「注意：為左方便大家，以下會用第一身遊記方式 + 少量技術解說，等大家睇得輕鬆少少。各位團友坐穩喇，我地正式出發！」
首先點入 MCL 數碼港？
數碼港位於港島南區，原本係發展數碼產業的地方，結果變成一個環境清幽、海景宜人的住宅和商場娛樂地區，裡面有個好大的草地，拍寫真一流，仲有適合狗公們的狗公園，空氣清新海風又爽。 如果你想週末去一個遠離自由亂行的遊客地方，數碼港算係其中一個。但要到數碼港，一般而言你要先到香港，然後再轉車入去，以下係常見的交通工具：
| 巴士 | 30X 42C 73 73P 107P 970 |
中環至數碼港（循環綫） 北角至數碼港 赤柱至數碼港 香港仔至數碼港 紅磡至數碼港 蘇屋邨至數碼港 |
| 小巴 |
10 10P 58 58M 69 69A 69X |
銅鑼灣（謝斐道）﹣ 數碼港 銅鑼灣﹣數碼港 香港仔﹣數碼港﹣港鐡堅尼地城站 貝沙灣－數碼港－ 港鐡堅尼地城站 鰂魚涌（船塢里）﹣數碼港 香港仔﹣數碼港 銅纙灣（駱克道）﹣數碼港 |
咁本 YK 就選擇左另一個常見的交通工具：自己揸車入去。而需要留意係數碼港有免費泊車，但需要消費 100 元送一小時，200元送兩小時，然後竟然封頂！ 好在 MCL 數碼港的顧客呢兩個月有好處： 8 月 30 日完結前最多可以獲得 4 小時免費泊車！ 一條龍睇戲食飯啪啪啪，我拍手掌開心咋，優惠內容下面自己睇喇：
| 項目 | 詳情 | 折扣或優惠 |
| 假日泊車優惠 (優惠適用於星期六、日及公眾假期) |
出示「MCL數碼港戲院」票尾2張並於「數碼港商場」內任何商戶或食肆單一消費滿$100或以上 | 可享「數碼港商場」3小時免費泊車服務 |
| 出示「MCL數碼港戲院」票尾2張並於 「數碼港商場」內任何商戶或食肆單一消費滿$200或以上 | 可享「數碼港商場」4小時免費泊車服務 | |
| 消費禮遇 | 出示「MCL數碼港戲院」票尾於「數碼港商場」之參與食肆消費 | 優惠詳情可參閱「數碼港商場」網頁 |
| 於「數碼港商場」參與食肆消費滿$150或以上 | 可享「MCL數碼港戲院」正價電影戲票9折優惠 |
▲ 呢個係數碼港商場喇，以前戲院係右邊入，但宜家 MCL 數碼港改為左邊入，見到橙色個牌嗎？ 入去商場就是了。
▲ 沿住室內斜坡行上去就見到 MCL @ Cyberport 個牌，你無去錯地方喇！ 細心的網友見到橙色「LUXE」字招牌嗎？ 呢個時候可以攞出你的銀兩去買飛嚕。
新戲院大堂格局係點？
▲ 揸住你心愛的張飛，沿著樓梯行落去就係「大食部」以及各院入口。
▲ 你抬頭會見到一個很有趣的「立體顯示屏」，播放緊各種電影預告。
▲ 其實係用風扇式轉動顯示技術，欺騙你肉眼而產生連貫影像，呢個係數碼港商場搞出黎的玩意黎，哈哈。
▲ 紅色黑色為主調的佈置，戲院大堂保留了最大的空間；你睇現場大家都自動分組隔離 1.5 米，好似係。
▲ 重點係，只有 1 號院係「LUXE: A RealD Experience 影院」，而 2 和 3 係 MCL 的 FX 影院； 4 仔就係家庭影院；稍後本 YK 會逐一入去大鬧一翻。
現場有好野食嗎？
放心，肯定有好西比你食！ 除了傳統的爆谷汽水熱狗之外，MCL 數碼港仲加入「台式芝士滷肉撻」（獨家供應）、「植物肉漢堡包」、「天多利雞墨西哥卷」，仲有手工啤酒可飲，其實 ME 係咪去錯左西餐廳呢？
▲ 對比普通戲院的物價水平，今日 MCL 數碼港個價錢好吸引 ~
▲ 紅白酒都有，手工啤酒更加係主力產品； 正所謂「入場如登機」，飲翻兩杯入去可能以為自己比「黑寡婦」插緊，兩刀。
▲ 肉球團從來都係本 YK 最愛；畫面後少少果個係植物肉漢堡包，有興趣朋友可以一戰。
食飽之後去邊度？
入場睇片？ NO，食飽之後當然要去廁所啦！ 但本 YK 只能報告男廁實況，女廁就交比女巴打黎個賽後報告，歡迎 PM 我詳談。
▲ 寬闊的排隊空間，適合天下英雄豪傑逐個俯首稱臣。
▲ 冷氣十足的廁格空間最適合思考人生。
4 號院 Family House 實況一覽
▲ 以上係 4 號院的座位圖，留意座位分佈是最少 2 + 1 親子佈局：你同另一半打出「雙雙」或者「大三元」都仲可以坐埋一齊睇，如果你地玩埋「大四喜」就幫你唔到了 ~
