在疫情之後，香港嘅虛擬銀行開始發圍。我早前搶先開咗天星銀行，感覺麻麻。但呢間叫做 Mox 嘅新虛擬銀行，服務未有，但夠晒有型。Mox 其實係由渣打銀行香港牽頭，再配上香港電訊 HKT 及 PCCW，仲有 Ctrip，大銀行味道最濃，所以推介都係夠晒潮，唔係一味用低息。
即日起，只要你係頭 3000 個登記用戶並成功開戶嘅，就可以得到限量版嘅黑卡，呢張係 mastercard 來，絕對可以用來碌，但性質唔係信用卡，係 Debit 卡嚟，你有幾多錢就可以碌咁多錢咁解。
MOX 主打嘅係全亞洲第一張全功能無號碼銀行卡 Mox card，只係你收到嘅卡上面無號碼，所有資訊都只係喺你個手機 App 到睇到，一個唔小心唔見咗張卡嘅，唔洗打上 CS 只係用自己嘅電話 App 就可以鎖到張卡，大大減低俾人盜用嘅風險。講返，除咗 Mox，WeLab Bank 都有出無號碼信用卡架。
Mox 受香港金融管理局監管嘅虛擬銀行。不論存款金額多少，年期不多於五年嘅存款都受到香港存款保障計劃保障，最高可獲港幣50萬元嘅擔保。
咁點申請？首先，你符合以下資格，你便可以開立 Mox 戶口，若果你係首三千名，就會有黑卡：
- 持有香港身份證
- 擁有有效嘅香港居住或郵寄地址
- 年滿 18 歲或以上
▲ 不過呢，其實只係收到 confirmation email，仲要等 Mox 再多封 email ，confirm 你係三千名以內先至有得攞黑卡！咁你仲唔快走登記？