實地考察
▲ 全新 ACX Cinemas 戲院位於北角最新的大型商場「北角匯」裡面，巴士直到「北角碼頭總站」；觀塘渡輪過海亦是直達北角碼頭；地鐵北角站 A1 出口過馬路就係； 我實測過，全部落車、出站、落船後跑 30 秒就到達商場，呢個戲院可以話係佔盡地理優勢。
▲「北角匯」其實有幾座建築物，二期二樓角落就係 ACX Cinemas 戲院了；全院有 4 個 HOUSES，合共 143 個座位，絕對稱得上係迷你戲院規模。
▲ 官網其實已經可以提供售票服務了，在 12 月 16 日前享有成人 70 蚊的票價優惠；你可能會話，港島其他場大部分都係 60 蚊，話明開幕優惠點解都會貴過人地呢？ 初頭本 YK 都係同大家想法一樣，但到場後又覺得寧願比 70 蚊好過。 WHY？
HOUSE 1 - 專門播放港產片（主打杜琪峰作品）
▲ 呢個 HOUSE 1 係港產片專屬影院，特別播放港產片的致敬系列，而第一個月係播放杜琪峰導演經典作品，杜導演的粉絲絕對不容錯過。
▲ ACX Cinemas 規模雖細小，但座位的舒適程度確實係冠絕其他院線，本 YK 非常喜歡這種家居真皮「單座梳化」的軟熟感覺，座位質素高能夠讓人安心舒暢地享受電影。
▲ 不論是座墊、椅背的厚度，要承托我這種身高 6 尺、體重過百的男子一樣毫無難度，坐左落去我唔想起翻身。
▲ 私人推介可以嘗試坐第一排最外面呢兩個位，你可能會話： YK 大師，你黐線咩？ 叫人買第一排？ 係呀！ 第一排係最舒服，因為座位係可以好似屋企張梳化咁有機關，輕輕一拉機關就會成張野訓落去（如圖）； 本 YK 完全可以放鬆躺下去睇片，而得益於迷你影院的設計，實測銀幕長度沒有超出人類眼睛的可視角度，最外面呢兩個座位依然輕鬆睇得晒；而且聽聞第一排價錢再平少少。
HOUSE 2 + 3 小型家庭影院
▲ 呢種迷你戲院最好就係包場黎睇戲搞放映活動。
▲ 一班同學仔 34 個人同場滿座睇電影，熄左燈之後確實係一件好浪漫和青春的事。咩話你讀「和尚寺」？
▲ 影院細自然銀幕細，所以選擇座位方面建議前排優先，視覺臨場感會比較強烈。
▲ 四個 HOUSE 的配色都不同，配合和字體都好有日本戰隊 FEEL。。。
▲ HOUSE 3 座位稍微多翻少少，座位一樣係舒服的「單座梳化」，同樣建議試玩第一排。
睇完戲睇幻彩星空燈
▲ 不論是 HOUSE 1、2、3 離場的通道都會見到幻彩星空燈效果，不斷轉色、持續閃動，但我本人覺得有一個潛在缺點：女士肯定會塞住係條通道玩自拍打卡，而兵長、伍長們肯定會幫手影埋一份，我只係想離場翻屋企咋！
隱藏的 4 號院
▲ 唯一入口位於另一邊的 HOUSE 4 是 ACX Cinemas 的貴賓院；價錢貴之餘享受亦係香港獨家玩法。
▲ 香港首創的電動按摩椅睇戲體驗，一場得 8 個座位，目前每位係 180 元，貴？ 其實不貴。
▲ ACX Cinemas 所採用的是定製版 OTO Esselence 系列，特設靜音按摩模式。
▲ 日本機場 15 蚊玩 10 分鐘只係普通按摩椅，一套電影 100 分鐘當你玩 5 轉 10 分鐘，已經 75 蚊，計算落去戲飛完全唔貴、值得一試。
▲ 每個 VIP 按摩椅旁邊都有一個小櫃檯，比大家放野飲和隨身袋之類。
▲ 需要留意係，為了觀眾身體負荷、機器運作考慮，按摩椅會十幾分鐘自動關閉一次，你需要手動再重新開啟；睇電影過程一路按住腰背確實係舒服，本 YK 建議呢個貴賓院適合音樂類、聽覺類、慢活類的電影；老實，如果 180 蚊買到兩個小時，我入場訓覺都覺得正爆！
特殊包裝爆谷
▲ 特殊設計的爆谷包裝亦係 ACX Cinemas 特色之一，但目前因疫情的緣故只能睇不能食，待疫情好轉先有得賣。
總結：邊三個原因推介入場？
老一輩中意 HOUSE 夠大，但新一代如本 YK 去睇戲其實唔喜歡人多。ACX Cinemas 每個院都不超過 50 座，而最吸引我的是高質素的座位，真皮超厚的單座梳化！ 高大男性要找一個舒服的戲院座位很難，所以 ACX Cinemas 的座位就是我 70 元都覺得超值的原因。更何況這裡有全港罕見的按摩椅睇戲設計，坐得舒服係其中一個推介大家入場的原因。
「北角匯」商場其實上蓋就是永久海景住宅項目，但離奇係總看不到住客，而且商場位置靠近維港海邊，並非主幹道中心，而人流都是北角附近的街坊為主，對比銅鑼灣和康怡的密集人口可說是人煙稀少，奇在交通又好方便。如果你想熱鬧少少可以行一分鐘入英皇道；如果想找一個市區「打發時間行街睇戲食飯一條龍、又唔要人少」，「北角匯」係我另一個推介大家過來入場的原因。
好多朋友呢排都唔返工，或者被逼平日放假，ACX Cinemas 可以一家大小入場睇戲，而商場本身做緊 MON - FRI 平日特殊泊車優惠，150 蚊電子付款消費送 2 小時免費泊車，250 蚊送 3 小時；三四個人睇場戲、食埋飯乜都夠晒，而且「北角匯」車位無康怡和銅鑼灣咁緊張； 富貴中產網友可以考慮揸車入場。 而商場本身其實未達到太古城巨大級別，但勝在樓下有個「一田超市」睇完戲落去買餸相信會成為街坊的慣常做法。