成班老友睇戲，做乜要揀又一城 MCL?
或者網友的想法會跟版主不同，在版主的心目中，一班朋友去睇戲，價錢都係其次，最重要的是交通方便。要知道，出到黎社會做野，好難真係搵到個個都住同區的同事，唔好講工作，就算係讀大學、大專院校，都已經係咁。好似版主咁，我住大埔，有些朋友住九龍，有些甚至住港島咁遠，約親睇戲好多時候都會選擇啲「中間站」，例如旺角、九龍塘等等，叫做住邊區都比較方便。而 MCL 今次在九龍塘新開的 FESTIVAL GRAND CINEMA，位於又一城，取代了 AMC 戲院 (溜冰場果層)，一出地鐵車閘，上幾條電梯就到，就算落雨無帶傘都無有怕。
▲ FESTIVAL GRAND CINEMA 是 MCL 院線旗下全新打造的品牌，亦是院線的旗艦店。在購票處，雖然聽日先正式開幕，不過已經可以見到有不少人排隊預購戲飛。
去 FESTIVAL GRAND CINEMA 睇戲，價錢又如何呢?
FESTIVAL GRAND CINEMA 有三種不同的影廳，分別為普通影廳 (2 至 7 號院)、配 Dolby Atoms 的 1 號影廳以及 VIP 影廳，而去呢幾間戲院睇戲，又貴唔貴呢? 就以 6 月 8 日晚的 2D 電影《十萬水急》為例，聽日 7 點 20 分會有場，三號院成人價為 $95，相比油麻地百老匯電影中心的 $85 略貴，但相對方便，網友會唔會選擇?
▲ 《十萬水急》聽晚 7 點 20 分，成人價為 $95，呢個價大家覺得貴唔貴? 版主就認為正常價囉，唔會話抵，亦都唔係平，其優點係方便。
▲ 以上價格只作參考，除左因應片長關係調整之外，時間亦係影響的因素。如果普通 2D 電影，早場收費其實只係 $60，呢個價錢我覺得係 OK 的。
FESTIVAL GRAND CINEMA 同一般戲院有啲乜野唔同？
要介紹一間新戲院，當然都想了解一下，到底呢間戲院同一般的有乜野不同。而版主認為，又一城呢間 FESTIVAL GRAND CINEMA 最吸引的地方，其中一樣就係小食部，除了有一般戲院有的食物，如爆谷、熱狗之外 ，仲有不少特色食物，係其他戲院搵唔到的。另外，洗手間的環境，好影響版主對戲院的印象，整體來說版主對洗手間很滿意，唯獨係廁格太少，呢個係一個缺點。
▲ 首先同大家講下，到底呢間戲院有啲乜野係其他戲院無嘅？小食部就間間戲院都有，但好似呢間 FESTIVAL GRAND CINEMA 咁多「度心訂做」的特色食品，就真係未見過。
▲ 同大家分享一下部份的特色小食，包括芝士撻、自家製曲奇、朱古力果仁脆劃以及忌廉湯，當然其實唔止，仲有自家製杯裝蛋榚 (熱情果椰子忌廉味)、牛油曲奇泡芙條等等。版主試過忌廉湯，覺得味道都可以接受，但版主質疑，如果個個都拎住芝士撻、曲奇呢類食物入場睇戲，啲香味會唔會影響到其他無得食嘅人呢?
