早喺 3 年前，我哋曾經有介紹過 Arlo Essential 家用夜視攝影機，雖然你話市場上早就有好多唔同品牌嘅家用攝影機，而且基本上好多都做到好似 Arlo Essential 有嘅功能，但好多時搵到嘅都係國產，想搵一部非中國製生產線嘅家用攝影機，Arlo 可以話係一個唔錯嘅選擇。佢係一個美國品牌，唔單止有出攝影機，仲有出電子門鈴，而其中今次呢篇文章嘅主角，就係 3 年前推出 Essential 室內攝影機嘅第二代版本，而且同場仲會連同戶外攝影機帶來開箱。
升級 2K 解像度、支持雙向通話、夜視功能提升
到底今次 Arlo Essential 室內同埋戶外攝影機 (第二代)，為大家帶來乜嘢升級呢？首先講下佢哋嘅 Essential 室內攝影機 (第二代)，佢係一款帶有自動隱私保護功能嘅產品，透過 Arlo Secure 應用程式，可以直接將保護盾調整至閑置模式，隨時保持私密性。而喺畫面質素方面，佢仲升級至 2K 解像度，清晰度比高清畫面高兩倍，支持 130 度寬廣視野，同時具有雙向通話功能嘅降噪音訊，好似有啲老人家自己喺屋企，有時會突然老人癡呆覺得自己唔見嘢，不停左搵右搵，你可以遠距離透過呢個室內攝影機同佢哋清晰咁溝通，都係相當有用。另外，攝影機仲有夜間功能，就算無燈光都可以清晰捕捉影像，並且內置警報器，可以選擇自動觸發警報器，或者通過 Arlo 應用程式手動觸發警報器。最重要係，呢個攝影機相當容易設置同安裝，只需插入並直接連接 WLAN，就可以隨處安裝使用。
而戶外攝影機 (第二代) 都有好多賣點係同室內攝影機相同，包括 130 度視角、支持雙向通話嘅降噪音頻、內置警報、簡便安裝等等，同時具有一體式聚光燈，可以在門口亮起燈光，趕走不速之客，並將夜視功能升級，可以看到彩色的影像，而非傳統的黑白影像，可以更容易識別室外狀況，並且耐用性高，可以抵禦高溫、嚴寒、日曬雨淋，比較適合住村屋人士使用。
Arlo Essential 室內、戶外攝影機開箱
▲ 左邊係 Essential 室內攝影機 (第二代)，右邊係 Essential 戶外攝影機 (第二代)，從右上角可以見到，兩者都係支持 2K 解像度。同上代一樣嘅係，第二代同樣係需要拖電線，而唔係充電款。
▲ 香港行貨係由 WINCO (PACIFIC) LIMITED 為總代理，維修需要出示發票正本以及保用證，所以要將呢張保用證貼去收據度，並保存妥當。
▲ 有唔少相似嘅功能，都係支持 2K 解像度、有動作偵測與警示功能、有雙向音訊功能，室內款有自動化隱私保護盾，而戶外款則有整合式聚光燈，可以嚇走不速之客。兩者都內置警報功能，不過喺室內款嘅包裝盒上就無特別標明出嚟。
▲ 室內款盒內除咗實機，仲有 1 個電源轉換器、1 個牆用固定座與螺絲套件以及 1 份快速入門指南。
▲ 而戶外款則除咗實機，仲有 1 條室內 USB 充電線、1 個牆用固定座與螺絲套件以及 1 份快速入門指南。