開箱大吉！
呢款盒子有別於大陸版，不論係規格和性能上都有明顯既提升，稱得上係香港定製版黎：四核心處理器、原生 4K 輸出，2GB RAM 加 8GB ROM，運行 Android 4.3 樂視香港 UI，仲有 USB 3.0 加持，硬件上明顯比大陸版強好多。
▲ 開箱當然有個箱。正面通通都係英文，睇黎應該係香港版無錯！
▲ 白色硬紙盒外面套上藍綠色的卡紙帶，包裝比起一般國產盒子簡潔和美觀得多。
▲ 背後既資料都係英文黎，「LBA-010-HK」產品型號說明呢個係香港版。下方位置見到一堆認證同產品重點特色。
▲ 盒內有既野包括：LeTV Box PRO 機身、專用遙控、HDMI 線材、說明書以及英規三角變壓插頭。
▲ 既然係香港版，所以說明書當然會有繁體中文啦！
盒子外觀一覽
其實外觀上，港版 LeTV Box PRO 同大陸版其實真係無咩分別，都係四四方方灰、黑配色。因為大部分既升級都係內部規格而非外觀，盒子大小唔算特別細，但放係香港人細小既客廳內，我覺得唔會太佔地方。
▲ 如果你話同其他盒子有咩唔同，我會覺得係個遙控，按鈕特別多，操控性都比較好。
▲ 正面有開關鍵同訊號燈。
▲ 盒身右側有兩大認證標籤：Dolby 和 dts。
▲ 機身至於左側就有一個 USB 2.0 插口，同埋標準 SD 卡插槽。個人覺得採用標準 SD 比細卡更方便，方便在於小弟相機其實全部都係 SD 卡黎，一插就出到相片唔使煩。
▲ 背面 I/O 就相當齊備：電源 DC-IN、LAN PORT，HDMI 輸出、USB 3.0 接口 ( 國內版無的 )、光纖頭、3.5mm 音訊接口。
▲ 底部當然係一堆參數貼紙啦，同埋有四個防滑軟膠腳。
▲ 跟機既遙控比一般電腦遙控細小，同其他盒子比較，按鍵比較多。按鍵感實在，而且不容易按錯 ( 我屋企小米盒子既遙控就非常容易摸錯制～ )
▲ 遙控本身已經帶有兩顆 AA 電池，一買翻黎就開機用得。
預載樂視香港 UI
呢款 LeTV Box PRO 預載既系統係 Android 4.3，採用樂視香港 UI，姐係同香港樂視發售既超級電視擁有同樣既界面、同樣既內容、界面自然係繁體中文啦。
▲ 我接駁 HDMI 是輸出 4K 畫面訊號到樂視既 4K 電視，大陸盒子只能夠輸出 1080p。呢個界面好熟悉，因為同樣都係港版 UI。
至於網友們想要既更多既節目內容，甚至要求同大陸睇齊 ( 這個應該不可能吧，版權問題～)。樂視有回答我提問，亦透露將會係九月有另一波新內容加入香港樂視，當中會包括鬼佬劇。咁我就先留名睇九月既消息發布，咩話？ 你問我係邊套？ 小弟又點會知道呢？ 自己上樂視個 Facebook 追問啦！
總結：主打正版盒子
小弟從來都只會鼓勵人買正版野，但目前香港人買電視盒子，都係貪佢可以以極低既成本，配合坊間既破解技術，就睇到大陸版權既外購劇 ( 好複雜～)，例如日本動漫、歐美劇集和電影等，我相信無咩買盒子既香港人會考慮「尊重版權」這個議題。樂視香港官方將 LeTV Box PRO 主打香港唯一正版行貨盒子，我想是在說版權正版的問題。個人認為如果一定要考慮買電視盒子的話，樂視盒子應該是唯一的選擇。雖然有網友說目前香港樂視片源比較舊和選擇少，但其實對比起小弟家裡的小米盒子 ( 非破解版 ) 已經叫做好多了，畢竟後者只能做小型的 Android HTPC。當然如果用破解版盒子來對比 LeTV Box Pro，肯定是破解版盒子更平更抵玩啦，但要我用侵犯版權既野？ 可能有網友中意掛～