香港未合法！小米推 $2000 有找電動滑板車 暗示香港將立法？

版主之前曾經同大家分享過，有時我放假無事做嘅時候，都會出去送下外賣賺下外快，我自己就做步兵或者單車手嘅，不過有時見到有啲南亞人或者其他外賣仔，騎住電動單車或者滑板車去送外賣，又慳力又快手，睇到我好葡萄，只係因為香港一直未有牌，揸電車未合法，有風險，時不時會被捉，變相我都繼續聽聽話話，正正經經踩單車或者行路就算。雖然香港都仲未合法，但估唔到小米就高調喺香港推出電動滑板車，$2000 有找，問題係，都唔合法，出嚟又係乜玩法呢？唔通小米收到風，香港就快會立法？想知詳情，睇下文啦！

小米香港推出電動滑板車 4 Lite (2 代)

最近留意到小米香港推出咗一款電動滑板車，叫做 Xiaomi 電動滑板車 4 Lite (2 代)，香港建議零售價為 $1999。但有趣的是，香港電動車仲係未合法，到底連法例都未通過，小米無視法例推出呢款電動滑板車，係乜玩法呢？雖然我知道，喺香港就算唔合法，有心要買到，都唔難，但一間咁大間嘅公司，居然高調將呢款電動滑板車賣街，呢點就有少少出奇。到底係 Marketing 擺烏龍出意外，抑或其實小米收到風，香港就快為呢類電動車立法呢？真係令人耐人尋味。

小米電動滑板車 4 Lite (2 代) 硬件規格

不過，既然佢唔出都出咗，咁都講下佢咩 specs 啦！其實講到呢類車，最主要都係睇到底佢幾快，同埋佢可以踩到幾耐，即係俗稱續航能力。呢款電動滑板車 4 Lite (2 代) 續航里程長達 25km，最高時速亦都可以去到 25km/h，即係如果你開到最快，就可以連踩一個鐘。同時，呢款滑板車配備 10 吋充電輪胎，就算崎嶇不平嘅路面上行走，都可以有效吸震。 另外，佢亦有雙煞車系統，包括前鼓煞以及 E-ABS 後煞，流線型馬鞍式設計配合承重量高達 100kg 的高強度碳鋼車架，令到騎行更加穩定。佢亦具備高亮度頭燈，可以有 2 至 8 米照明範圍，確保夜間騎行可以睇清楚街道，並且有尾燈，提醒後方行人和車輛。最重要嘅係，呢款電動滑板車簡單三步即可輕鬆摺疊，可以節省空間，並具備 IPX4 防濺水等級性能，而電池的防濺水等級則達 IPX6 以上。