特色美食及飲品一覽：
| 特色美食／飲品 | 價錢 |
| 自家製杯裝蛋糕 (熱情果椰子忌廉味) | $30 |
| 自家製泡芙配吉士醬 | $28 |
| 朱古力果仁脆片 | $58 |
| 牛油曲奇泡芙條 | $28 |
| 自家製曲奇 | $38 |
| 芝士撻 | $50 |
| 忌廉湯 | $28 |
| 冷壓果汁 | $58 - $70 |
▲ 除左食之外，洗手間亦都係一樣非常重要的東西！洗手間個環境好唔好，好影響版主對呢間戲院的印象。好彩，呢間戲院個洗手間環境不錯，感覺好似入左酒店的洗手間咁，係抵讚的！不過版主加少少個人感受，就係廁格少左一點。
新影院導覽：大中華區首間採用 B&W 專業 Hi-Fi 級音響的影院
上面就同大家講左價錢係點，普通影廳 (2 至 7 號院) 的價錢其實係可以接受的，而一號院就相對貴少少。至於 VIP 影廳，就真係十分貴，睇套 2D 電影都要成二百幾蚊，到底佢值唔值呢個價錢呢? 版主而家就帶大家睇下一號影廳同埋 VIP 影廳！
▲ 全新又一城的 FESTIVAL GRAND CINEMA，總共有「7 + 1」間的「無機房」影廳，即係 1 至 7 號影廳，另外加一間 VIP 影廳。1 至 3 號院位於一樓，而 4 至 7 號院以及 VIP 影廳則處於二樓。
▲ 買完戲飛之後，就可以搭電梯上去。
▲ 全新品牌 FESTIVAL GRAND CINEMA 中間有個 GRAND 字，上到去見到成個設計都如其名般好「GRAND」下。
▲ 當中的 BEA House 1 (因為同東亞銀行合作，所以一號影廳同埋 VIP 影廳都係以「BEA」命名)，係院內最大的影廳。
▲ 一號院一共有 341 個座位，後面頭枕部份剛剛好能夠托住個頭，挨落去幾舒服。雖然座位有少少硬，但整體來說感覺都算良好。不過缺點係，前排同後排之間的距離比較窄，如果睇戲的時候，有觀眾要行一行開去個洗手間，就唔係咁方便。另外，一號院並沒有「拍拖位」，情侶入戲院想 Kiss Kiss 無人知都唔得了!
▲ 同之前海怡 MCL 一樣，都係採用了「無機房」操作，雖然成本係貴啲，不過佔的空間無咁大。
▲ 一號院並設有 4K 數碼電影投影系統、3D 立體數碼播放系統以及 Dolby Atmos 杜比全景聲音效系統。至於 2 號院至 7 號院，則採用了 Dolby 7.1 數碼環迴立體聲音響系統。
▲ 睇完一號院，咁就去 VIP 影廳參觀下。FESTIVAL GRAND CINEMA 的 VIP 影廳，其實係講緊佢嘅隱藏式專業 Hi-Fi 級揚聲器，而 FESTIVAL GRAND CINEMA 亦是大中華區首間配備 B&W Bowers & Wilkins 專業揚聲器的影院。
▲ 一入到去，第一件事唔係見到戲院的座位，而是會先經過一間貴賓室，有梳化等等，睇完戲可以同朋友坐低吹陣水。
▲ VIP 影廳並唔係好大，只有 18 個座位。
▲ 天花有好多小燈泡，望上去感覺好似睇緊星咁。
▲ 座位同其他影廳的無得比，更加舒服，軟綿綿的，係真真正正的梳化椅。
▲ 座位的側邊會有得控制椅背以及腳踏的斜度。
▲ 調較到成張床咁訓係度睇戲都得，真係好嘆，舒服過張床，話唔定會舒服到睇睇下訓着覺。
▲ 座椅右邊會有個餐盤，而餐盤下方則有兩個 USB 插槽，可以為你的智能裝置進行充電。
一號影廳、VIP 影廳版主後感
一號院就有 Dolby Atmos 全景聲音效系統，而 VIP 影廳就有 B&W 專業 Hi-Fi 級揚聲器，咁其實實際聽的感覺係點呢? 版主親身試過覺得，Dolby Atmos 全景聲相比 B&W 揚聲器的音效，感覺還要正，更有 feel，因為真係可以感受到聲音從四面八方傳到你耳邊，而 VIP 影廳的 B&W 揚聲器音效，我認為比較平淡，缺少了澎湃的感覺，不過呢啲都係好主觀的感覺。至於睇戲的舒適度方面，無可否認，VIP 影廳的座位一定秒殺一號院，不過單憑這點，試過一次之後，未必能夠打動到版主會再俾兩舊幾水坐 VIP 影廳，反而一舊水左右的一號廳，版主覺得會更值得考慮。
另外，要注意的是，幾乎所有的影廳都係收唔到任何數據網絡 (版主試過，csl. 都係收唔到的，3HK 收到 2G，但慢到上唔到網，等於收唔到) 以及 Wi-Fi，雖然話就話去睇戲本身都無乜必要用手機，不過如果其他人有緊要事搵你的話，呢點就會比較麻煩一點。不過，新戲院有咁多美食，加上交通方便，能唔能夠吸引到網友去親身體驗下呢?