Uber 同 HKTaxi 有乜唔同？
講起 Uber，其實 Uber 本身都有個服務叫 Uber Taxi，畀你叫去的士，最近見到佢哋改埋哂啲奇奇怪怪名，變咗做「優步小黃」。而佢哋價格比起一般叫 Uber X 私家車平少少，而且係按路程固定收費，唔使驚司機周圍兜路收貴咗你，出發前你已經知道實價。而 HKTaxi 就唔同，如果你打開佢哋嘅 App，只會見到佢係寫住「估計：$XXX-$XXX」，只係大概嘅數值，實際幾錢都係跟咪錶去計，真係遇到唔好嘅司機，帶你兜路，咁可能就會因此而貴咗。不過呢，如果有時你住嘅地方比較偏僻，例如元朗嘅村屋咁，Taxi 未必肯駛入去，比較難叫車，所以 Uber Taxi 同 HKTaxi 都未必會啱用，呢種情況就需要叫 Uber X (而家叫「菁英優步」)。
至於付款方式部分，Uber 係用 Apple Pay / 信用卡 / PayPal 付款嘅，而如果係 HKTaxi 呢，你可以揀用現金付款，亦都可以喺個 App 度用 Apple Pay / 八達通 / 信用卡付款。另外，而家 Citi 信用卡有同 HKTaxi 合作，表示話程程有賺，每階段可享高達 $120；而 Uber 就可能相對較少呢類型嘅優惠了。