開戶前言
如果你唔知道乜野係 WeLab Bank 的話，咁你已經脫離潮流，請乖乖地睇翻版主 Keith 之前的介紹文，本 YK 之前都係 WeLab Bank 官網登記輪候名單，但遲遲未有通知。日前手痕走去下載定佢個 App 後發現，竟然可以註冊，可以偷步註冊呀！ 咁本 YK 自然快手咁做晒三部曲：多角度影身份證、自拍眨眼、填寫個人資料，但結果原來要等審批。 正當打算刪除個 App 時，突然短信通知我話成功開戶，果然命運就係喜歡如此開玩笑。。。
WeLab Bank 虛擬銀行
其實香港有好多虛擬銀行，以中資背景的衆安銀行 ZA Bank 和天星銀行 airstar 暫時最活躍（本 YK 都已有戶口）。呢次實測的是 WeLab Bank，註冊過程相當簡單，開戶通過審批後注資方法亦可用 FPS 轉數快進行，三個銀行開戶、注資大同小異。 而 WeLab Bank 最吸引的地方是提供 MasterCard Debit Card 實體卡給用家，當正信用卡到處碌，當然 Debit Card 前提係你戶口要有足夠錢。
▲ 以上係 WeLab Bank 登入後的畫面，見到你有幾多錢，有埋錢銀進出記錄；暫時我小賭落左 1000 蚊，但聽晚會大賭做李嘉誠落爆佢。
▲ 而設定畫面都簡潔，最大路的調整額度、更改密碼 / 指紋等都有，推廣設定本 YK 建議選擇 SMS 同 email 兩個方法，避免錯過有乜限時著數資訊。
虛擬 + 實體 Debit Card
一開戶口已經有虛擬卡比大家，裏面有晒卡號以及驗證碼，可以直接用黎上網買野了；但如果要落鋪的話，就需要申請實體卡； WeLab Bank 的提款卡結合 MasterCard 功能，而且卡面無號碼確保私隱。
▲ 張實體卡本 YK 依然申請中，聽說要等 5 - 7 個工作天，所以唯有收卡後補圖比各位。
▲ 留意啦，張實體卡可以到處抽插攞現金，JETCO 同 CIRRUS 標誌的 ATM 就可以攞錢；而你提款和消費額度都可以直接係 App 裏面設定，呢個設計同外國 Debit Card 做法一致。
定存產品「 GoSave」= 高息？
到左大家最關心的錢，到底標題講的十萬送千一係乜玩法？ 事關好多朋友之前都投訴話其他虛擬銀行都係玩高息，但結果原來係上限封頂金額，而且後續高息計劃又唔多，搞咁多開個戶口玩咩！
雖然群情洶涌，但都只能怪佢地上錯車。 而 WeLab Bank 的存款產品「GoSave」，睇條款係做 3 個月定期，新客戶頭 10 萬有額外 + 2% p.a.，而餘下金額最高可以 2.5% p.a. 計算！ 你出去行個圈就知道，咁方便的定存產品真心「夫復何求」 ~
▲ 定期存款產品 GoSave 就好似一部紅 Van 咁，但呢次係一部 60 座的紅 VAN，你上車前睇清楚到底架車幾時開車、開去邊度、開幾耐。
▲ 以呢個班次爲例：目前上車已有 53 人，「目前年利率」係 2.25%p.a.，而如果人數達到 60 人，「目前年利率」會提升到 2.5%p.a. 水平； 而開車時間係 6 月 23 日或者坐滿就開車，而車程係 3 個月。
▲ 值得留意係，新客戶頭 10 萬蚊係加 2%p.a. 變成 4.25%p.a. 或者 4.5%p.a.，也就是你放 10 萬落去出黎會有千零蚊。而後續餘額的金額會以「目前年利率」計算，也就是最少 2.25%p.a. 或最高 2.5%p.a.。
▲ 所以，本 YK 咁就放左十皮落去，留意翻個目前年利率寫 2.25%p.a.，但其實最後會有可能升到 2.5%p.a.；而額外的 2%p.a. 利息就需要到期後 6 至 8 星期內現金回贈比翻你。
▲ 編號 159 的紅 Van 剩餘最後一個名額就可以開車！而據了解定存係 1000 萬封頂，呢個額度比其他對手都要大方得多！
實測總結：
暫時睇落，WeLab Bank 個定期存款產品「GoSave」最有趣，雖然估計唔係日日可以開車，但勝在玩法新奇，而且入場門檻低，最少玩 10 蚊最高玩千萬，多有多放少有少入、大小通殺無難度。 雖然環顧其他對手同日內提供的 3 個月年利率定存唔超過 2%p.a.，但勝在可以隨時開隨時做、時間長短自訂。
到底 WeLab 後續係咪可以日日開車呢？ 其他對手又會點回應呢？ 而我張實體卡何時會到手，又有乜咁好用呢？ 大家拭目而待喇！ 題外話，到底點先開到戶口？ 一定要 VIP 或內部員工親屬先得？ No，其實 WeLab 未正式開業，但你如果係官網有登記 email 排隊輪候的話，就會陸續收到邀請開戶通知，又或者好似本 YK 咁試下突襲註冊喔 ~
後記補充：
我頭十皮已經開車的「目前年利率」變成 2.5%p.a. 喇（姐係有 4.5%p.a. 爽喔~），而下一車竟然係立刻出現，祝各位 WeLab 友「日日有車開，個個老司機」 ~