▲ 每排座位之間有 1.5 米寬行距，小朋友就好難踢到前面張凳；最多五人相連的玩法，絕對唔會超出「 8 人限聚令」！
▲ 此影院配備杜比 7.1 環迴立體聲系統，但最值得欣賞係，哪怕你坐係最前排 + 最角落，依然擁有良好的「視角」體驗（如上圖）。
2、3 號院 FX House 實況一覽
▲ 以上分別係 2、3 號院的座位圖；兩者其實好相似，但一樣有暗伏，毒 L 千奇唔好買錯！ 稍後會解釋。
▲ 米黃加藍灰 Buttkicker 震動座椅，配合 Atmos 杜比全景聲系統，畫面射出黎係 4K 鐳射投影，屬於 MCL 自己的 FX 影院。（圖為 3 號院）
▲ 最高一排座位視覺依然優秀，並沒有太大的距離感。
▲ 但最前排的可視角度就略微辛苦了，需要較大幅度側頭。
▲ 其實 2 號院望落去同 3 號差不多；
▲ 毒 L 們留意如果黎睇戲，左右兩側係屬於情侶卡，座位中間係毫無阻隔架！ 所以唔好買錯位呀，同女黎一定一定一定要買呢個位！ 至於同仔黎就。。。睇你自己造化了。
▲ 座位行距絕對夠造，本 YK 身高一米八都可以寬闊有餘、翹黎翹去都無難度。
1 號院 LUXE: A RealD Experience 祕密睇！
終於黎到 1 號院，號稱全港第一個 LUXE 影院，而且係採用 RealD Ultimate Screen（譯名：終極銀幕），並非普通的 Precision White Screen 精準白銀幕技術喔 ~ 終極銀幕優點係銀幕更高的反射率，你睇到的畫面會更光亮通透、而且光線分佈更平均，減少以往中央光亮邊沿黯淡的問題，同時光亮度又自然柔和不刺眼。簡單一句：好東西。
▲ 記住，只有 1 號 House 先係 LUXE 影院。
▲ 以上 LUXE 影院的座位圖，可見規模係四院中最大。
▲ 題外話，MCL 數碼港其實係 6 月 16 日正式開幕，你見到呢篇文的時候已經開左幕喇！
▲ 當你見到咁 L 大個 LUXE 燈牌就知道自己無去錯地方。
▲ 留意翻，呢度個個都要做毒 L 喇，無情侶卡、無家庭連座，等你可以專心毒自睇電影，感受下 LUXE 的視覺效果啊！
▲ 呢塊 20 米 X 10 米的終極銀幕其實大有來頭，係美國 RealD 3D 公司技術結合 MIT 台灣製造，皆因銀幕對光學鍍膜和納米量子鍍膜技術要求含量極高，連大導演李安都自豪咁話過「呢個 Moon 」係佢家鄉製造出黎 ~
1）普通銀幕反射率約 50%，但 RealD 終極銀幕反射率超越 90%；
2）畫面光度分佈更平均，減少以往四邊趨暗的視覺缺陷，坐邊位都唔怕黑了；
3）畫面效果的提升在 3D 電影更明顯；
▲ 睇左一場簡短的放映會，RealD 的終極銀幕係正：「黑寡婦」的美貌更亮麗、身段更立體、動作更少殘影，畫面上 LUXE 影院確實提供到極佳的享受； 但值得留意係，影院雖然採用杜比全景聲系統，喇叭數目過半百，但本 YK 實際觀賞時的聽感是：聽覺重心比較前傾，導致聲效宏觀立體感並不強，但亦有可能是片源限制所致，睇黎過幾日要再黎睇多次！
▲ 介紹翻，上面幾套就黎上映的 3D 大作都係有 RealD 技術參與，要睇最好畫質享受自然係去 LUXE 影院睇啦！
睇完散場有乜總結？
作為香港首個 LUXE 影院，MCL 數碼港戲院配套功夫都比足大家，好食好睇好享受，如果係定位假日親子活動、或者自己一個活動都不失為一個好選擇。 RealD 終極銀幕的視覺效果比傳統戲院銀幕好太多，亮度和通透的差異非常明顯，值得大家課金入場感受一翻，遺憾係今次未有機會試睇 3D 電影，本 YK 決定擇日再戰三百回！
撇開 LUXE 影院，相信擁有情侶卡的 2、3 號 FX 院都係唔少網友的心水；有細路的網友就請直入 4 號院，前後排一律視角優良睇得舒服。可惜係因為武漢肺炎病毒，影院裡面依然不能暢飲勁食；提醒網友多一樣野，MCL 數碼港一樣會做消毒工作，而你無戴口罩都唔比入場的。
忘記講大家最關心的票價，我只係知道原本 140 蚊的 LUXE 戲票宜家變成 60 蚊一張，唔知個優惠做到幾時，所以我會狗衝多幾次睇飽佢先。如果你肯玩早場 / 夜場更加係 50 蚊；而學生一律 40 蚊，如果時光可以倒流，我都會帶女友入去啪啪啪啪，為睇到一部好戲而大力鼓掌支持。