句，個人資料係私隱來，其實機管局係無需要備份你嘅資料七日咁多，呢個措施，根本係 More than enough，多一個備份，多一個機會被人偷。你唔會犯法，我明，你又點知，有無黑客有一日醒到 hack 咗機管局電腦系統，偷晒你資料呢？
有得揀，記得用番人手 Counter 啦
資料：ezone / 香港機場管理局